Earrooyn 23 - Yn Vible Casherick 1775 1819

CAB. XXIII

¹ AS dooyrt Balaam rish Balak, Trog dou ayns shoh shiaght altaryn, as fow aarloo dou ayns shoh shiaght dew, as shiaght reaghyn.

² As ren Balak myr va Balaam er ghra; as ren Balak as Balaam chebbal dow as rea er dagh altar.

³ As dooyrt Balaam rish Balak, Shass liorish dty oural-losht, as hem’s dy lhiattee; foddee dy der y Chiarn meeiteil dou: as cre-erbee nee eh soilshaghey dou, insh-ym dhyt. As hie eh gys boayl er-lheh.

⁴ As haink Jee gys Balaam; as dooyrt eh rish, Ta mee er droggal shiaght altaryn, as er jebbal er dagh altar dow as rea.

⁵ As hug y Chiarn fockle ayns beeal Valaam, as dooyrt eh, Chyndaa reesht gys Balak, as shoh myr nee oo loayrt.

⁶ As haink eh reesht huggey, as cur-my-ner, v’eh ny hassoo liorish e oural-losht, eh hene, as ooilley princeyn Voab mârish.

⁷ As hie eh lesh e choraa-dorraghey, as dooyrt eh, Ta Balak ree Voab er chur fys orrym veih Aram, ass sleityn y niar, gra, Tar, gwee mollaght er my hon er Jacob, as tar, cur y-lane fo Israel.

⁸ Kys oddym’s mollaght y choyrt ersyn, nagh vel Jee er choyrt e vollaght? ny kys oddym’s y-lane y choyrt fosyn, nagh vel y Chiarn er choyrt y-lane fo?

⁹ Son veih mullagh ny creggyn hee-ym eh, as veih ny croink ta mee fakin eh: cur-my-ner, nee’n pobble cummal orroo hene, as cha bee ad er nyn goontey mastey ny ashoonyn.

¹⁰ Quoi oddys coontey joan Yacob, as earroo yn chiarroo ayrn jeh Israel? Lhig dooys baase y dooinney cairagh y gheddyn, as lhig da jerrey my vea ve casley rish yn jerrey echeysyn.

¹¹ As dooyrt Balak rish Balaam, Cre shoh t’ou er n’yannoo rhym? ghow mee oo dy ghwee mollaght er my noidyn, as cur-my-ner, t’ou ooilley-cooidjagh er vannaghey ad.

¹² As dreggyr eh, as dooyrt eh, Nagh negin dou goaill tastey, dy loayrt shen ny ta’n Chiarn er choyrt ayns my veeal?

¹³ As dooyrt Balak rish, Tar, ta mee guee ort mârym, gys boayl elley, raad yiow shilley jeu: cha jean oo fakin agh yn ayrn sodjey magh jeu, as cha vaik oo ad ooilley: as cur mollaght orroo er my hon veih shen.

¹⁴ As hug eh lesh eh gys magher Zophim, gys mullagh Pisgah, as hrog eh shiaght altaryn, as heb eh dow as rea er dagh altar.

¹⁵ As dooyrt eh rish Balak, Shass uss ayns shoh liorish dty oural-losht, choud as hem’s quail y Chiarn ayns shid.

¹⁶ As hug y Chiarn meeiteil da Balaam, as hug eh fockle ayns e veeal, as dooyrt eh, Immee reesht gys Balak, as abbyr myr shoh.

¹⁷ As tra haink eh huggey, cur-my-ner, v’eh ny hassoo liorish e oural-losht, as princeyn Voab mârish. As dooyrt Balak rish, Cre ta’n Chiarn er loayrt?

¹⁸ As hie eh lesh e choraa-dorraghey, as dooyrt eh, Irree seose, Valak, as clasht; eaisht rhym, uss vac Zippor:

¹⁹ Cha vel Jee myr dooinney, dy yannoo foalsaght, chamoo myr mac dooinney, dy chaghlaa e aigney: vel eh er ghra, as nagh jean eh cooilleeney? ny vel eh er loayrt, as nagh jean eh mie jeh?

²⁰ Cur-my-ner, ta mee er my harey dy vannaghey; as t’eh er vannaghey, as cha voddym’s caghlaa eh.

²¹ Cha surr eh aggair erbee ’ve jeant da Jacob, ny seaghyn dy huittym er Israel: ta’n Chiarn e Yee mârish, as yn coraa dy varriaght reeoil ny-vud oc.

²² Hug Jee lesh ad ass Egypt; ta echey, myr dy beagh eh, niart yn unicorn.

²³ Son shickyrys cha vel obbeeys erbee noi Jacob, chamoo ta faishnys erbee noi Israel: ayns yn imbagh cooie, vees er ny hoilshaghey mychione Jacob as Israel, Cre ta Jee er n’yannoo!

²⁴ Cur-my-ner, nee’n pobble girree seose myr lion mooar, as troggal seose eh hene myr y lion aeg; cha lhie eh sheese, derrey vees eh er n’ee jeh’n chragh, as er n’iu fuill y varroo.

²⁵ As dooyrt Balak rish Balaam, Chamoo gwee mollaght orroo, ny bannaght orroo.

²⁶ Agh dreggyr Balaam, as dooyrt eh rish Balak, Nagh dinsh mee dhyt, gra, Ooilley ny ta’n Chiarn dy harey, shegin dou jannoo.

²⁷ As dooyrt Balak rish Balaam, Tar mârym, ta mee guee ort; as ver-ym lhiam oo gys ynnyd elley; foddee dy gooidsave lesh Jee, dy vod oo gwee mollaght orroo er my hon veih shen.

²⁸ As hug Balak lesh Balaam gys mullagh Peor, ta jeeaghyn lesh Jeshimon.

²⁹ As dooyrt Balaam rish Balak, Trog dou ayns shoh shiaght altaryn, as fow aarloo dou ayns shoh shiaght dew, as shiaght reaghyn.

³⁰ As ren Balak myr va Balaam er ghra, as heb eh dow as rea er dagh altar.