Earrooyn 3 - Yn Vible Casherick 1775 1819

CAB. III

¹ SHOH neesht sheelogheyn Aaron as Voses, ec y traa ren y Chiarn loayrt rish Moses ayns cronk Sinai.

² As shoh enmyn mec Aaron; Nadab yn fer shinney, as Abihu, Eleazar, as Ithamar.

³ Shoh enmyn mec Aaron, ny saggyrtyn va er ny ooilaghey, ren eh hene y chasherickey dy hirveish ayns oik y taggyrtys.

⁴ As hooar Nadab as Abihu baase kiongoyrt y Chiarn, tra heb ad aile neu-chooie roish y Chiarn, ayns faasagh Sinai, as v’ad gyn sluight: as ren Eleazar as Ithamar shirveish ayns oik y taggyrtys kionfenish Aaron nyn ayr.

⁵ As loayr y Chiarn rish Moses, gra,

⁶ Cur lhiat tribe Levi er-gerrey, as cheb ad kionfenish Aaron y taggyrt, dy vod ad shirveish fo.

⁷ As gowee ad yn currym orroo mârishyn, as currym yn slane pobble roish cabbane-agglish yn cheshaght, dy chooilleeney shirveish y chabbane-agglish:

⁸ As gowee ad kiarail jeh ooilley jeshaghtyn chabbane-agglish y pobble, as bee currym cloan Israel orroo, dy yannoo shirveish y chabbane-agglish.

⁹ As ver oo ny Leviteyn da Aaron as da e vec: dasyn t’ad dy slane livreït, veih mastey cloan Israel.

¹⁰ As nee oo pointeil Aaron, as e vec, as nee adsyn cooilleeney oik y taggyrtys; as bee’n joarree hig er-gerrey, er ny choyrt gy-baase.

¹¹ As loayr y Chiarn rish Moses, gra,

¹² As mish, cur-my-ner, ta mish er ghoaill ny Leviteyn veih mastey cloan Israel, ayns ynnyd ooilley ny ta hoshiaght-ruggit, ta fosley’n vreïn mastey cloan Israel; shen-y-fa, lhiam’s vees ny Leviteyn.

¹³ Er-yn-oyr dy vel ooilley ny ta hoshiaght-ruggit lhiam’s; son er y laa stroie mee ooilley ny va hoshiaght-ruggit ayns cheer Egypt, ren mee casherickey dou hene ooilley ny va hoshiaght-ruggit ayns Israel, chammah dooinney as baagh, lhiam’s vees ad: Mish y Chiarn.

¹⁴ As loayr y Chiarn rish Moses ayns faasagh Sinai, gra,

¹⁵ Gow earroo cloan Levi, rere thie nyn ayraghyn, lurg nyn lught-thie: dy chooilley fyrrynagh veih mee d’eash as erskyn, nee oo ad nyn earroo.

¹⁶ As ren Moses ad y earroo, cordail rish goo’n Chiarn, myr v’eh er harey.

¹⁷ As shoh va mec Levi, liorish nyn enmyn; Gershon, as Kohath, as Merari.

¹⁸ As shoh enmyn mec Ghershon, liorish nyn lught-thie, Libni as Shimei.

¹⁹ As mec Kohath, liorish nyn lught-thie; Amram, as Izehar, Hebron, as Uzziel.

²⁰ As mec Merari liorish nyn lught-thie; Mahli as Mushi: shoh lught-thieyn ny Leviteyn, lurg thie nyn ayraghyn.

²¹ Jeh Gershon va kynney ny Libniteyn, as kynney ny Shimiteyn: ad shoh lughtyn-thie ny Gershoniteyn.

²² V’adsyn va er nyn earroo jeu, cordail rish earroo ooilley ny fyrrynee veih mee d’eash as erskyn, ta shen, adsyn va er nyn earroo jeu, shiaght thousaneyn as queig cheead.

²³ Nee lught-thie ny Gershoniteyn grunt y ghoaill son nyn gabbaneyn cooyl y chabbane-agglish, lesh y neear.

²⁴ As ard-chaptan thie ayr ny Gershoniteyn, vees Eliasaph mac Lael.

²⁵ As currym mec Ghershon, ayns cabbane y cheshaght, vees y chabbane, as y fastee, yn coodagh echey, as y curtan son dorrys chabbane-agglish y cheshaght.

²⁶ As curtanyn y chooyrt, as coodagh son dorrys ny cooyrtey, ta liorish y chabbane-agglish, as mygeayrt-y-mysh yn altar, as ny coyrdyn, son ooilley’n chirveish echey.

²⁷ As jeh Kohath va kynney ny Amramiteyn, as kynney ny Izehariteyn, as kynney ny Hebroniteyn, as kynney ny Uzzieliteyn: shoh kynneeyn ny Kohathiteyn:

²⁸ Ayns earroo ooilley ny fyrrynee veih mee d’eash as erskyn, va hoght thousaneyn as shey cheead, goaill currym yn ynnyd casherick.

²⁹ Nee lught-thie mec Kohath goaill grunt er cheu y chabbane-agglish my-yiass.

³⁰ As ard-chaptan thie ayrey lught-thie ny Kohathiteyn vees Elizaphan mac Uzziel.

³¹ As er yn currym oc vees yn arg, as y boayrd, as y kainlere, as ny altaryn, as siyn yn ynnyd casherick lhieu t’ad shirveish, as y coodagh, as ooilley ny ta son y chirveish echey.

³² As bee Eleazar mac Aaron y saggyrt yn ard-er harrish leeideilee ny Leviteyn, as bee eh ny oaseir orroosyn ta goaill currym yn ynnyd casherick.

³³ Jeh Merari, va kynney ny Mahliteyn, as kynney ny Mushiteyn; shoh kynneeyn Merari.

³⁴ As v’adsyn v’er nyn earroo jeu, cordail rish earroo ooilley ny fyrrynee veih mee d’eash as erskyn, shey thousaneyn as daa cheead.

³⁵ As ard-chaptan thie ayr kynneeyn Merari, va Zuriel mac Abihail: nee ad shoh goaill grunt er cheu yn chabbane-agglish my-hwoaie.

³⁶ As fo currym as kiarail mec Merari, vees buird y chabbane-agglish, as ny barryn, as ny pillaryn, as ny socketyn, as ooilley ny siyn echey, as ooilley ny ta bentyn rish.

³⁷ As pillaryn y chooyrt runt mygeayrt, as ny socketyn, as ny pinnaghyn, as ny coyrdyn oc.

³⁸ Agh adsyn nee campal roish y chabbane-agglish lesh y niar, ta shen, shiar jeh cabbane-agglish y cheshaght, vees Moses as Aaron, as e vec, goaill orroo kiarail yn ynnyd casherick, lesh currym cloan Israel; as bee’n joarree hig ny choair er ny choyrt gy-baase.

³⁹ Ooilley ny va er nyn earroo jeh ny Leviteyn, ren Moses as Aaron nyn earroo ec sarey’n Chiarn, trooid ooilley nyn lught-thie, ooilley ny fyrrynee veih mee dy eash as erskyn, va daa housane as feed.

⁴⁰ As dooyrt y Chiarn rish Moses, Gow earroo ooilley’n chied-ruggit ta fyrrynee jeh cloan Israel, veih mee dy eash as erskyn, as gow coontey ny enmyn oc.

⁴¹ As nee oo goaill ny Leviteyn er my hon hene (mish y Chiarn) ayns ynnyd ooilley ny ta hoshiaght-ruggit mastey cloan Israel; as ollagh ny Leviteyn, ayns ynnyd ooilley ny ta hoshiaght-ruggit mastey ollagh cloan Israel.

⁴² As ghow Moses yn earroo oc, myr hug y Chiarn sarey da: ooilley ny va hoshiaght-ruggit mastey cloan Israel.

⁴³ As va ooilley ny fyrrynee va hoshiaght-ruggit, liorish coontey nyn enmyn, veih mee d’eash as erskyn, jeusyn v’er nyn earroo, daa housane as feed daa cheead as three-feed as three-jeig.

⁴⁴ As loayr y Chiarn rish Moses, gra,

⁴⁵ Gow ny Leviteyn ayns ynnyd ooilley ny ta hoshiaght-ruggit mastey cloan Israel, as ollagh ny Leviteyn ayns ynnyd yn ollagh oc, as bee ny Leviteyn lhiam’s: Mish y Chiarn.

⁴⁶ As er son ad shen, ta jeh’n daa cheead as three-feed as three-jeig, dy ve er nyn veaysley, jeusyn ta hoshiaght-ruggit jeh cloan Israel, ta ny shlee na ny Leviteyn:

⁴⁷ Nee oo eer goaill queig shekelyn y kione, son dagh unnane, cordail rish shekel yn ynnyd casherick nee oo goaill ad: ta shekel feed gerah.

⁴⁸ As nee oo cur yn argid, lesh t’ou feaysley yn earroo coayr, da Aaron, as da e vec.

⁴⁹ As ghow Moses yn argid-feaysley ocsyn va harrish as erskyn ad shen, va er nyn veaysley liorish ny Leviteyn.

⁵⁰ Jeusyn va hoshiaght-ruggit jeh cloan Israel ghow eh yn argid; thousane three cheead as three-feed as queig shekelyn, cordail rish shekel yn ynnyd casherick.

⁵¹ As hug Moses yn argid ocsyn v’er nyn veaysley, da Aaron, as da e vec, cordail rish goo’n Chiarn, myr hug y Chiarn sarey da Moses.