Earrooyn 13 - Yn Vible Casherick 1775 1819

CAB. XIII

¹ As loayr y Chiarn rish Moses, gra,

² Cur uss deiney, dy ghoaill baght jeh cheer Chanaan, ta mish dy choyrt da cloan Israel: ass dagh tribe jeh ny ayraghyn oc ver shiu magh dooinney, dagh fer ny ard leeideilagh ny mast’ oc.

³ As ren Moses, liorish sarey’n Chiarn, ad y choyrt magh veih faasagh Paran: va ooilley ny deiney shen fir-reill cloan Israel.

⁴ As shoh va ny enmyn oc; Jeh tribe Reuben, Shammua mac Zacchur.

⁵ Jeh tribe Simeon, Shaphat mac Hori.

⁶ Jeh tribe Yudah, Caleb mac Jephunneh.

⁷ Jeh tribe Issachar, Igal mac Yoseph.

⁸ Jeh tribe Ephraim, Oshea mac Nun.

⁹ Jeh tribe Venjamin, Palti mac Raphu.

¹⁰ Jeh tribe Zebulun, Gaddiel mac Sodi.

¹¹ Jeh tribe Yoseph, ta shen, jeh kynney Vanasseh Gaddi mac Susi.

¹² Jeh tribe Dan, Ammiel mac Gemalli.

¹³ Jeh tribe Asher, Sethur mac Michael.

¹⁴ Jeh tribe Naphtali, Nahbi mac Vophsi.

¹⁵ Jeh tribe Ghad, Geuel mac Machi.

¹⁶ Shoh enmyn ny deiney hug Moses dy ghoaill baght jeh cheer Chanaan. As denmys Moses Oshea mac Nun, Jehoshua.

¹⁷ As hug Moses ad magh dy scrial dy follit cheer Chanaan, as dooyrt eh roo, Immee-jee seose yn raad shoh my-yiass; as gow-jee seose raad y clieau:

¹⁸ As gow-jee tastey jeh’n cheer, cre te, as y pobble ta cummal ayn, vel ad lajer, ny faase, beggan ny mooarane:

¹⁹ As cre ta’n thalloo t’ad cummal er, vel eh mie ny sie, as cre ta ny ard-valjyn t’ad cummal ayndoo, nee ayns cabbaneyn, ny cashtallyn lajer;

²⁰ As cre ta’n thalloo, vel eh messoil ny gennish, vel biljyn ayn mannagh vel; as bee-jee dunnal, as cur-jee lhieu jeh mess ny cheerey (nish va’n imbagh, va messyn ny biljyn-feeyney hoshiaght appee.)

²¹ Myr shen hie ad seose, as ronsee ad y cheer veih faasagh Zin, gys Rehob; myr ta sleih cheet gys Hamath.

²² As hie ad seose my-yiass, as haink ad gys Hebron; raad va Ahiman, Sheshai, as Talmai mec Anak (nish va Hebron troggit shiaght bleeaney roish Zoan ayns Egypt.)

²³ As haink ad gys coan Eshcol, as yiare ad veih shen un vanglane lesh dossan dy verrishyn-feeyney er, as hug ad lhieu eh eddyr jees, er lorg; as hug ad lhieu jeh ny pomegranateyn, as jeh ny figgyn.

²⁴ Va’n ynnyd er ny enmys coan Eshcol, er coontey thummyd ny berrishyn-feeyney, ren cloan Israel giarey sheese veih shen.

²⁵ As hyndaa ad veih goaill baght jeh’n cheer, ec kione da-eed laa.

²⁶ As jimmee ad, as haink ad gys Moses, as gys Aaron, as gys ooilley sheshaght cloan Israel, gys faasagh Paran, gys Kadesh; as hug ad lhieu fys huc, as gys ooilley’n cheshaght, as yeeagh ad daue mess y cheer.

²⁷ As hoilshee ad da, as dooyrt ad, Haink shin gys y cheer raad hug oo shin, as son shickyrys te palchey lesh bainney as mill; as shoh’n mess echey.

²⁸ Agh, ta cummaltee yn cheer deiney lajer, as ny ard-valjyn oc lesh voallaghyn mygeayrt-y-moo, as feer ard; as ny-sodjey, honnick shin ayns shen cloan Anak.

²⁹ Ta ny Amalekiteyn cummal ayns y cheer, my-yiass: as ta ny Hittiteyn, as ny Jebusiteyn, as ny Amoriteyn cummal ayns ny sleityn: as ta ny Canaaniteyn cummal er oirr ny marrey, as liorish slyst Yordan.

³⁰ As hug Caleb fea er y pobble, kiongoyrt rish Moses, as dooyrt eh, Lhig dooin goll seose jeeragh, as goaill dooin hene eh; son ta fort dy liooar ain dy gheddyn barriaght er.

³¹ Agh dooyrt ny deiney hie seose mârish, Cha jarg mayd goll seose noi’n pobble, son t’ad ny s’troshey na shinyn.

³² As hug ad lhieu drogh ghoo gys cloan Israel, jeh’n cheer v’ad er n’gholl dy scrial, gra, Ta’n cheer ny hrooid ta shin er n’gholl dy ghoaill baght jeh, cheer ta chion dy liooar da ny cummaltee hene; as ta ooilley’n sleih honnick shin ayn, deiney thollee.

³³ As ayns shen honnick shin foawir, mee Anak, sluight ny foawir: as va shin ayns y chilley ain hene myr beishteigyn, as myr shen va shinyn myrgeddin ’sy chilley ocsyn.