Earrooyn 5 - Yn Vible Casherick 1775 1819

CAB. V

¹ As loayr y Chiarn rish Moses, gra,

² Cur sarey da cloan Israel, dy der ad ass y champ dy chooilley lourane, as dagh unnane ta fo doghan roie-folley, as quoi-erbee ta neu-ghlen liorish bentyn rish corp marroo.

³ Chammah dooinney as ben ver shiu magh, cheu-mooie jeh’n champ ver shiu ad: nagh jean ad neu-chasherickey ny campyn oc, ny-vud oc ta my enish.

⁴ As ren cloan Israel myr shen, as hug ad ad magh ass y champ: myr dooyrt y Chiarn rish Moses, myr shen ren cloan Israel.

⁵ As loayr y Chiarn rish Moses, gra,

⁶ Abbyr rish cloan Israel, Tra vees dooinney ny ben kyndagh jeh aggair erbee ta deiney cur-rish, dy yannoo peccah noi’n Chiarn, as dy bee’n persoon shen er ny gheddyn oolee;

⁷ Eisht nee eh goaill-rish e pheccah, t’eh er n’yannoo: as nee eh slane cooilleeney yannoo son yn assee, as ver eh huggey yn wheiggoo ayrn jeh, as ver eh shoh dasyn t’eh er n’yannoo aggair da.

⁸ Agh mannagh bee echey dooinney-mooinjerey erbee, dasyn dy yannoo cooilleeney son yn aggair, lhig da’n cooilleeney ’ve jeant da’n Chiarn, eer da’n taggyrt: cheu-mooie jeh rea son lhiasaghey, liorish vees lhiasaghey jeant er e hon.

⁹ As bee dy chooilley oural, jeh nheeghyn casherick cloan Israel, v’er ad lhieu gys y taggyrt, leshyn.

¹⁰ Leshyn vees cooid casherick dy chooilley ghooinney: shen ny ta dooinney erbee dy choyrt da’n taggyrt, bee eh leshyn.

¹¹ As loayr y Chiarn rish Moses, gra,

¹² Loayr rish cloan Israel, as insh daue, My ta ben ghooinney erbee goll er-shaghryn, as kyndagh jeh drogh-yannoo n’oï,

¹³ As dy bee ee kyndagh jeh brishey-poosey rish dooinney erbee, as dy bee shoh keillit veih sooillyn e sheshey, as freilt follit, as ee jeant neu-ghlen, as nagh bee fenish erbee n’oïee, chamoo ee er ny ghoaill ayns e peccah.

¹⁴ As dy jig y smooinaght dy eadaghey ayns e chree, as dy bee eh geadaghey mysh e ven, as ish kyndagh; ny my vees y smooinaght dy eadaghey ayn, as eh geadaghey mysh e ven, as nagh vel ee kyndagh;

¹⁵ Eisht ver y dooinney lesh e ven gys y taggyrt, as ver eh lesh yn oural eck er e son, yn jeihoo ayrn jeh ephah dy veinn-oarn; cha deayrtee eh veg yn ooil er, ny cur frankincense er, son she oural-eadaghey t’ayn, as chebbal son imraa, cur lesh drogh-yannoo gys soilshey.

¹⁶ As ver y saggyrt lesh ee er-gerrey, as soiaghey ee kiongoyrt rish y Chiarn.

¹⁷ As nee’n saggyrt ushtey casherick y ghoaill ayns saagh craie, as jeh’n joan t’er laare y chabbane-agglish nee’n saggyrt goaill, as cur eh ayns yn ushtey.

¹⁸ As nee’n saggyrt soiagh yn ven kiongoyrt y Chiarn, as roostey kione y ven, as cur y chebbal son briaght ayns ny laueyn, eck, ta shen, yn oural-eadagh: as bee ec y taggyrt ny laue yn ushtey sharroo ta cur y mollaght lesh.

¹⁹ As ver y saggyrt currym urree liorish loo, as jir eh rish y ven, Mannagh vel dooinney erbee er lhie mayrt, as mannagh vel oo er n’gholl er-shaghryn gys neu-ghlennid rish dooinney elley, ayns ynnyd dty heshey, dy r’ou seyr veih’n ushtey sharroo shoh ta cur lesh y mollaght:

²⁰ Agh my t’ou er n’gholl er-shaghryn rish fer erbee, ayns ynnyd dty heshey, as uss er n’yannoo peccah, as dy vel ec dooinney ennagh dy yannoo rhyt, cheu-mooie jeh dty heshey hene:

²¹ Eisht nee’n saggyrt currym y chur er y ven lesh breearrey dy vollaght, as nee’n saggyrt gra rish y ven, Dy jean y Chiarn uss y yannoo mollaghtagh, as dwoaiagh er coontey loo oaiagh mastey dty phobble, tra ver eh er dty lheeasid dy loau, as dty volg dy att;

²² As dy jed yn ushtey shoh, ta cur lesh y mollaght ayns dty vynnagh, dy chur er dty volg dy att, as dty lheeasid dy loau: As nee’n ven, gra, Amen, Amen.

²³ As nee’n saggyrt scrieu ny mollaghtyn shoh ayns lioar, as nee eh dolley ad ass lesh yn ushtey sharroo:

²⁴ As ver eh er y ven dy iu yn ushtey sharroo, ta cur lesh y mollaght: as nee yn ushtey ta cur lesh y mollaght skeayley cheu-sthie j’ee, as hig eh dy ve sharroo.

²⁵ Eisht nee’n saggyrt goaill chebbal yn eaddagh ass laue y ven, as troggal eh seose dy ard kiongoyrt rish y Chiarn, as chebbal eh er yn altar.

²⁶ As nee’n saggyrt goaill lane doarn jeh’n chebbal, va dy vrah yn chooish, as lostey eh er yn altar, as lurg shen ver eh er y ven dy iu’n ushtey.

²⁷ As tra t’ad er chur urree giu yn ushtey, eisht hig eh gy-kione, my t’ee er ve kyndagh, as er n’yannoo aggair da e sheshey, dy jed yn ushtey ta cur lesh yn mollaght er cheu-sthie j’ee, as hig eh dy ve sharroo, as nee’n bolg eck gatt, as nee’n slheeasid eck loau: as bee’n ven ny mollaght mastey’n pobble eck.

²⁸ As mannagh vel y ven er ve kyndagh, agh glen, as ôney: eisht bee ee seyr, as nee ee sluight y ymmyrkey.

²⁹ Shoh’n leigh cour eadaghey, tra ta ben chyndaa ersooyl gys fer elley ayns ynnyd e sheshey, as er ny yannoo neu-ghlen;

³⁰ Ny tra ta’n spyrryd dy eadaghey dy ghoaill eh, as eh geadaghey mysh e ven, as dy choyrt lesh y ven roish y Chiarn, nee’n saggyrt cooilleeney urree ooilley’n leigh shoh.

³¹ Eisht bee’n dooinney seyr veih’n aggair, agh nee’n ven shoh gymmyrkey yn vee-chairys eck.