Earrooyn 24 - Yn Vible Casherick 1775 1819

CAB. XXIV

¹ As tra honnick Balaam, dy row eh aigney’n Chiarn dy vannaghey Israel, cha jagh eh, myr ren eh roïe, dy vriaght liorish obbeeys, agh hyndaa eh e eddin lesh yn aasagh.

² As hrog Balaam seose e hooillyn, as honnick eh Israel tannaghtyn ayns e chabbaneyn, cordail rish ny tribeyn oc, as haink spyrryd Yee er.

³ As hie eh lesh e choraa-dorraghey, as dooyrt eh, Ta Balaam mac Beor er ghra, as ta’n dooinney, ta ny sooillyn echey foshlit, er ghra:

⁴ t’eshyn er ghra, cheayll goan Yee, eh honnick ashlish yn ooilley-niartal, tuittym ayns cadley dowin, agh e hoilshey foshlit:

⁵ Cre cha aalin ta dty chabbaneyn, O Yacob, as dty chummallyn, O Israel!

⁶ Myr ny coanyn t’ad er nyn skeayley magh, myr garaghyn liorish oirr ny hawinyn, myr ny biljyn lign-aloes ta’n Chiarn er hoiaghey, as myr ny biljyn-cedar liorish ny ushtaghyn.

⁷ Nee ny siyn echey roie harrish lesh ushtey, as bee reill ec e luight harrish ymmodee ellanyn, as bee’n ree echey ny syrjey na Agag, as bee e reeriaght er ny hoiaghey seose dy niartal.

⁸ Hug Jee lesh eh magh ass Egypt, t’echey, myr dy beagh eh, niart yn unicorn: nee eh stroie ny ashoonyn e noidyn, as brishey ny craueyn oc, as ad y hoylley lesh e hideyn.

⁹ Hie eh gys fea, lhie eh sheese myr lion, as myr lion aeg: quoi s’loys da eh y ghoostey? bannit t’eshyn ta dy dty vannaghey, as mollaghtagh t’eshyn ta gwee mollaght dhyt.

¹⁰ As va corree Valak er ny vrasnaghey noi Balaam, as woaill eh e vassyn dy cheilley: as dooyrt Balak rish Balaam, Hug mee fys ort dy ghwee mollaght er my noidyn, as cur-my-ner, t’ou dy slane er vannaghey ad, ny three keayrtyn shoh.

¹¹ Shen-y-fa nish, cosne royd gys dt’ynnyd hene: va mee kiarit dy hroggal oo gys ard-ooashley: agh cur-my-ner, ta’n Chiarn er dty reayll veih ooashley.

¹² As dooyrt Balaam rish Balak, Nagh loayr mee myrgeddin rish dty haghteryn, gra,

¹³ Dy jinnagh Balak cur dou lane e hie dy argid as d’airh, cha voddyms goll noi sarey’n Chiarn, dy yannoo edyr mie ny sie jeh my aigney hene: agh ny ta’n Chiarn dy ghra, shen nee’m loayrt?

¹⁴ As cur-my-ner, ta mee nish goll gys my phobble hene, tar, er-y-fa shen, as soilshee-ym dhyt, cre nee’n pobble shoh rish y pobble ayd’s, ayns ny earishyn ta ry-heet.

¹⁵ As hie eh lesh e choraa-dorraghey, as dooyrt eh, Ta Balaam mac Beor er ghra, as ta’n dooinney ta e hooillyn foshlit, er ghra:

¹⁶ T’eh er ghra, ren clashtyn goan Yee, as va toiggal aigney’n fer smoo syrjey, honnick ashlish yn Ooilley-niartal, tuittym ayns cadley dowin, agh e hoilshey foshlit:

¹⁷ Neem’s fakin eh, agh cha nee nish: ver-ym eh my-ner, agh cha nee dy gerrit: hig Rollage ass Jacob, as nee Lorg-reill troggal ass Israel; as nee eh bwoalley corneilyn Voab, as reill harrish ooilley cloan Sheth.

¹⁸ As bee Edom son eiraght, bee Seir myrgeddin son cummal da e noidyn, as nee Israel gymmyrkey eh hene dy dunnal.

¹⁹ Ass Jacob hig yn ard-fer-reill, as nee eh stroie eshyn t’er-mayrn jeh’n ard-valley.

²⁰ As tra yeeagh eh er Amalek, hie eh lesh e choraa-dorraghey, as dooyrt eh, Ta Amalek ayns toshiaght ny ashoonyn, agh bee’n jerrey echey, dy jean eh cherraghtyn son dy bragh.

²¹ As yeeagh eh er ny Keniteyn; as hie eh lesh e choraa-dorraghey, as dooyrt eh, S’lajer ta dty ynnyd-vaghee, as t’ou jannoo dty edd ayns y chreg.

²² Ny-yeih, bee’n Kenite er ny choyrt naardey, derrey ver Ashur lesh oo ersooyl ayns cappeeys.

²³ As hie eh lesh e choraa-dorraghey, as dooyrt eh, Aless, quoi vees bio tra nee Jee shoh ’yannoo!

²⁴ As nee lhongyn cheet veih ardjyn Chittim, as seaghney Ashur, as seaghney Eber, as nee eshyn myrgeddin cherraghtyn son dy bragh.

²⁵ As hrog Balaam er, as jimmee eh, as hyndaa eh gys e ynnyd hene: as hie Balak myrgeddin roish.