Earrooyn 16 - Yn Vible Casherick 1775 1819

CAB. XVI

¹ Nish ren Korah mac Izhar, mac Kohath, mac Levi; as Dathan as Abiram mec Eliab, as On mac Peleth, mec Reuben, irree-magh y yannoo.

² As hass ad seose noi Moses, marish shiartanse dy chloan Israel, daa cheead as jeih as da-eed prince jeh’n cheshaght, jeh ard ghoo mastey’n pobble, deiney ooasle.

³ As haggil ad cooidjagh noi Moses, as noi Aaron, as dooyrt ad roo, Ta shiuish goaill rouyr stayd erriu, fakin dy vel ooilley’n cheshaght casherick dagh unnane oc, as ta’n Chiarn ny mast’ oc; cre’n-oyr eisht dy vel shiu soiaghey shiu hene seose erskyn pobble y Chiarn.

⁴ As tra cheayll Moses shoh, huitt eh er e eddin:

⁵ As loayr eh rish Korah, as rish ooilley’n cheshaght echey, gra, Eer mairagh nee’n Chiarn soilshaghey quoi ta leshyn, as quoi ta casherick; as ver eh lesh eh er-gerrey da hene: eshyn da jarroo, t’eh er reih, ver eh lesh er-gerrey da hene.

⁶ Shoh jean-jee; Gow-jee censeryn, Korah, as ooilley e heshaght;

⁷ As cur-jee aile ayndoo, as cur-jee incense orroo, fenish y Chiarn mairagh: as hig eh gy-kione, yn dooinney ta’n Chiarn dy reih, dy bee eh casherick: shiuish ta goaill rouyr erriu, vec Levi.

⁸ As dooyrt Moses rish Korah, Clasht-jee, ta mee guee erriu, shiuish vec Levi:

⁹ Vel shiu jeeaghyn er myr red fardalagh, dy vel Jee Israel er reih shiu magh veih sheshaght Israel, dy chur lesh shiu er-gerrey da hene, dy yannoo shirveish chabbane-agglish y Chiarn, as dy hassoo roish y cheshaght, dy hirveish daue?

¹⁰ As t’eh er chur lesh oo er-gerrey da hene, as ooilley dty vraaraghyn mec Levi mayrt: as vel shiu son goaill erriu oik y taggyrt myrgeddin?

¹¹ Er y choontey cheddin, ta chammah oo hene, as ooilley dty heshaght er nyn jaglym cooidjagh noi’n Chiarn: as cre ta Aaron, dy vel shiu plaiynt n’oï?

¹² As hug Moses fys dy eamagh er Dathan as Abiram mec Eliab: hug ansoor, Cha jig mayd seose.

¹³ Nee red fardalagh eh, dy vel oo er chur lhiat shin ass cheer messoil ayns bainney as mill, dy stroie shin ayns yn aasagh, mannagh vel foyd dy yannoo oo hene ooilley-magh ny ard-er-reill harrin?

¹⁴ Marish shoh, cha vel oo er chur lhiat shin gys cheer messoil ayns bainney as mill, ny er chur dooin eiraght ayns magheryn as garaghyn-feeyney: vel oo son dolley sooillyn ny deiney shoh? cha jig mayd seose.

¹⁵ As va Moses feer jymmoosagh, as dooyrt eh rish y Chiarn, Ny jean uss soiagh jeh’n oural oc: cha vel mish er ghoaill voue wheesh as un assyl, chamoo ta mee er n’yannoo yn aggair sloo da unnane oc.

¹⁶ As dooyrt Moses rish Korah, Tar uss as ooilley dty heshaght roish y Chiarn, uss, as adsyn, as Aaron mairagh:

¹⁷ As lhig dagh dooinney goaill yn censer echey, as cur-jee incense ayndoo, as cur-jee lhieu ad roish y Chiarn dagh dooinney e henser, daa cheead censer as jeih as feed; uss myrgeddin as Aaron dagh unnane eu e henser.

¹⁸ As ghow dagh dooinney e henser, as hug ad aile ayndoo, as hug ad incense er, as hass ad ayns dorrys y chabbane-agglish marish Moses as Aaron.

¹⁹ As haggil Korah ooilley’n cheshaght nyn ’oï oc, gys dorrys y chabbane-agglish; as va gloyr y Chiarn er ny hoilshaghey fenish ooilley’n cheshaght.

²⁰ As loayr y Chiarn rish Moses, as rish Aaron, gra,

²¹ Jean-jee shiu hene y scarrey veih mastey’n cheshaght shoh, dy voddym ad y stroie ayns tullogh.

²² As huitt ad er nyn eddinyn, as dooyrt ad, O Yee, Jee spyrrydyn dy chooilley eill, jean un dooinney peccah, as bee uss corree rish ooilley’n cheshaght?

²³ As loayr y Chiarn rish Moses, gra,

²⁴ Loayr rish y cheshaght, gra, Scarr-jee shiu hene veih cabbane Chorah, Dathan, as Abiram.

²⁵ As hrog Moses er, as hie eh gys Dathan, as Abiram; as hie shanstyr Israel geiyrt er.

²⁶ As loayr eh rish y cheshaght gra, Scugh-jee, ta mee guee erriu, veih cabbaneyn ny deiney mee-chrauee shoh, as ny benn-jee rish veg dy vel lhieu, nagh bee shiu er nyn stroie ayns ooilley ny peccaghyn oc.

²⁷ Er shoh, ren ad scarrey ad hene veih cabbane Chorah, Dathan, as Abiram er dy chooilley heu: as haink Dathan as Abiram magh, as hass ad ayns dorrys ny cabbaneyn oc, marish nyn mraane, as nyn mec, as nyn gloan veggey.

²⁸ As dooyrt Moses, Liorish shoh bee fys eu, dy vel y Chiarn er m’y choyrt, dy yannoo ooilley ny obbraghyn shoh: son cha vel mee er n’yannoo ad jeh m’aigney hene.

²⁹ My yiow ny deiney shoh baase dooghyssagh dy chooilley ghooinney, ny my lhie-ys Jee e laue orroo myr er dy chooilley ghooinney elley; eisht cha vel y Chiarn er m’y choyrt.

³⁰ Agh my nee’n Chiarn red noa y yannoo, as dy jean y thalloo fosley e beeal, as ad y lhuggey seose, lesh ooilley ny ta bentyn daue, as dy jed ad sheese bio ayns yn ooig; eisht nee shiuish toiggal, dy vel ny deiney shoh er vrasnaghey yn Chiarn.

³¹ As haink eh gy-kione, erreish da ve er loayrt ooilley ny goan shoh, dy ren yn thalloo va foue scoltey veih-my-cheilley;

³² As ren y thalloo fosley, as sluggey ad seose, as ny thieyn oc, as ooilley ny deiney va bentyn rish Korah, as ooilley’n chooid oc.

³³ Hie ad hene as ooilley ny va bentyn roo sheese bio ayns yn ooig, as haink y thalloo dy cheilley harrystoo: as ren ad cherraghtyn veih mastey’n pobble.

³⁴ As ren ooilley Israel, va mygeayrt-y-moo, chea ec yn eam oc: son dooyrt ad, Er-aggle dy jean y thalloo shinyn y lhuggey seose myrgeddin.

³⁵ As haink aile magh veih’n Chiarn, as losht eh seose yn daa cheead as jeih deiney as da-eed va chebbal incense.

³⁶ As loayr y Chiarn rish Moses, gra,

³⁷ Loayr rish Eleazar mac Aaron y saggyrt, dy gow eh seose ny censeryn ass y lossey, as skeayl uss yn aile ayns shid; son t’ad casherick.

³⁸ Censeryn ny peccee shoh noi ny anmeenyn oc hene, lhig daue ve jeant plaityn lhean dy choodaghey yn altar: son v’ad chebbit gys y Chiarn, shen-y-fa t’ad casherick: as bee ad son cowrey da cloan Israel.

³⁹ As ghow Eleazar yn saggyrt ny censeryn prashey, lhieu ren adsyn va losht chebbal; as v’ad jeant plaityn lhean son coodagh da’n altar:

⁴⁰ Dy ve son cooinaghtyn da cloan Israel, nagh jig joarree erbee, nagh vel jeh sluight Aaron, er-gerrey dy hebbal incense roish y Chiarn; nagh bee eh myr Korah, as e heshaght: myr dooyrt y Chiarn rish, liorish laue Voses.

⁴¹ Agh laa-ny-vairagh, ren ooilley sheshaght cloan Israel plaiynt noi Moses, as noi Aaron, gra, Ta shiu er stroie pobble y Chiarn.

⁴² As haink eh gy-kione, tra va’n cheshaght er nyn jaglym noi Moses as Aaron, dy ren ad jeeaghyn rish cabbane-agglish y cheshaght: as cur-my-ner, ren y bodjal coodaghey eh, as va gloyr y Chiarn ry-akin.

⁴³ As haink Moses as Aaron roish cabbane-agglish y cheshaght.

⁴⁴ As loayr y Chiarn rish Moses, gra,

⁴⁵ Scarr-jee shiu hene veih’n cheshaght shoh, dy jean-ym ad y stroie myr ayns tullogh: as huitt ad er nyn eddin.

⁴⁶ As dooyrt Moses rish Aaron, Gow censer, as cur aile ayn veih’n altar, as cur incense er, as immee dy tappee stiagh gys y cheshaght, as jean lhiasaghey er nyn son: son ta jymmoose er n’gholl magh veih’n Chiarn: ta’n chramp er ghoaill toshiaght.

⁴⁷ As ghow Aaron myr hug Moses sarey, as roie eh stiagh ayns mean y cheshaght; as cur-my-ner, va’n chramp er ghoaill toshiaght mastey’n pobble; as hug eh incense er, as ren eh lhiasaghey son y pobble.

⁴⁸ As hass eh eddyr ny merriu as ny bioee, as va’n chramp er ny chastey.

⁴⁹ Nish v’adsyn, hooar baase ’sy chramp, kiare thousaneyn jeig as shiaght cheead, cheu-mooie jeusyn hooar baase ayns cooish Chorah.

⁵⁰ As haink Aaron reesht gys Moses, gys dorrys chabbane-agglish yn cheshaght: as va’n chramp er ny chastey.