Earrooyn 15 - Yn Vible Casherick 1775 1819

CAB. XV

¹ As loayr y Chiarn rish Moses, gra,

² Loayr rish cloan Israel, as abbyr roo, Tra vees shiu er jeet ayns cheer nyn eiraght, ta mish kiarail dy choyrt diu.

³ As dy jean shiu oural lesh aile gys y Chiarn, chebbal-losht ny oural, ayns cooilleeney breearrey, ny ayns oural dy aigney-arryltagh, ny ayns nyn feaillaghyn casherick, son oural-millish roish y Chiarn, jeh’n chelloo ny jeh’n chioltane:

⁴ Eisht ver eshyn, ta chebbal gys y Chiarn, lesh oural-arran, omer dy flooyr mestit lesh yn chiarroo ayrn jeh hin dy ooil.

⁵ As yn chiarroo ayrn jeh hin feeyney son oural-jough nee oo kiarail, marish y chebbal-losht, ny oural, son un eayn:

⁶ Ny son rea, nee oo kiarail son oural-arran, yn wheiggoo ayrn jeh ephah dy flooyr mestit lesh yn trass ayrn jeh hin dy ooil ny-chione.

⁷ As son oural-jough, nee oo chebbal yn trass ayrn jeh hin dy feeyn son oural-millish da’n Chiarn.

⁸ As tra t’ou geddyn aarloo dow son chebbal-losht, ny son oural, ayns cooilleeney breearrey, ny oural-shee gys y Chiarn:

⁹ Eisht ver eh lesh marish y dow, oural-arran jeh three omeryn dy flooyr, lesh lieh hin dy ooil ny-chione.

¹⁰ As ver oo lhiat son oural-jough lieh hin dy feeyn, son chebbal jeant liorish aile, oural-millish gys y Chiarn.

¹¹ Myr shoh vees er ny yannoo son un dow, ny son un rea, ny son eayn, ny mannan.

¹² Rere yn earroo, nee shiu kiarail son oural, myr shoh nee shiu rish dagh unnane, cordail rish nyn earroo.

¹³ Nee dagh unnane ta ruggit ’sy cheer, ny cur’myn shoh y chooilleeney er yn aght shoh, ayns chebbal oural jeant lesh aile son soar millish roish y Chiarn.

¹⁴ As my vees joarree cummal ny mast’ eu, ny quoi-erbee vees ny mast’ eu ayns ny sheelogheyn eu, as aggindagh dy hebbal oural jeant liorish aile son soar millish roish y Chiarn; myr ta shiuish jannoo, myrgeddin nee eshyn.

¹⁵ Bee’n un oardagh er ny son euish jeh’n cheshaght, as myrgeddin er y hon-syn ta er e yoarreeaght mêriu, son oardagh kinjagh ayns ny sheelogheyn eu: myr ta shiuish, myr shen vees y joarree, fenish y Chiarn.

¹⁶ Bee un leigh, as un oardagh diuish, as dasyn t’er e yoarreeaght mêriu.

¹⁷ As loayr y Chiarn rish Moses, gra,

¹⁸ Loayr rish cloan Israel, as abbyr roo, Tra hig shiu ayns y cheer huggey ver-ym lhiam shiu,

¹⁹ Shen myr vees eh, tra ee-ys shiu arran y chied-vess jeh’n cheer, dy jean shiu chebbal oural-troggit-seose gys y Chiarn.

²⁰ Nee shiu chebbal berreen jeh toshiaght y theayst eu, son oural-troggit-seose: myr ta shiu jannoo rish oural-troggit-seose y laare-arroo, myr shen nee shiu troggal eh seose.

²¹ Jeh toshiaght y theayst eu ver shiu da’n Chiarn, oural dy ve troggit seose, ayns ny sheelogheyn eu.

²² As my ta shiu er n’yannoo marranys, as gyn er chur geill da ooilley ny oardaghyn shoh, ta’n Chiarn er loayrt rish Moses,

²³ Dy jarroo ooilley ny ta’n Chiarn er harey diu liorish laue Voses, veih’n laa hug y Chiarn sarey da Moses, as er-dy-henney, mastey ny sheelogheyn eu;

²⁴ Eisht my she shen, dy vel nhee erbee er ve jeant trooid mee-hushtey, as eh gyn-yss da’n pobble ec y traa; dy jean ooilley’n cheshaght chebbal un dow aeg son oural-losht, dy hoar millish roish y Chiarn, marish e oural-arran, as e oural-jough, cordail rish yn oardagh, as un vannan jeh ny goair son oural-peccah.

²⁵ As nee’n saggyrt lhiasaghey son ooilley sheshaght cloan Israel, as bee eh er ny leih daue, son trooid mee-hushtey ve: as ver ad lhieu yn chebbal oc, oural jeant lesh aile gys y Chiarn, as nyn oural son peccah roish y Chiarn, son yn vee-hushtey oc.

²⁶ As bee eh er ny leih da ooilley cheshaght cloan Israel, as da’n joarree ta ny mast’ eu; fakin dy row ooilley’n pobble fo mee-hushtey.

²⁷ As my nee persoon erbee peccah trooid mee-hushtey, eisht ver eh lesh minsheig jeh’n vleïn shen son oural-peccah.

²⁸ As nee’n saggyrt lhiasaghey ’yannoo son y persoon t’er n’yannoo peccah trooid mee-hushtey, fenish y Chiarn, dy yannoo lhiasaghey er e hon; as bee eh er ny leih da.

²⁹ Bee’n un leigh eu dasyn ta jannoo peccah trooid mee-hushtey, chammah dasyn ta ruggit mastey cloan Israel, as da’n joarree ta cummal ny-vud eu.

³⁰ Agh y persoon ta jannoo red erbee er e ghaanys, (edyr eh ve ruggit ’sy cheer, ny joarree) ta’n fer cheddin soiaghey beg jeh’n Chiarn; bee’n persoon shen er ny yiarey jeh veih mastey e phobble.

³¹ Son dy vel eh er hoiaghey beg jeh goo yn Chiarn, as er vrishey e harey; bee’n persoon shen dy bollagh er ny yiarey jeh: nee eh gymmyrkey e vee-chairys hene.

³² As ’sy traa va cloan Israel ’syn aasagh, hooar ad dooinney chaglym brasnagyn er y doonaght.

³³ As hug adsyn hooar eh chaglym brasnagyn, lhieu eh gys Moses as Aaron, as gys ooilley’n cheshaght.

³⁴ As hug ad eh ayns pryssoon, son nagh row eh er ny hoilshaghey, cre’n kerraghey ragh er.

³⁵ As dooyrt y Chiarn rish Moses, Bee’n dooinney, son shickyrys, er ny choyrt gy-baase; nee ooilley’n cheshaght eh y chlaghey cheu-mooie jeh’n champ.

³⁶ As hug ooilley’n cheshaght lhieu eh cheu-mooie jeh’n champ, as chlagh ad eh gy-baase; myr hug y Chiarn sarey da Moses.

³⁷ As loayr y Chiarn rish Moses, gra,

³⁸ Loayr rish cloan Israel, as oardee, dy der ad fringeyn er rhumbyllyn nyn gharmadyn, trooid ny sheelogheyn oc, as dy der ad er fringe ny rhumbyllyn rybban gorrym.

³⁹ As bee’n fringe diu son cowrey, dy vod shiu jeeaghyn er, as cooinaghtyn er ooilley saraghyn y Chiarn, as cooilleeney ad: as nagh jed shiu lurg nyn gree hene, as ny sooillyn eu hene, myr bollagh shiu goll er-shaghryn:

⁴⁰ Dy vod shiu cooinaghtyn er, as cooilleeney ooilley my haraghyn, as ve sleih casherick gys y Jee eu.

⁴¹ Mish y Chiarn y Jee eu, hug lhiam shiu ass cheer Egypt, dy ve nyn Yee: Mish y Chiarn y Jee eu.