Earrooyn 18 - Yn Vible Casherick 1775 1819

CAB. XVIII

¹ As dooyrt y Chiarn rish Aaron, Nee uss as dty vec, as thie dt’ayrey mayrt, gymmyrkey yn aggair vees jeant da’n ynnyd casherick: as nee uss as dty vec gansoor son peccaghyn y taggyrtys.

² As dty vraaraghyn myrgeddin jeh tribe Levi, tribe dt’ayrey, cur uss lhiat mayrt, dy vod ad ve fo dty churrym, as shirveish ort: agh nee uss as dty vec mayrt, shirveish roish cabbane casherick y chonaant.

³ As nee ad freayll yn currym ver uss orroo, as currym ooilley’n chabbane-agglish: agh cha jig ad er-gerrey da siyn y chabbane-casherick, as yn altar: nagh bee adsyn, ny shiuish myrgeddin er ny choyrt gy-baase.

⁴ As bee ad fo dty reill, as gowee ad currym y chabbane-agglish, cour ooilley shirveish y chabbane: as cha jig joarree er-gerrey diu,

⁵ As nee shiuish freayll currym y chabbane-casherick, as currym yn altar; nagh duitt jymmoose arragh er cloan Israel.

⁶ As mish, cur-my-ner, mish ta er ghoaill ny braaraghyn eu ny Leviteyn veih mastey cloan Israel: diuish t’ad er nyn goyrt myr gioot da’n Chiarn, dy yannoo shirveish y chabbane-agglish.

⁷ Shen-y-fa, nee uss as dty vec mayrt, freayll oik y taggyrtys eu, ayns dagh nhee bentyn rish yn altar, as er cheu-sthie jeh’n choodagh, as shiuish nee shirveish: ta mish er choyrt diu oik y taggyrtys eu, myr shirveish dy yioot (arryltagh): as bee’n joarree, ta cheet er-gerrey, er ny choyrt gy-baase.

⁸ As loayr y Chiarn rish Aaron, Cur-my-ner, ta mee myrgeddin er chur dhyt’s currym my hebballyn-troggit-seose jeh ooilley nheeghyn casherick cloan Israel; dhyt’s ta mee er choyrt ad, er coontey yn ooilaghey casherick, as da dty vec liorish oardagh kinjagh.

⁹ Shoh vees lhiat’s jeh’n chooid smoo casherick, jeh cre-erbee vees er-mayrn lurg yn oural-losht: ooilley ny chebballyn oc, ooilley nyn ourallyn-arran, as ooilley nyn ourallyn-peccah, as ooilley nyn ourallyn son aggair, nee ad geeck dooys, bee ad dy slane er nyn gasherickey da dty vec.

¹⁰ Ayns yn ynnyd smoo casherick nee oo baarail eh; nee dy chooilley ghooinney jiu gee eh: dhyt’s vees eh er ny chasherickey.

¹¹ As ta shoh lhiat’s: oural-troggit-seose nyn yiootyn, marish ooilley ny ourallyn-criht-mygeayrt liorish cloan Israel; dhyt’s ta mee er choyrt ad, as da dty vec, as da dty inneenyn mayrt, liorish slattys kinjagh: nee dy chooilley unnane, ta glen ayns dty lught-thie, goaill jeh.

¹² Ooilley’n chooid share jeh’n ooil, as ooilley’n chooid share jeh’n feeyn, as jeh’n churnaght, ny chied-vessyn jeu, nee ad chebbal gys y Chiarn, ad shen ta mee er choyrt dhyt.

¹³ As cre-erbee ta hoshiaght appee ’sy cheer, ver ad lhieu gys y Chiarn, bee eh lhiat’s; nee dy chooilley unnane, ta glen ayns dty hie, gee jeh.

¹⁴ Lhiat’s vees dy chooilley nhee t’er ny chasherickey, ayns Israel.

¹⁵ Bee dy chooilley nhee lhiat’s ta fosley’n vreïn jeh dy chooilley chretoor, t’ad cur lhieu gys y Chiarn, edyr eh ve jeh deiney ny maase: agh ny-yeih, yn chied lhiannoo-mac nee oo ayns shickyrys feaysley son sym d’argid, as son y chied-ruggit jeh cretoor erbee neu-ghlen nee oo sym y ghoaill.

¹⁶ As ad shen ta dy ve feayshlit, veih mee d’eash, ver oo orroo geeck er nyn son, cordail rish dty phrice, son queig shekelyn dy argid, lurg shekel y chabbane-casherick, ta shen feed gerah.

¹⁷ Agh shen ta hoshiaght-ruggit jeh booa, ny jeh keyrrey, ny jeh goayr, cha jean oo feaysley, son t’ad casherick: nee oo spreih yn uill oc er yn altar, as nee oo lostey yn eeh oc, son chebbal jeant lesh aile, son soar millish roish y Chiarn.

¹⁸ As bee’n eill oc lhiat’s, myr ta’n breast-criht (ec yn altar) as y clingan yesh lhiat’s.

¹⁹ Ooilley ny chebballyn casherick troggit seose, ta cloan Israel chebbal da’n Chiarn, ta mee er choyrt dhyt’s as da dty vec, as da dty inneenyn mayrt, liorish slattys kinjagh: te conaant dy hollan dy kinjagh, fenish y Chiarn, rhyt’s as rish dty luight.

²⁰ As loayr y Chiarn rish Aaron, Cha bee eiraght erbee ayd’s ’sy cheer oc, chamoo vees ayrn erbee ayd ny-vud oc: mish dty hoghyr, as dty eiraght mastey cloan Israel.

²¹ As cur-my-ner, ta mee er choyrt da cloan Levi ooilley’n jeihoo ayrn ayns Israel, myr eiraght, son y chirveish t’ad jannoo, eer shirveish y chabbane-agglish.

²² Chamoo hig cloan Israel maghey shoh er-gerrey dy hirveish ayns y chabbane-agglish, nagh bee ad fo peccah baasoil.

²³ Agh nee ny Leviteyn jannoo shirveish y chabbane-agglish, as nee ad gansoor son nyn gurrym: bee shoh slattys kinjagh trooid magh ny sheelogheyn eu, nagh bee eiraght erbee oc mastey cloan Israel.

²⁴ Agh jagheenyn cloan Israel, t’ad chebbal myr oural-troggit-seose gys y Chiarn, ta mee er choyrt da ny Leviteyn son eiraght: shen-y-fa ta mee er ghra roo, Fud cloan Israel cha bee eiraght erbee oc.

²⁵ As loayr y Chiarn rish Moses, gra,

²⁶ Myr shoh loayr rish ny Leviteyn, as abbyr roo, Ta ta shiu goaill jeh cloan Israel ny jagheenyn, ta mee er choyrt diu voue, son yn eiraght eu, eisht nee shiu chebbal jeu oural-troggit-seose gys y Chiarn, eer yn jeihoo ayrn jeh’n jaghee.

²⁷ As bee shoh nyn oural er ny choontey diu, myr dy beagh eh slane jaghee yn laare-vooie, as myr slane keesh y phress-feeyney.

²⁸ Myr shoh neesht ver shiu lhieu oural-troggit-seose gys y Chiarn, jeh ooilley ny jagheenyn ta shiu geddyn veih cloan Israel: as jeu shoh ver shiu oural-troggit-seose gys y Chiarn da Aaron y saggyrt.

²⁹ Ass ooilley ny giootyn eu nee shiu chebbal oural-troggit-seose y Chiarn, jeh ooilley’n chooid share jeu, ta shen, yn ayrn t’er ny chasherickey jeh.

³⁰ Shen-y-fa nee oo gra roo, Tra ta shiu er droggal yn chooid share jeh ass, eisht bee eh er ny choontey da ny Leviteyn, myr bishagh yn laare-arroo, as myr bishagh yn phress-feeyney.

³¹ As nee shiu baarail eh raad erbee dy nailliu, shiuish as nyn lught-thie: son te leagh nyn shirveish ayns y chabbane-agglish.

³² As cha bee shiu fo peccah erbee, kyndagh rish, tra ta shiu er scarrey veih yn chooid share jeh: chamoo nee shiu ymmyd cadjin jeh chebballyn casherick cloan Israel, nagh bee shiu er nyn stroie.