Exodus 11 - Yn Vible Casherick 1775 1819

CAB. XI

¹ As loayr y Chiarn rish Moses, Ver-yms foast un kerraghey elley er Pharaoh, as er Egypt; as lurg shen nee eh lhiggey diu goll veih shoh: tra lhiggys eh yn raad diu, ver eh magh shiu ooilley cooidjagh [dy siyragh] lesh ooilley ny t’eu

² Loayr nish ayns clashtyn y pobble, as lhig da dy chooilley ghooinney goaill er eeasaght voish e naboo, as dy chooilley ven veih e ben-naboo, jewellyn argid, as jewellyn airh.

³ As hug y Chiarn foayr da’n pobble ayns shilley ny Egyptianee. Marish shoh, va’n dooinney Moses ayns ard ghoo trooid cheer Egypt, rish fir-oik Pharaoh, as rish y pobble.

⁴ As dooyrt Moses, Shoh myr ta’n Chiarn gra, Mysh y vean-oie hem’s magh trooid Egypt.

⁵ As yiow ooilley yn chied er ny ruggey ayns cheer Egypt baase, veih’n chied er ny ruggey da Pharaoh, ta soie er e stoyl-reeoil, eer derrey’n chied er ny ruggey jeh’n inney-veyl, ta blieh ’sy wyllin; as ooilley’n chied-vrey jeh’n maase.

⁶ As bee eam atchimagh trooid ooilley cheer Egypt, lheid as nagh row rieau ayn roïe, chamoo vees y lheid arragh.

⁷ Agh noi veg jeh cloan Israel, cha jean moddey hene gleashagh e hengey, noi dooinney ny baagh: dy vod fys ’ve eu cre’n lhietrymys ta’n Chiarn dy yannoo, eddyr ny Egyptianee as Israel.

⁸ As hig ooilley ad shoh dty harvaantyn neose hym’s, as nee ad croymmey ad hene hym, gra, Immee uss royd, as ooilley’n pobble ta geiyrt dhyt; as ny lurg shen hem roym. As hie eh magh veih Pharaoh ayns jiarg-chorree.

⁹ As dooyrt y Chiarn rish Moses, Cha jean Pharaoh clashtyn rhyt, dy vod ny yindyssyn aym’s v’er nyn gronnaghey ayns cheer Egypt.

¹⁰ As ren Moses as Aaron ooilley ny yindyssyn shoh kiongoyrt rish Pharaoh: as ren y Chiarn cree Pharaoh y chreoghey, nagh lhiggagh eh yn raad da Israel ass cheer Egypt.