Earrooyn 27 - Yn Vible Casherick 1775 1819

CAB. XXVII

¹ Eisht haink inneenyn Zelophehad, mac Hepher, mac Ghilead, mac Machir, mac Vanasseh, jeh kynneeyn Vanasseh mac Yoseph: as shoh enmyn e inneenyn; Mahlah, Noah, as Hoglah, as Milcah, as Tirzah.

² As haink ad fenish Voses, as fenish Eleazar y saggyrt, as fenish ny princeyn, as y slane cheshaght, ec dorrys y chabbane-agglish, gra,

³ Hooar yn ayr ain baase ayns yn aasagh, as cha row eh jeh’n cheshaght ocsyn, ren girree magh noi’n Chiarn, ayns sheshaght Chorah: agh hooar eh baase cadjin peccee elley, as cha row mec echey.

⁴ Cre’n-fa veagh ennym yn ayr ain caillit mastey e chynney, son dy vel eh dyn mac? Cur dooin, er-y-fa shen, eiraght mastey braaraghyn nyn ayrey.

⁵ Eisht hug Moses lesh y chooish oc roish y Chiarn.

⁶ As loayr y Chiarn rish Moses, gra,

⁷ Ta inneenyn Zelophehad ’sy chair: ver oo, son shickyrys, cummal eiraght daue, mastey braaraghyn nyn ayrey; as ver oo shickyrys daue ayns eiraght nyn ayrey.

⁸ As nee oo loayrt rish cloan Israel, gra, My yiow dooinney baase gyn mac, eisht ver shiu er yn eiraght dy huittym gys yn inneen.

⁹ As mannagh bee inneen echey, eisht ver shiu yn eiraght da e vraaraghyn.

¹⁰ As my t’eh gyn braaraghyn, eisht ver shiu yn eiraght da braaraghyn e ayrey.

¹¹ As mannagh vel braaraghyn ec e ayr, eisht ver shiu yn eiraght da’n dooinney-mooinjerey sniessey jeh e chynney, as bee’n eiraght leshyn: as bee shoh da cloan Israel ny slattys dy vriwnys, myr hug y Chiarn sarey da Moses.

¹² As dooyrt y Chiarn rish Moses, Immee seose er y chronk shoh Abarim, as gow shilley jeh’n cheer, ta mish er choyrt da cloan Israel.

¹³ As erreish dhyt v’er vakin eh, bee uss myrgeddin er dty haglym gys dty phobble, myr va Aaron dty vraar.

¹⁴ Son cha dug shiu biallys da’n sarey aym’s (ayns faasagh Zin, ayns irree-magh y cheshaght) liorish nagh dug shiu onnor dou ec yn ushtey, roish ny sooillyn oc: ta shen, ushtey Meribah ec Kadesh, ayns faasagh Zin.

¹⁵ As loayr Moses rish y Chiarn, gra,

¹⁶ Lhig da’n Chiarn, Jee spyrrydyn dy chooilley eill, dooinney y hoiaghey harrish y pobble,

¹⁷ Oddys goll magh as stiagh roue, as dy leeideil ad magh, as dy choyrt lesh ad stiagh: nagh bee sheshaght y Chiarn myr kirree fegooish bochilley.

¹⁸ As dooyrt y Chiarn rish Moses, Gow hood Joshua mac Nun, dooinney ta’n spyrryd (dy chreenaght) ayn, as lhie dty laue er.

¹⁹ As lhig da cheet kionfenish Eleazar y saggyrt, as fenish ooilley’n cheshaght: as cur e churrym da kiongoyrt roo.

²⁰ As ver oo ayrn jeh dty ooashley hene ersyn, dy vod ooilley sheshaght cloan Israel ve biallagh dasyn.

²¹ As nee eh shassoo fenish Eleazar y saggyrt, nee shirrey coyrle er e hon, liorish briwnys yn Urim, kiongoyrt rish y Chiarn: ec y fockle echeysyn hed ad magh, as ec y fockle echey hig ad stiagh, chammah eh hene, as ooilley cloan Israel mârish, eer yn slane sheshaght.

²² As ren Moses myr va’n Chiarn er harey da: as ghow eh Joshua, as hoie eh eh kiongoyrt rish Eleazar y saggyrt, as kiongoyrt rish ooilley’n cheshaght.

²³ As lhie eh e laueyn er, as livrey eh da e churrym, myr hug y Chiarn sarey, liorish laue Voses.