Earrooyn 4 - Yn Vible Casherick 1775 1819

CAB. IV

¹ As loayr y Chiarn rish Moses, as rish Aaron, gra,

² Gow earroo mec Kohath veih mastey mec Levi, cordail rish nyn lught-thie, rere thie nyn ayrey.

³ Veih jeig bleeaney as feed dy eash as erskyn, eer gys jeih bleeaney as da-eed, ooilley ny ta goll ’sy cheshaght, dy yannoo shirveish ’sy chabbane-agglish.

⁴ Shoh vees shirveish mec Kohath ’sy chabbane-agglish, mysh ny reddyn smoo casherick.

⁵ As tra ta’n camp dy gholl er y hoshiaght, hig Aaron as e vec, as nee ad goaill sheese yn coodagh, as coodee ad arg y chonaant lesh:

⁶ As ver ad er yn coodagh dy chraitnyn broc; as skeaylee ad harrish eaddagh slane-gorrym, as ver ad ayn ny looghyn.

⁷ As er boayrd yn arran casherick soit magh, nee ad skeayley coodagh dy eaddagh gorrym, as ver ad er ny claareeyn, as ny spainyn, as ny meilaghyn, as coodaghyn dy choodaghey lhieu: as bee’n arran kinjagh er.

⁸ As skeaylee ad orroo eaddagh dy scarleod, as cur harrish shen coodagh dy chraitnyn broc, as ver ad ayn ny looghyn echey

⁹ As gowee ad eaddagh gorrym, as coodee ad kainlere y toilshey, as e lampyn, as e smalyderyn, as e phlaityn cour ny smalyn, as ooilley ny siyn ooil, lhieu t’ad dy hirveish eh.

¹⁰ As ver ad eh, as ooilley ny siyn echey ayns coodagh dy chraitnyn broc, as ver ad eh er barrey.

¹¹ As er yn altar airh skeaylee ad eaddagh gorrym, as coodee ad shen lesh craitnyn broc, as ver ad huggey e looghyn.

¹² As gowee ad ooilley jeshaghtyn y chirveish, lhieu t’ad shirveish ayns yn ynnyd casherick, as cur ad ayns eaddagh gorrym, as ver ad orroo coodagh dy chraitnyn broc, as ver ad eh er barrey.

¹³ As gowee ad ersooyl yn leoie veih’n altar, as skeaylee ad harrish eaddagh gorrym-jiarg.

¹⁴ As ver ad er ooilley ny siyn echey, lhieu t’ad shirveish mysh, ta shen, ny censeryn, ny aalyn, as ny sleaystyn, as ny basonyn, ooilley siyn yn altar; as skeaylee ad harrish coodagh dy chraitnyn broc, as ver ad huggey ny looghyn.

¹⁵ As tra vees Aaron as e vec erreish coodaghey yn ynnyd casherick, as ooilley ny siyn casherick, myr ta’n camp dy gholl er y hoshiaght; lurg shen, hig mec Kohath dy choyrt lhieu eh; agh cha negin daue bentyn rish nhee casherick erbee, er-aggle dy vow ad baase. Ta ny reddyn shoh errey mec Kohath, ayns cabbane-agglish y cheshaght.

¹⁶ As gys oik Eleazar mac Aaron y saggyrt, ta bentyn yn ooil son soilshey, as yn oural-millish, as yn oural-arran gagh-laa, as yn ooil casherick, as slane kiarail y chabbane-agglish, as ooilley ny t’ayn, ayns yn ynnyd casherick, as ayns ny siyn echey.

¹⁷ As loayr y Chiarn rish Moses, as rish Aaron, gra,

¹⁸ Ny jean-jee giarey jeh sluight kynney ny Kohathiteyn, veih mastey ny Leviteyn.

¹⁹ Agh shoh myr nee shiu roo, dy vod ad ve bio, as gyn baase y gheddyn, tra hig ad er-gerrey gys ny nheeghyn smoo casherick; hed Aaron as e vec stiagh, as pointeil ad dagh unnane gys e hirveish, as gys e churrym.

²⁰ Agh cha jed ad stiagh dy yeeaghyn tra ta ny reddyn casherick er nyn goodaghey: er-aggle dy vow ad baase.

²¹ As loayr y Chiarn rish Moses, gra,

²² Gow myrgeddin coontey mee Ghershon, trooid ooilley thieyn nyn ayraghyn, rere nyn lught-thie;

²³ Veih jeih bleeaney as feed d’eash as erskyn, gys jeih bleeaney as da-eed d’eash, nee oo ad y earroo; ooilley ny ta goll stiagh dy chooilleeney yn chirveish, dy yannoo yn obbyr ayns cabbane-agglish y cheshaght.

²⁴ Shoh obbyr lught-thie ny Gershoniteyn, dy hirveish, as son carriads.

²⁵ As ver ad lhieu curtanyn y chabbane, as cabbane-agglish y cheshaght, yn coodagh echey, as y coodagh dy chraitnyn broc ta harrish, as curtan-dorrys chabbane-agglish y cheshaght.

²⁶ As curtanyn ny cooyrtey, as y curtan son dorrys giat ny cooyrtey ta liorish y chabbane, as liorish yn altar cruin mygeayrt, as ny coyrdyn oc, as ooilley jeshaghtyn y chirveish oc, as ooilley ny ta jeant nyn gour: shoh myr nee ad shirveish.

²⁷ Lurg oardagh Aaron as e vec vees ooilley shirveish mec ny Gershoniteyn, ayns ooilley nyn erraghyn, as ayns ooilley nyn shirveish, as nee shiuish pointeil ayns currym daue ooilley nyn erraghyn.

²⁸ Shoh shirveish lught-thie mec Ghershon, ayns cabbane-agglish y cheshaght: as bee’n currym ocsyn fo laue Ithamar mac Aaron y saggyrt.

²⁹ Er son mec Merari, nee oo ad y earroo cordail rish nyn lught-thie, rere thie nyn ayraghyn:

³⁰ Veih jeih bleeaney as feed d’eash as erskyn, eer gys jeih bleeaney as da-eed, gowee oo yn coontey oc, dagh unnane ta gentreil ’sy chirveish, dy yannoo obbyr chabbane-agglish y cheshaght.

³¹ As shoh currym yn errey oc, cordail rish ooilley’n chirveish oc ayns cabbane-agglish y cheshaght: buird y chabbane-agglish, as ny barryn, as ny pillaryn, as ny socketyn echey,

³² As pillaryn y chooyrt ooilley mygeayrt, as ny socketyn, as ny pinnaghyn, as ny coyrdyn oc, lesh ooilley nyn jeshaghtyn, as marish ooilley yn obbyr oc: as nee shiu genmys daue er-lheh, jeshaghtyn currym nyn errey

³³ Shoh shirveish lught-thie mec Merari, cordail rish ooilley’n chirveish oc ayns cabbane-agglish y cheshaght, fo laue Ithamar mac Aaron y saggyrt.

³⁴ As ren Moses as Aaron as ard-gheiney’n cheshaght, coontey ’ghoaill jeh mec ny Kohathiteyn, cordail rish y lught-thie oc, as rere thie nyn ayraghyn;

³⁵ Veih jeih bleeaney as feed d’eash as erskyn, gys jeih bleeaney as da-eed d’eash, dagh fer ta gentreil ’sy chirveish, son yn obbyr ayns cabbane-agglish y cheshaght:

³⁶ As v’adsyn va er nyn earroo jeu, lurg nyn lught-thie, daa housane shiaght cheead as jeih as da-eed.

³⁷ Shoh adsyn v’er nyn earroo jeh lught-thie ny Kohathiteyn, ooilley ny va son shirveish y yannoo ayns cabbane-agglish y cheshaght; ad ren Moses as Aaron nyn earroo, cordail rish sarey’n Chiarn, liorish laue Voses.

³⁸ As adsyn v’er nyn earroo jeh mec Ghershon, trooid nyn lught-thie, as rere thie nyn ayraghyn:

³⁹ Veih jeih bleeaney as feed dy eash as erskyn, gys jeih bleeaney as da-eed dy eash, dagh fer ta gentreil ayns y chirveish, son yn obbyr ayns cabbane-agglish y cheshaght:

⁴⁰ Ta shen, adsyn va er nyn earroo jeu, trooid nyn lught-thie, rere thie nyn ayraghyn, v’ad daa housane as shey cheead as jeih as feed.

⁴¹ Shoh adsyn v’er nyn earroo jeh lught-thie mec Ghershon, jeh ooilley ny va son shirveish ayns cabbane-agglish y cheshaght, ad ren Moses as Aaron nyn earroo, cordail rish sarey’n Chiarn.

⁴² As adsyn v’er nyn earroo jeh lught-thie mec Merari, trooid ny kynneeyn oc, rere thie nyn ayraghyn.

⁴³ Veih jeih bleeaney as feed dy eash as erskyn, derrey jeih bleeaney as da-eed, dagh unnane ta gentreil ’sy chirveish, son yn obbyr ayns cabbane-agglish y cheshaght:

⁴⁴ Ta shen, adsyn v’er nyn earroo jeu, cordail rish nyn lught-thie, v’ad three thousaneyn as daa cheead.

⁴⁵ Shoh adsyn v’er nyn earroo jeh lught-thie Merari, ren Moses as Aaron nyn earroo, cordail rish goo yn Chiarn, liorish laue Voses:

⁴⁶ Adsyn ooilley v’er nyn earroo jeh ny Leviteyn, ren Moses as Aaron as ard-gheiney Israel nyn earroo, cordail rish nyn lught-thie, as rere thie nyn ayraghyn;

⁴⁷ Veih jeih bleeaney as feed dy eash as erskyn, derrey jeih bleeaney as da-eed, dagh unnane haink dy yannoo obbyr y chirveish, as carriads yn errey, ayns cabbane-agglish y cheshaght:

⁴⁸ Adsyn v’er nyn earroo jeu, v’ad hoght thousaneyn as queig cheead as kiare-feed.

⁴⁹ Cordail rish sarey’n Chiarn, v’ad er nyn earroo fo laue Voses, dagh dooinney cordail rish e hirveish, as cordail rish e errey; myr shoh v’ad er nyn earroo liorishyn, myr hug y Chiarn sarey da Moses.