Earrooyn 25 - Yn Vible Casherick 1775 1819

CAB. XXV

¹ As ren Israel campal ayns Shittim, as ren y pobble toshiaght dy yannoo maarderys rish inneenyn Voab.

² As ren ad yn pobble y chuirrey gys ourallyn ny jeeghyn oc: as ren y pobble gee, as croymmey sheese gys ny jeeghyn oc.

³ As va Israel er ny lhiantyn gys Baal-peor; as va jymmoose y Chiarn er ny vrasnaghey noi Israel.

⁴ As dooyrt y Chiarn rish Moses, Gow ooilley leeideilee yn pobble (’sy pheccah shoh) as crogh ad seose fenish y Chiarn noi’n ghrian, dy vod corree trome y Chiarn ve er ny hyndaa ersooyl veih Israel.

⁵ As dooyrt Moses rish briwnyn Israel, Cur-jee dy baase dagh dooinney e vooinjer, ren lhiantyn gys Baal-peor.

⁶ As cur-my-ner, haink dooinney jeh cloan Israel, as hug eh lesh gys e vraaraghyn ben jeh Midian, ayns shilley Voses, as ayns fakin slane sheshaght cloan Israel, va dobberan ec dorrys y chabbane-agglish.

⁷ As tra honnick Phinehas, mac Eleazar, mac Aaron y saggyrt shoh, dirree eh veih mastey’n cheshaght, as ghow eh shleiy ny laue.

⁸ As hie eh geiyrt er y dooinney dy Israel stiagh ’sy chabbane, as roie eh ad ny-neesht trooid, yn dooinney jeh Israel, as y ven trooid e bolg: Myr shen va’n chramp er ny lhiettal veih cloan Israel.

⁹ As v’adsyn hooar baase ’sy chramp, kiare thousaneyn as feed.

¹⁰ As loayr y Chiarn rish Moses, gra,

¹¹ Ta Phinehas mac Eleazar, mac Aaron y saggyrt, er hyndaa ersooyl my chorree veih cloan Israel, (choud as v’eh jeean er my ghraih’s ny mast’ oc) nagh ren mee cloan Israel y stroie ayns my eulys.

¹² Shen-y-fa abbyr rish, Cur-my-ner, Ta mee giootal ersyn my chonaant dy hee.

¹³ As bee eh echey, as ec e luight ny lurg, eer yn conaant dy haggyrtys kinjagh; er-yn-oyr dy row eh jeean son ooashley e Yee; as dy ren eh lhiasaghey son cloan Israel.

¹⁴ Nish ennym yn Israelite va er ny varroo, eh v’er ny choyrt gy-baase marish y ven jeh Midian, va Zimri mac Salu, prince jeh kynney mooar mastey ny Simeoniteyn.

¹⁵ As ennym y ven jeh Midian va er ny varroo, va Cozbi inneen Zur: v’eh ard-ghooinney harrish pobble, as jeh thie ooasle ayns Midian.

¹⁶ As loayr y Chiarn rish Moses, gra,

¹⁷ Gow-jee cooilleeney er ny Midianiteyn, as stroie-jee ad:

¹⁸ Son t’ad er heaghney shiuish lesh nyn kialgyn, lioroo t’ad er chleayney shiu, ayns cooish Peor, as ayns cooish Cozbi, inneen prince jeh Midian, nyn shuyr, va er ny varroo er laa yn chramp, er coontey yn jalloo Peor.