Earrooyn 29 - Yn Vible Casherick 1775 1819

CAB. XXIX

¹ As ’sy chiaghtoo vee, er y chied laa jeh’n vee, bee meeiteil casherick eu; er cha jean shiu obbyr erbee doccaragh: te laa diu son sheidey ny trumpetyn.

² As nee shiu chebbal oural-losht, son soar millish, roish y Chiarn, un dow aeg, un rea, as shiaght eayin jeh’n vleïn shen gyn lheamys:

³ As bee’n oural-arran oc dy flooyr lesh ooil ny-chione, three omeryn son dow, as daa omer son rea,

⁴ As un omer son un eayn, gour ny shiaght eayin er-lheh.

⁵ As un vannan veih ny goair son oural-peccah, dy yannoo lhiasaghey er nyn son:

⁶ Cheu-mooie jeh oural-losht y vee, as yn oural-arran, as yn oural-losht gagh-laa, as e oural-arran lesh, as nyn ourallyn-feeyney, cordail rish yn oardagh, son soar millish, oural jeant lesh aile gys y Chiarn.

⁷ As bee eu, er y jeihoo laa jeh’n chiaghtoo vee shoh, meeiteil casherick; as nee shiu nyn anmeenyn y injillaghey: er cha jean shiu monney erbee dy obbyr.

⁸ Agh nee shiu chebbal oural-losht da’n Chiarn, son soar millish, un dow aeg, un rea, as shiaght eayin jeh’n vleïn shen, bee ad gyn lheamys:

⁹ As bee’n oural-arran oc jeh flooyr lesh ooil ny-chione, three omeryn son dow, as daa omer son un rea,

¹⁰ Omer elley son eayn, son ny shiaght eayin er-lheh.

¹¹ Un vannan veih ny goair, son oural-peccah, marish yn oural-peccah son lhiasaghey, as yn oural-losht kinjagh, as yn oural-arran lesh, as nyn ourallyn-feeyney.

¹² As er y wheiggoo laa yeig jeh’n chiaghtoo vee, bee meeiteil casherick eu; cha jean shiu obbyr cadjin erbee, as nee shiu feailley ’reayll da’n Chiarn shiaght laa.

¹³ As nee shiu chebbal oural-losht, oural jeant lesh aile, son soar millish, roish y Chiarn; three-jeig dy ghew aegey, daa rea, as kiare eayin jeig jeh’n vleïn shen, bee ad dyn lheamys:

¹⁴ As bee’n oural-arran oc jeh flooyr lesh ooil ny-chione, three omeryn lesh dagh dow jeh ny three dew jeig, daa omer lesh dagh rea,

¹⁵ As omer elley lesh dagh eayn jeh ny kiare eayin jeig,

¹⁶ As un vannan veih ny goair, son oural-peccah, marish yn oural-losht gagh-laa, e oural-arran, as e oural-feeyney.

¹⁷ As er y nah laa, nee shiu chebbal daa stott jeig, daa rea, kiare eayin jeig jeh’n vleïn shen gyn lheamys:

¹⁸ As nyn oural-arran, as nyn ourallyn-feeyney, lesh ny dew, lesh ny reaghyn, as lesh ny eayin, vees cordail rish yn earroo oc, lurg yn oardagh:

¹⁹ As un vannan veih ny goair son oural-peccah, marish yn oural-losht gagh-laa, as yn oural-arran lesh, as nyn ourallyn-feeyney.

²⁰ As er yn trass laa, un dow jeig, daa rea, kiare eayin jeig jeh’n vleïn shen fegooish lheamys:

²¹ As yn oural-arran, as ny ourallyn-feeyney oc, lesh ny dew, lesh ny reaghyn, as lesh ny eayin, vees cordail rish yn earroo oc, lurg yn oardagh:

²² As un ghoayr son oural-peccah, cheu-mooie jeh’n oural-losht gagh-laa, as e oural-arran, as e oural-feeyney.

²³ As er y chiarroo laa, jeih dew, daa rea, as kiare eayin jeig jeh’n vleïn shen fegooish lheamys:

²⁴ Ny ourallyn-arran, as nyn ourallyn-feeyney, lesh ny dew, lesh ny reaghyn, as lesh ny eayin, vees cordail rish yn earroo oc, lurg yn oardagh:

²⁵ As un vannan veih ny goair son oural-peccah, marish yn oural-losht gagh-laa: e oural-arran, as e oural-feeyney.

²⁶ As er y wheiggoo laa, nuy dew, daa rea, as kiare eayin jeig jeh’n vleïn shen fegooish lheamys.

²⁷ As nyn oural-arran, as nyn ourallyn-feeyney, lesh ny dew, lesh ny reaghyn, as lesh ny eayin, vees cordail rish nyn earroo, lurg yn oardagh:

²⁸ As un ghoayr son oural-peccah, marish yn oural-losht kinjagh, as e oural-arran, as e oural-feeyney.

²⁹ As er y cheyoo laa, hoght dew, daa rea, as kiare eayin jeh’n vleïn shen fegooish lheamys:

³⁰ As yn oural-arran, as yn oural-feeyney oc, lesh ny dew, lesh ny reaghyn, as lesh ny eayin, vees cordail rish yn earroo oc, lurg yn oardagh:

³¹ As un ghoayr son oural-peccah, marish yn oural-losht gagh-laa, yn oural-arran as yn oural-feeyney.

³² As er y chiaghtoo laa, shiaght dew, daa rea, as kiare eayin jeig jeh’n vleïn shen gyn lheamys:

³³ As yn oural-arran, as yn oural-feeyney oc, lesh ny dew, lesh ny reaghyn, as lesh ny eayin, vees cordail rish yn earroo oc, lurg yn oardagh:

³⁴ As un ghoayr son oural-peccah, marish yn oural-losht gagh-laa, yn oural-arran, as yn oural-feeyney.

³⁵ Er yn hoghtoo laa, bee meeiteil casherick eu: er cha jean shiu monney erbee dy obbyr cadjin.

³⁶ Agh nee shiu chebbal oural-losht, oural jeant lesh aile, son soar millish roish y Chiarn; un dow, un rea, shiaght eayin jeh’n vleïn shen gyn lheamys.

³⁷ Yn oural-arran oc, as yn oural-feeyney, lesh y dow, lesh y rea, as lesh ny eayin, vees cordail rish yn earroo oc, lurg yn oardagh:

³⁸ As un ghoayr son oural-peccah, marish yn oural-losht gagh-laa, as yn oural-arran, as yn oural-feeyney.

³⁹ Ny reddyn shoh nee shiu chebbal gys y Chiarn, er ny feaillaghyn pointit, marish ny breearraghyn, as ny chebballyn-arryltagh eu, son ny ourallyn-losht, as son ny ourallyn-arran, as son ny ourallyn-feeyney, as son ny ourallyn-shee eu.

⁴⁰ As dinsh Moses da cloan Israel, cordail rish ooilley ny hug y Chiarn ayns sarey da Moses.