Earrooyn 34 - Yn Vible Casherick 1775 1819

CAB. XXXIV

¹ As loayr y Chiarn rish Moses, gra,

² Cur sarey da cloan Israel, as abbyr roo, Tra hig shiu gys cheer Chanaan (shoh’n cheer nee tuittym hiu son eiraght, ta shen, cheer Chanaan marish e ardjyn):

³ Eisht bee’n kierroo jiass eu, veih faasagh Zin, seose rish slyst Edom: as y chagliagh jiass eu vees ec oirr sodjey magh y cheayn-sailley, lesh y niar.

⁴ As nee’n chagliagh eu chyndaa veih’n jiass seose lesh Akrabbim as veih shen gys Zin: as bee’n lhiurid veih’n jiass gys Kadesh-barnea, as veih shen gys Hazar-addar, as harrish gys Azmon.

⁵ As ver y chagliagh lesh cumbaase veih Azmon gys awin Egypt, as nee eh roshtyn gys yn aarkey.

⁶ As er son y chierroo heear, bee’n aarkey mooar hene eu son cagliagh: shoh vees y kierroo heear eu.

⁷ As shoh vees y chagliagh twoaie eu; veih’n aarkey mooar, roie-jee jeeragh er cronk Hor.

⁸ Veih cronk Hor, nee shiu roie yn chagliagh eu derrey hig ee gys Hamath: as bee’n chagliagh veih shen gys Zedad.

⁹ As nee’n chagliagh roie gys Ziphron; as nee eh roshtyn gys Hazar-enan: shoh vees y chagliagh twoaie eu.

¹⁰ As nee shiu markal magh yn chagliagh har eu veih Hazar-enan gys Shepham.

¹¹ As hed y chagliagh sheese veih Shepham gys Riblah, er cheu-har jeh Ain; as nee’n chagliagh roie sheese, as roshtyn gys lhiattee cheayn Chinnereth, lesh y niar.

¹² As nee’n chagliagh roie sheese gys Jordan, as roshtyn gys y Faarkey Sailley: shoh vees y cheer eu, lesh ny ardjyn echey ooilley mygeayrt.

¹³ As hug Moses sarey da cloan Israel, gra, Shoh yn cheer nee shiu y ghoaill son eiraght liorish lot, doardee’n Chiarn dy ve er ny choyrt da ny nuy tribeyn, as da’n lieh-tribe.

¹⁴ Son ta tribe cloan Reuben, cordail rish thie nyn ayrey, as tribe cloan Ghad, cordail rish thie nyn ayrey, er gheddyn nyn eiraght, as ta lieh-tribe Vanasseh er gheddyn nyn eiraght.

¹⁵ Ta’n daa hribe, as y lieh-tribe er gheddyn nyn eiraght, cheu shoh dy Yordan, er-gerrey da Jericho, er y cheu-har, lesh irree ny greïney.

¹⁶ As loayr y Chiarn rish Moses, gra,

¹⁷ Shoh enmyn ny deiney nee rheynn y thalloo erriu: Eleazar y saggyrt, as Joshua mac Nun.

¹⁸ As gowee shiu un phrince jeh dagh tribe, dy rheynn y thalloo son eiraght.

¹⁹ As shoh enmyn ny deiney: jeh tribe Yudah, Caleb mac Jephunneh.

²⁰ As jeh tribe cloan Simeon Shemuel mac Ammihud.

²¹ Jeh tribe Venjamin, Elidad mac Chislon.

²² As prince tribe cloan Dan, Bukki mac Jogli.

²³ Prince cloan Yoseph, son tribe cloan Vanasseh, Hanniel mac Ephod.

²⁴ As prince tribe cloan Ephraim, Kemuel mac Shiphtan.

²⁵ As prince tribe cloan Zebulun, Elizaphan mac Parnach.

²⁶ As prince tribe cloan Issachar, Paltiel mac Azzan.

²⁷ As prince tribe cloan Asher, Ahihud mac Shelomi.

²⁸ As prince tribe cloan Naphtali, Pedahel mac Ammihud.

²⁹ Shoh adsyn, daue hug y Chiarn sarey dy rheynn yn eiraght er cloan Israel, ayns cheer Chanaan.