Earrooyn 21 - Yn Vible Casherick 1775 1819

CAB. XXI

¹ AS tra ren ree Arad yn Canaanite, va reill lesh y jiass, clashtyn imraa dy row Israel cheet seose, goaill raad ny brialtee; eisht ren eh caggey noi Israel, as ghow eh paart jiu nyn bryssoonee.

² As ren Israel breearrey gys y Chiarn, as dooyrt ad, My nee uss dy jarroo livrey yn pobble shoh gys my laue, eisht stroie-ym dy bollagh ny ard-valjyn oc.

³ As hug y Chiarn clashtyn da coraa Israel, as livrey eh seose ny Canaaniteyn: as ren ad dy bollagh stroie ad hene as ny ard-valjyn oc; as denmys eh yn ynnyd cheddin Hormah.

⁴ As ghow ad nyn yurnah veih cronk Hor, lesh raad yn Aarkey Jiarg, dy gholl mygeayrt cheer Edom: as va’n pobble dy mooar seaghnit ayns nyn aigney, kyndagh rish y raad.

⁵ As loayr y pobble noi Jee, as noi Moses; Cre’n-fa ta shiu er chur lhieu shin seose ass Egypt, dy herraghtyn ’syn aasagh shoh? son cha vel arran ny ushtey ain, as ta’n annym ain jiooldey’n arran shoh dyn vree.

⁶ As hug y Chiarn ard-nieughyn ailagh mastey’n pobble; as lhott ad y pobble, as hooar ymmodee jeh pobble Israel baase.

⁷ Shen-y-fa haink y pobble gys Moses, as dooyrt ad, Ta shin er n’yannoo peccah, son ta shin er loayrt noi’n Chiarn, as dt’oï’s; guee gys y Chiarn dy ghoaill ersooyl ny ard-nieughyn voïn: as ghow Moses padjer son y pobble.

⁸ As dooyrt y Chiarn rish Moses, Jean ard-nieu ailagh, as soie seose eh er croan: as hig eh gy-kione, dy chooilley er ta lhottit, tra nee eh jeeaghyn er, nee eh coural.

⁹ As ren Moses ard-nieu dy phrash, as hoie eh eh er croan: as haink eh gy-kione, my va dooinney erbee lhottit liorish yn ard-nieu, tra yeeagh eh er yn ard-nieu prashey, dy dooar eh couyr,

¹⁰ As hie cloan Israel er nyn doshiaght, as ren ad campal ayns Oboth.

¹¹ As ghow ad nyn yurnah veih Oboth, as ren ad campal ec Ije-abarim, ayns yn aasagh, ta er raad Voab, lesh irree ny greïney.

¹² Veih shen scugh ad, as ren ad campal ayns coan Zared.

¹³ Veih shen scugh ad, as ren ad campal er y cheu elley jeh Arnon, ta ’syn aasagh, myr t’ou cheet veih ardjyn ny Amoriteyn: son ta Arnon y chagliagh eddyr Moab as ny Amoriteyn.

¹⁴ Shen-y-fa te er ny imraa ayns lioar caggaghyn y Chiarn, Cre v’eh er n’yannoo ’syn Aarkey Jiarg, as ayns strooanyn Arnon,

¹⁵ As ec ny hawinyn ta roie sheese gys ard-valley Ar, as lhie rish cagliagh Voab.

¹⁶ As veih shen hie ad gys Beer: shen y chibbyr my-e-chione loayr y Chiarn rish Moses, Chaggil y pobble dy cheilley, as ver-yms ushtey daue.

¹⁷ Eisht ghow Israel yn arrane shoh, Geill seose, O hibbyr, ass y farrane; gow-jee mygeayrt lesh yn arrane:

¹⁸ Chleiy ny princeyn y chibbyr lesh nyn luirg, ren deiney ooasle y pobble y chleiy eh, er oardagh nyn ard-leeideilagh. As veih’n aasagh jimmee ad gys Mattanah:

¹⁹ As veih Mattanah gys Nahaliel: as veih Nahaliel gys Bamoth:

²⁰ As veih Bamoth ayns y choan, t’ayns cheer Voab, gys mullagh Pisgah, ta jeeaghyn lesh Jeshimon.

²¹ As hug Israel chaghteryn gys Sihon ree ny Amoriteyn, gra,

²² Lhig dou goll trooid y cheer ayd’s; cha jem mayd trooid ny magheryn, ny garaghyn-feeyney, cha n’iu mayd jeh ushtaghyn y chibbyr: agh gow mayd raad-mooar y ree, derrey vees mayd shaghey dty ardjyn.

²³ As cha lhiggagh Sihon da Israel goll trooid y cheer echey: agh haggil Sihon ooilley e gheiney-caggee dy cheilley, as hie eh magh noi Israel gys yn aasagh: as haink eh gys Jahaz, as ren eh caggey noi Israel.

²⁴ As woaill Israel eh lesh foyr y chliwe, as ghow ad yn cheer echey veih Arnon gys Jabbok, eer choud as cloan Ammon: son va cagliagh lajer ec cloan Ammon.

²⁵ As ghow Israel ooilley ny ard-valjyn shoh: as ren Israel cummal ayns ooilley ard-valjyn ny Amoriteyn, ayns Heshbon, as ayns ooilley e valjyn-cheerey.

²⁶ Son va Heshbon ard-valley Sihon ree ny Amoriteyn, va er chaggey noi’n ree va roish shen ayns Moab, as er n’ghoaill ooilley’n cheer echey voish, eer gys Arnon.

²⁷ Shen-y-fa t’adsyn, ta loayrt ayns raaghyn-dorraghey, gra, Tar-jee gys Heshbon, lhig da ard-valley Sihon ve troggit, as coamrit ass-y-noa.

²⁸ Son ta aile er gholl magh ass Heshbon, lossey veih ard-valley Sihon: te er lostey Ar ayns Moab, as chiarnyn cashtallyn lajer Arnon.

²⁹ Smerg dhyt’s, Voab; ta’n chragh er jeet ort, O phobble Chemosh; t’eh er choyrt e vec ren scapail, as e inneenyn, ayns cappeeys, da Sihon ree ny Amoriteyn.

³⁰ Ta shin er chur ad fo-chosh; ta Heshbon er cherraghtyn, eer gys Dibon, as ta shin er choyrt naardey ad, eer gys Nophah, ta roshtyn gys Medeba.

³¹ Myr shoh ren Israel cummal ayns cheer ny Amoriteyn.

³² As hug Moses magh brialtee gys Jaazer, as ghow ad ny baljyn echey, as deiyr ad magh ny Amoriteyn v’ayndoo.

³³ As hyndaa ad, as hie ad seose raad Vashan; as hie Og ree Vashan magh nyn ’oï, eh hene, as ooilley e phobble, gys y chaggey ec Edrei.

³⁴ As dooyrt y Chiarn rish Moses, Ny gow aggle roish: son ta mish er livrey eh gys dty laue, as ooilley e phobble, as y cheer echey: as nee uss jannoo rishyn myr ren oo rish Sihon ree ny Amoriteyn, va cummal ec Heshbon.

³⁵ Myr shen stroie ad eh, as e vec, as ooilley e phobble, derrey nagh row veg jeu faagit bio; as ghow ad y cheer echey daue hene.