Earrooyn 22 - Yn Vible Casherick 1775 1819

CAB. XXII

¹ As hie cloan Israel er nyn doshiaght, as hoie ad nyn gamp ayns cheer rea Voab, er y cheu shoh dy Yordan, liorish Jericho.

² As honnick Balak mac Zippor ooilley ny va Israel er n’yannoo rish ny Amoriteyn.

³ As va Moab fo aggle trome roish y pobble, son dy row ad ymmodee: as va Moab seaghnit, kyndagh rish cloan Israel.

⁴ As dooyrt Moab rish shanstyr Vidian, Nish nee’n cheshaght shoh sliee seose ooilley ny ta mygeayrt-y-mooin, myr ta’n dow sliee seose faiyr y vagher. As va Balak mac Zippor ree ny Moabiteyn ec y traa cheddin.

⁵ Hug eh chaghteryn er-y-fa shen gys Balaam mac Beor, gys Pethor, ta liorish awin cheer cloan e phobble, dy eamagh er, gra, Cur-my-ner, ta pobble er jeet veih Egypt; as t’ad coodaghey eaghtyr y thallooin, as t’ad er champal er-gerrey dou.

⁶ Tar nish, ta mee guee ort, er-y-fa shen, cur dty vollaght er y pobble shoh er my hon; son t’ad ro niartal dou; foddee dy voym y varriaght orroo, dy vod shin ad y woalley, as ad y chlo ass y cheer: son er-lhiam dy vel eshyn bannit t’ou uss dy vannaghey, as dy bee eshyn mollaghtagh, t’ou uss coyrt dty vollaght er.

⁷ As hie shanstyr Voab, as shanstyr Vidian rhymboo lesh y leagh dy obbeeys ayns nyn laue; as haink ad gys Balaam, as livrey ad chaghteraght Valak.

⁸ As dooyrt eh roo, Gow-jee aaght ayns shoh noght, as ver-yms lhiam fys hiu, cre nee’n Chiarn gra rhym: as duirree ard-gheiney Voab marish Balaam.

⁹ As haink Jee gys Balaam [ayns ashlish] as dooyrt eh, Quoi ny deiney shoh ta mayrt?

¹⁰ As dooyrt Balaam rish Jee, Ta Balak mac Zippor, ree Voab, er chur chaghteraght hym, gra,

¹¹ Cur-my-ner, ta pobble er jeet ass Egypt, ta coodaghey eaghtyr y thallooin: Tar nish, gwee mollaght orroo er my hon; foddee dy voddym barriaght y gheddyn orroo, as ad y imman ersooyl.

¹² As dooyrt Jee rish Balaam, Cha jed oo mâroo, cha der oo mollaght er y pobble: son t’ad bannit.

¹³ As dirree Balaam ’sy voghrey, as dooyrt eh rish ard-gheiney Valak, Immee-jee reue gys y cheer eu hene: son ta’n Chiarn gobbal kied dou, dy gholl mêriu.

¹⁴ As hrog ard-gheiney Voab orroo, as hie ad gys Balak, as dooyrt ad, Ta Balaam gobbal dy heet mârin.

¹⁵ As hug Balak reesht princeyn ny shlee, as ny s’ooasle na’n chied eallagh.

¹⁶ As haink ad gys Balaam, as dooyrt ad rish, Shoh myr ta Balak mac Zippor gra, Ny lhig da nhee erbee, ta mee guee ort, dty lhiettal veih cheet hym’s:

¹⁷ Son nee’m oo y hroggal gys ooashley feer ard, as cre-erbee hirrys oo orrym, nee’m er dty hon: ’Tar, er-y-fa shen, ta mee guee ort, cur mollaght er y pobble shoh er my hon.

¹⁸ As dreggyr Balaam, as dooyrt eh rish chaghteryn Valak, Dy jinnagh Balak cur dooys lane e hie dy argid, as dy airh, cha voddym goll noi goo yn Chiarn my Yee, dy yannoo ny sloo, ny ny smoo.

¹⁹ Nish, er-y-fa shen, ta mee guee erriu, fuirree-jee mârym yn oie shoh myrgeddin, dy vod fys ’ve aym, cre nee’n Chiarn gra ny-sodjey rhym.

²⁰ As haink Jee gys Balaam ’syn oie, as dooyrt eh rish, My hig ny deiney shoh dy eamagh ort, trog ort, as immee mâroo: agh ny-yeih, cre-erbee jir-ym rhyt, shen nee oo loayrt.

²¹ As dirree Balaam ’sy voghrey, as hug eh er yn assyl ve jeeltit, as hie eh marish princeyn Voab.

²² As va corree Yee brasnit, son dy jagh eh: as hass ainle y Chiarn ’sy raad, dy lhiettal eh. Nish v’eh markiagh er e assyl, as va e ’ghaa er-mooinjerey mârish.

²³ As honnick yn assyl ainle y Chiarn ny hassoo ayns y raad, as e chliwe lommyrtagh ayns e laue; as hyndaa yn assyl dy lhiattee jeh’n raad, as ghow ee yn magher; as woaill Balaam yn assyl, dy chur ee er y raad.

²⁴ Agh hass ainle y Chiarn ayns raad ny garaghyn-feeyney, lesh voalley er dagh cheu.

²⁵ As tra honnick yn assyl ainle y Chiarn, ren ee chionney gys y voalley, as vroo ee cass Valaam noi’n voalley; as woaill eh ee reesht.

²⁶ As hie ainle y Chiarn ny-sodjey, as hass eh ayns ynnyd coon, ayn cha row raad erbee dy hyndaa, edyr gys y laue yesh, ny gys y laue chiare.

²⁷ As tra honnick yn assyl ainle y Chiarn, huitt ee sheese fo Balaam: as va corree Valaam er ny ghreesaghey, as woaill eh yn assyl lesh e lorg.

²⁸ As ren y Chiarn fosley beeal yn assyl, as dooyrt ee rish Balaam, Cre ta mish er n’yannoo rhyt, dy vel oo er m’y woalley ny three keayrtyn shoh?

²⁹ As dooyrt Balaam rish yn assyl, Son dy vel oo er ve roonagh rhym: baillym, dy beagh cliwe ayns my laue, son nish varrin oo.

³⁰ As dooyrt yn assyl rish Balaam, Nagh nee mish dty assyl, orrym t’ou er varkiagh rieau neayr’s va mee lhiat, gys y laa jiu? row mee rieau cliaghtey dy yannoo myr shoh rhyt? As dooyrt eh, Cha row.

³¹ Eisht doshil y Chiarn sooillyn Valaam, as honnick eh ainle y Chiarn ny hassoo ayns y raad, as e chliwe lommyrtagh ayns e laue; as chroym eh sheese e chione, lesh e eddin gys y thalloo.

³² As dooyrt ainle y Chiarn rish, Cre’n-oyr t’ou er woalley dty assyl ny three keayrtyn shoh? cur-my-ner, hie mish magh dy hassoo dt’oï, son dy vel dty raad camlaagagh ayns my hilley:

³³ As honnick yn assyl mee, as hyndaa ee voym ny three keayrtyn shoh: er-be dy hyndaa ee voym, son shickyrys, eer nish, va mee er varroo uss, as er hauail ish bio.

³⁴ As dooyrt Balaam rish ainle y Chiarn, Ta mee er n’yannoo peccah; son ve gyn-yss dou, dy row uss dty hassoo ’sy raad roym: nish er-y-fa shen, my te noi dt’aigney, chyndaa-ym thie reesht.

³⁵ As dooyrt ainle y Chiarn rish Balaam, Immee marish ny deiney: agh shen ny-lomarcan, jir-ym rhyt, nee oo loayrt. Myr shen hie Balaam marish princeyn Valak.

³⁶ As tra cheayll Balak, dy row Balaam er roshtyn, hie eh magh ny whail, gys ard-valley Voab, ta er oirr Arnon, ta shen ’syn ard sodjey magh.

³⁷ As dooyrt Balak rish Balaam, Nagh dug mee chaghteraght jeean, dy eamagh ort? Cre’n-fa nagh daink oo hym? Nagh vel eh ayns y phooar aym’s dy dty hroggal seose gys ard-ooashley?

³⁸ As dooyrt Balaam rish Balak, Cur-my-ner, nish dy vel mee er jeet hood: vel eh ayns y phooar aym’s nish dy ghra nhee erbee? yn fockle ver Jee ayns my veeal, shen nee’m loayrt.

³⁹ As hie Balaam marish Balak, as haink ad gys Kirjath-huzoth.

⁴⁰ As ren Balak chebbal dew as kirree, as hug eh fys er Balaam, as ny princeyn va mârish.

⁴¹ As haink eh gy-kione laa-ny-vairagh, dy ghow Balak Balaam, as hug eh lesh eh seose gys ynnydyn ard Vaal, dy voddagh eh veih shen fakin yn ayrn sodjey magh jeh’n pobble.