Earrooyn 32 - Yn Vible Casherick 1775 1819

CAB. XXXII

¹ Nish va ec cloan Reuben, as cloan Ghad earroo feer vooar dy ollagh: as tra honnick ad dy row thalloo Jazer, as thalloo Ghilead, pastyr mie son ollagh:

² Haink cloan Ghad, as cloan Reuben, as loayr ad rish Moses, as rish Eleazar y saggyrt, as rish leeideilee’n cheshaght, gra,

³ Ta Ataroth, as Dibon, as Jazer, as Nimrah, as Heshbon, as Elealeh, as Shebam, as Nebo, as Beon;

⁴ Eer y cheer, hug y Chiarn fo-chosh roish cloan Israel, cheer mie son ollagh, as ta mooarane ollagh ec dty harvaantyn.

⁵ Shen-y-fa, dooyrt ad, My ta shin er gheddyn foayr ayns dty hilley, lhig da’n cheer shoh ve er ny choyrt da dty harvaantyn son cummal, as ny cur lhiat shin harrish Jordan.

⁶ As dooyrt Moses rish cloan Ghad, as rish cloan Reuben, Jed ny braaraghyn eu gys y chaggey, as shiuish dy ve ayns shoh nyn daaue?

⁷ As cre’n-oyr ta shiu cur cloan Israel ass cree, dy gholl harrish gys y cheer ta’n Chiarn er choyrt daue?

⁸ Shoh myr ren nyn ayraghyn, tra hug mish ad veih Kadesh-barnea, dy scrial y cheer:

⁹ Son tra hie ad seose lesh coan Eshcol, as honnick ad y cheer, hyndaa ad cree cloan Israel noi goll seose gys y cheer, va’n Chiarn dy choyrt daue.

¹⁰ As va corree’n Chiarn er ny vrasnaghey yn traa cheddin, as loo eh, gra,

¹¹ Son shickyrys, cha jean veg jeh ny deiney haink seose ass Egypt, veih feed bleïn dy eash as erskyn, fakin y cheer loo mee da Abraham, da Isaac, as da Jacob; kyndagh nagh vel adsyn dy slane er n’eiyrt orrym:

¹² Er-lhimmey jeh Caleb mac Jephunneh yn Kenezite, as Joshua mac Nun, son t’ad dy kinjagh er n’eiyrt da’n Chiarn.

¹³ As va corree’n Chiarn brasnit noi Israel, as hug eh orroo rouail noon as noal ’syn aasagh da-eed bleïn, derrey va ooilley’n cheeloghe shen, va er n’yannoo olk ayns shilley’n Chiarn, er n’gholl naardey.

¹⁴ As cur-my-ner, ta shiuish er droggal ayns ynnyd nyn ayraghyn, sluight noa dy ghrogh gheiney, dy ghoostey reesht corree dewil y Chiarn noi Israel.

¹⁵ Son my hyndaa-ys shiu ersooyl voishyn, faagee eh ad reesht ’syn aasagh, as nee shiuish stroie ooilley’n pobble shoh.

¹⁶ As haink ad er-gerrey da, as dooyrt ad, Troggee mayd ayns shoh bwoailtchyn son y maase ain, as baljyn son nyn gloan.

¹⁷ Agh hem mayd hene ayns slane eïlley-caggee roish cloan Israel, derrey vees mayd er chur lhien ad gys nyn gummal: as faag mayd nyn gloan veggey ayns ard-valjyn voallit, er-aggle jeh cummaltee’n cheer.

¹⁸ Cha jig mayd back gys nyn dhieyn hene, derrey vees dy chooilley ghooinney jeh cloan Israel er ny hickyraghey ayns e eiraght hene:

¹⁹ Son cha shir mayd eiraght mâroosyn er y cheu elley dy Yordan, ny harrish; er-yn-oyr dy vel yn eiraght ain er duittym hooin er y cheu shoh dy Yordan, lesh y niar.

²⁰ As dooyrt Moses roo, My nee shiu shoh, my hed shiu eïllit roish y Chiarn gys y chaggey,

²¹ As dy jed shiu ooilley ayns order-caggee harrish Jordan roish y Chiarn, derrey vees eh er n’imman magh e noidyn kiongoyrt rish,

²² As dy bee yn cheer er ny ghoaill roish y Chiarn: eisht hig shiu thie, as bee shiu neu-chyndagh fenish y Chiarn, as kiongoyrt rish Israel; as bee’n cheer shoh nyn eiraght roish y Chiarn.

²³ Agh mannagh jean shiu shoh, cur-my-ner, nee shiu peccah noi’n Chiarn: as bee shiu shickyr dy jean nyn beccah berraghtyn erriu.

²⁴ Trog-jee ard-valjyn da nyn gloan, as bwoailtchyn da ny kirree eu: as cooilleen-jee ny ta shiu er ghra.

²⁵ As loayr cloan Ghad, as cloan Reuben rish Moses, gra, Nee dty harvaantyn myr ta my hiarn er harey.

²⁶ Faagee mayd nyn gloan, nyn mraane, nyn shioltaneyn, as ooilley’n maase ain, ayns ard-valjyn Ghilead.

²⁷ Agh hed dty harvaantyn harrish, dagh dooinney ayns coamrey-caggee, fenish y Chiarn gys y vagher-caggee, myr ta my hiarn dy ghra.

²⁸ Myr shoh doardee Moses mychione oc, da Eleazar y saggyrt, as da Joshua mac Nun, as da ard ayraghyn tribeyn cloan Israel:

²⁹ As dooyrt Moses roo, My hed cloan Ghad, as cloan Reuben mêriu harrish Jordan, dy chooilley ghooinney ayns e choamrey-caggee roish y Chiarn, as dy bee’n cheer er ny ghoaill kiongoyrt riu; eisht ver shiu daue thalloo Ghilead son eiraght:

³⁰ Agh mannagh jed ad harrish mêriu gys y chaggey, bee eiraght oc ny mast’ eu ayns cheer Chanaan.

³¹ As dreggyr cloan Ghad, as cloan Reuben, gra, Myr ta’n Chiarn er ghra rish dty harvaantyn, shen myr nee mayd.

³² Hem mayd harrish eïllit roish y Chiarn gys cheer Chanaan, dy vod cummal yn eiraght ain ve er y cheu shoh dy Yordan.

³³ As hug Moses daue, ta shen dy ghra, da cloan Ghad, as da cloan Reuben, as da lieh-tribe Vanasseh mac Yoseph, reeriaght Sihon ree ny Amoriteyn, as reeriaght Og ree Vashan, yn cheer lesh e ard-valjyn, ayns ny ardjyn, eer ard-valjyn y cheer ooilley mygeayrt.

³⁴ As hrog cloan Ghad Dibon, as Ataroth, as Aroer,

³⁵ As Atroth, Shophan, as Jaazer as Jogbehah,

³⁶ As Beth-nimrah, as Beth-haran, ard-valjyn voallit: as bwoailtchyn keyrragh.

³⁷ As hrog cloan Reuben Heshbon, as Elealeh, as Kirjathaim,

³⁸ As Nebo, as Baal-meon (ny enmyn oc caghlaït) as Shibmah: as hug ad enmyn elley er ny ard-valjyn ren ad troggal.

³⁹ As hie cloan Machir mac Vanasseh gys Gilead, as ghow ad eh, as deiyr ad magh ny Amoriteyn v’ayn.

⁴⁰ As hug Moses Gilead da Machir mac Vanasseh, as va shen e chummal.

⁴¹ As hie Jair mac Vanasseh, as ghow eh ny baljyn-cheerey v’ayn, as ren eh genmys ad Havoth-jair.

⁴² As hie Nobah, as ghow eh Kenath as ny baljyn-cheerey v’ayn, as denmys eh eh Nobah, lurg e ennym hene.