Earrooyn 30 - Yn Vible Casherick 1775 1819

CAB. XXX

¹ As loayr Moses rish leeideilee ny tribeyn, mychione cloan Israel, gra, Shoh’n red ta’n Chiarn er harey.

² My nee dooinney jannoo breearrey gys y chiarn, ny goaill loo, dy chiangley e annym lesh gialdynys; cha jean eh brishey e ockle, nee eh cooilleeney ooilley ny t’eh er ghra.

³ My ta moidyn myrgeddin jannoo breearrey gys y Chiarn, as cur ee hene fo kiangley, ayns thie e ayrey, ayns yn aegid eck;

⁴ As e ayr clashtyn y breearrey eck, as e gialdynys, liorish t’ee er chiangley ee hene, as e ayr ve ny host: eisht bee ooilley ny breearraghyn eck mie, as nee dy chooilley vreearrey, lioroo t’ee er chiangley ee hene, shassoo mie.

⁵ Agh my nee yn ayr eck mee-lowal j’ee, er y laa t’eh clashtyn eh, cha jean veg jeh ny breearraghyn, ny jeh dy chooilley chiangley t’ee fo, shassoo: as nee’n Chiarn leih jee, son dy ren yn ayr eck mee-lowal j’ee.

⁶ As my ta ben-phoost jannoo breearrey, ny gialdynys erbee, dy choyrt ee hene fo kiangley;

⁷ As dy ren y sheshey eck clashtyn jeh, as gyn eh dy vee-lowal j’ee, er y laa cheayll eh jeh: eisht nee ny breearraghyn eck shassoo, as bee ny kianglaghyn t’ee fo, er ny yannoo mie.

⁸ Agh my ta e sheshey mee-lowal j’ee, er y laa cheayll eh jeh; eisht nee eh jannoo yn breearrey eck, as shen t’ee er loayrt lesh e meillyn, dy chiangley yn annym eck, dy ve gyn bree; as nee’n Chiarn leih jee.

⁹ Agh nee breearrey dy chooilley ven-treoghe, as breearrey ben scarrit, lesh t’ad er chiangley ad hene, shassoo mie.

¹⁰ As my ren ee breearrey ayns thie e sheshey, ny kiangley ee hene lesh loo;

¹¹ As dy cheayll e sheshey jeh, as gyn eh dy loayrt n’oïee as nagh ren eh mee-lowal j’ee: eisht nee ooilley ny breearraghyn eck shassoo, as bee dy chooilley chiangley, ta’n annym eck fo, jeant mie.

¹² Agh my ta’n sheshey eck er n’yannoo ad dy bollagh gyn bree, er y laa cheayll eh ad; eisht cha jean cre-erbee t’ee er loayrt, mychione e breearraghyn, ny mychione yn kiangley t’ee fo, shassoo ayns bree: ta’n sheshey eck er chur ad naardey, as nee’n Chiarn leih jee.

¹³ Dy chooilley vreearrey, as dy chooilley loo, dy heaghney yn annym, bee eh lurg aigney’n sheshey eck, dy yannoo mie, ny dy vrishey.

¹⁴ Agh mannagh vel e sheshey er loayrt n’oïee son laa ny jees, eisht t’eh niartaghey ooilley ny breearraghyn, as ooilley ny kianglaghyn t’ee fo: t’eh jannoo ad mie, son nagh loayr eh n’oïee, er y laa ren eh clashtyn ad.

¹⁵ Agh my nee eh, er aght erbee, jannoo ad gyn bree, erreish da ve er chlashtyn ad: eisht bee’n loght ecksh ersyn.

¹⁶ Ad shoh ny slattyssyn, hug y Chiarn ayns sarey da Moses, eddyr dooinney as e ven, eddyr yn ayr as e inneen, choud as t’ee ’syn aegid eck ayns thie e ayrey.