Earrooyn 26 - Yn Vible Casherick 1775 1819

CAB. XXVI

¹ As haink eh gy-kione lurg y chramp, dy loayr y Chiarn rish Moses, as rish Eleazar mac Aaron y saggyrt, gra,

² Gow-jee coontey ooilley sheshaght cloan Israel, veih feed bleïn dy eash as erskyn, trooid lught-thie nyn ayrey, ooilley ny ta son goll gys caggey ayns Israel.

³ As loayr Moses as Eleazar yn saggyrt roo, ayns cheer-rea Voab liorish Jordan, er-gerrey da Jericho, gra,

⁴ Gow-jee earroo yn pobble, veih feed bleïn dy eash as erskyn; myr hug y Chiarn sarey da Moses, as da cloan Israel, hie magh ass cheer Egypt.

⁵ Reuben mac shinney Israel: cloan Reuben: Hanoch, jeh ta kynney ny Hanochiteyn: jeh Pallu, kynney ny Palluiteyn:

⁶ Jeh Hezron kynney ny Hezroniteyn: jeh Carmi kynney ny Carmiteyn.

⁷ Ad shoh kynneeyn ny Reubeniteyn: as va’n earroo oc, three thousaneyn as da-eed as shiaght cheead as jeih as feed.

⁸ As mac Pallu; Eliab.

⁹ As mee Eliab; Nemuel, as Dathan as Abiram: shoh’n Dathan as Abiram cheddin, va ny ard-gheiney mastey’n pobble, ren streeu noi Moses as Aaron, ayns sheshaght Chorah, tra dirree ad magh noi’n Chiarn.

¹⁰ As ren y thalloo fosley e beeal, as sluggey ad sheese cooidjagh marish Korah, tra va’n cheshaght shen giarit jeh, as ren yn aile stroie daa cheead as jeih deiney as da-eed: as haink ad dy ve raaue sampleyragh.

¹¹ Agh cha row cloan Chorah er nyn stroie mârish.

¹² Mee Simeon, lurg ny kynneeyn oc: jeh Nemuel, kynney ny Nemueliteyn: jeh Jamin, kynney ny Jaminiteyn: jeh Jachin, kynney ny Jachiniteyn:

¹³ Jeh Zerah, kynney ny Zarhiteyn: Jeh Shaul, kynney ny Shauliteyn.

¹⁴ As shoh kynneeyn ny Simeoniteyn, daa housane as feed as daa cheead.

¹⁵ Cloan Ghad, lurg ny kynneeyn oc: jeh Zephon, kynney ny Zephoniteyn: jeh Haggi, kynney ny Haggiteyn; jeh Shuni, kynney ny Shuniteyn:

¹⁶ Jeh Ozni, kynney ny Ozniteyn: jeh Eri, kynney ny Eriteyn:

¹⁷ Jeh Arod, kynney ny Aroditeyn: jeh Areli, kynney ny Areliteyn.

¹⁸ Ad shoh kynneeyn cloan Ghad, cordail rish nyn earroo, da-eed thousane as queig cheead.

¹⁹ Mec Yudah va Er as Onan: as hooar Er as Onan baase ayns cheer Chanaan.

²⁰ As va mec Yudah, lurg ny kynneeyn oc: jeh Shelah, kynney ny Shelaniteyn: jeh Pharez, kynney ny Pharziteyn: jeh Zerah, kynney ny Zarhiteyn:

²¹ As mec Pharez va: jeh Hezron, kynney ny Hezroniteyn: jeh Hamul kynney ny Hamuliteyn.

²² As shoh kynneeyn Yudah, cordail rish nyn earroo, three-feed as shey thousaneyn jeig as queig cheead.

²³ Jeh mec Issachar, lurg ny kynneeyn oc: jeh Tola, kynney ny Tolaïteyn: jeh Pua, kynney ny Puniteyn:

²⁴ Jeh Jashub, kynney ny Jashubiteyn: jeh Shimron, kynney ny Shimroniteyn.

²⁵ Shoh kynneeyn Issachar, cordail rish yn earroo oc, three-feed as kiare thousaneyn as three cheead.

²⁶ Jeh mec Zebulun, lurg ny kynneeyn oc: jeh Sered, kynney ny Sarditeyn: jeh Elon, kynney ny Eloniteyn: jeh Jahleel, kynney ny Jahleeliteyn.

²⁷ Shoh kynneeyn ny Zebuluniteyn, cordail rish yn earroo oc, three-feed thousane as queig cheead.

²⁸ Mec Yoseph, lurg ny kynneeyn oc, va Manasseh as Ephraim.

²⁹ Jeh mec Vanasseh: jeh Machir, kynney ny Machiriteyn: as hooar Machir Gilead: jeh Gilead haink kynney ny Gileaditeyn.

³⁰ Shoh mec Ghilead: jeh Jeezer, kynney ny Jeezeriteyn: jeh Helek, kynney ny Helekiteyn:

³¹ As jeh Asriel, kynney ny Asrieliteyn: as jeh Shechem, kynney ny Shechemiteyn:

³² As jeh Shemida, kynney ny Shemidaïteyn: as jeh Hepher, kynney ny Hepheriteyn.

³³ As cha row mac ec Zelophehad mac Hepher, agh inneenyn: as enmyn inneenyn Zelophehad, va Mahlah, as Noah, Hoglah, Milcah, as Tirzah.

³⁴ Shoh kynneeyn Vanasseh, as adsyn v’er nyn earroo jeu, daa housane jeig as da-eed as shiaght cheead.

³⁵ Ad shoh mec Ephraim, lurg ny kynneeyn oc: jeh Shuthelah, kynney ny Shuthalhiteyn: jeh Becher, kynney ny Bachriteyn: jeh Tahan, kynney ny Tahaniteyn.

³⁶ As ad shoh mec Shuthelah: jeh Eran kynney ny Eraniteyn.

³⁷ Shoh kynneeyn mec Ephraim, cordail rish yn earroo oc, daa housane jeig as feed as queig cheead. Shoh mec Yoseph, cordail rish nyn gynneeyn.

³⁸ Mec Venjamin, lurg ny kynneeyn oc: jeh Bela, kynney ny Belaïtyn; jeh Ashbel, kynney ny Ashbeliteyn: jeh Ahiram, kynney ny Ahiramiteyn:

³⁹ Jeh Shupham, kynney ny Shuphamiteyn: jeh Hupham, kynney ny Huphamiteyn.

⁴⁰ As mec Bela va Ard, as Naaman: jeh Ard, kynney ny Arditeyn; as jeh Naaman, kynney ny Naamiteyn.

⁴¹ Shoh mec Venjamin, lurg ny kynneeyn oc: as adsyn v’er nyn earroo jeu, va queig thousaneyn as da-eed as shey cheead.

⁴² Ad shoh mec Dan, lurg ny kynneeyn oc: jeh Shuham, kynney ny Shuhamiteyn. Shoh kynneeyn Dan, cordail rish nyn sluight.

⁴³ Va ooilley kynneeyn ny Shuhamiteyn, cordail rish yn earroo oc, three-feed as kiare thousaneyn as kiare cheead.

⁴⁴ Jeh cloan Asher, lurg ny kynneeyn oc: jeh Jimna, kynney ny Jimniteyn: jeh Jesui, kynney ny Jesuiteyn: jeh Beriah, kynney ny Beriiteyn.

⁴⁵ Jeh mec Beriah: jeh Heber, kynney ny Heberiteyn: jeh Malchiel, kynney ny Malchieliteyn:

⁴⁶ As ennym inneen Asher va Sarah.

⁴⁷ Shoh kynneeyn mec Asher, cordail rish yn earroo oc: va three thousaneyn jeig as da-eed as kiare cheead.

⁴⁸ Jeh mec Naphtali, cordail rish ny kynneeyn oc: jeh Jahzeel, kynney ny Jahzeeliteyn: jeh Guni, kynney ny Guniteyn:

⁴⁹ Jeh Jezer, kynney ny Jezeriteyn: jeh Shillem, kynney ny Shillemiteyn.

⁵⁰ Shoh kynneeyn Naphtali, cordail rish nyn lught-thie: as v’adsyn, v’er nyn earroo jeu, queig thousaneyn as da-eed as kiare cheead.

⁵¹ Shoh va slane earroo cloan Israel, shiaght cheead thousane as shiaght cheead as jeih as feed.

⁵² As loayr y Chiarn rish Moses, gra,

⁵³ Orroo shoh vees y cheer er ny rheynn son eiraght, cordail rish earroo ny enmyn.

⁵⁴ Da mooarane ver oo ny smoo dy eiraght, as dauesyn sloo ayns earroo, ver oo ny sloo dy eiraght: da dagh tribe bee e eiraght er ny choyrt, cordail rish nyn earroo.

⁵⁵ Ny-yeih, bee’n cheer er ny rheynn liorish lot: cordail rish enmyn tribeyn nyn ayrey bee nyn eiraght.

⁵⁶ Myr haghyrys y lot, vees yn eiraght er ny rheynn, edyr ny smoo, ny ny sloo.

⁵⁷ As shoh adsyn va er nyn earroo jeh ny Leviteyn, lurg ny kynneeyn oc; jeh Gershon, kynney ny Gershoniteyn: jeh Kohath, kynney ny Kohathiteyn: jeh Merari, kynney ny Merariteyn.

⁵⁸ Shoh kynneeyn ny Leviteyn: kynney ny Libniteyn, kynney ny Hebroniteyn, kynney ny Mahliteyn, kynney ny Mushiteyn, kynney ny Korathiteyn: as hooar Kohath Amram.

⁵⁹ As ennym ben Amram va Jochebed, inneen Levi, ren e moir gymmyrkey da Levi ayns Egypt; as ren ish gymmyrkey da Amram, Aaron as Moses, as Miriam nyn shuyr.

⁶⁰ As da Aaron va ruggit Nadab as Abihu, Eleazar as Ithamar.

⁶¹ As hooar Nadab as Abihu baase, tra heb ad aile an-chasherick roish y Chiarn.

⁶² As v’adsyn v’er nyn earroo jeu, three thousaneyn as feed, ooilley fyrrynee veih mee dy eash as erskyn: son v’ad er nyn earroo er-lheh veih cloan Israel, er-yn-oyr nagh row eiraght erbee soit magh daue, mastey cloan Israel.

⁶³ Shoh adsyn v’er nyn earroo liorish Moses as Eleazar yn saggyrt, ghow earroo cloan Israel, ayns thalloo-rea Voab, liorish Jordan, er-gerrey da Jericho.

⁶⁴ Agh jeh’n earroo shoh, cha row dooinney bio, jeusyn va Moses as Aaron yn saggyrt er n’earroo, tra ghow ad coontey Israel ayns faasagh Sinai.

⁶⁵ Son mychione oc shoh dooyrt y Chiarn, Yiow ad son shickyrys baase ayns yn aasagh. As cha row dooinney jeu er-mayrn, agh Caleb mac Jephunneh, as Joshua mac Nun.