Earrooyn 12 - Yn Vible Casherick 1775 1819

CAB. XII

¹ As loayr Miriam as Aaron noi Moses, er coontey yn Ethiopian v’eh er phoosey; son v’eh er phoosey ben ass Ethiopia.

² As dooyrt ad, Vel y Chiarn er loayrt dy jarroo ny-lomarcan liorish Moses? nagh vel eh myrgeddin er loayrt liorinyn? As cheayll y Chiarn eh.

³ (Nish va Moses ny ghooinney feer vannee, erskyn ooilley ny deiney v’er eaghtyr y thallooin.)

⁴ As loayr y Chiarn dy siyragh rish Moses, as rish Aaron, as rish Miriam, Tar-jee magh nyn droor gys y chabbane-agglish. As haink ad nyn droor magh.

⁵ As haink y Chiarn neose ayns pillar yn vodjal, as hass eh ayns dorrys y chabbane-agglish, as deïe eh er Aaron as Miriam: as haink ad ny-neesht magh.

⁶ As dooyrt eh, Eaisht-jee nish rish my ghoan; My ta phadeyr ny mast’ eu, Mish y Chiarn, nee soilshaghey mee hene da ayns ashlish, as loayr-ym rish aym’s dreamal.

⁷ Cha nee myr shen rish my harvaant Moses, ta firrinagh ayns ooilley my hie.

⁸ Rishyn nee’m loayrt beeal ry beeal, ta shen, dy foshlit: cha nee ayns raaghyn dorraghey; as co-chaslys jeh’n Chiarn ver eh my-ner; cre’n-oyr eisht, nagh row aggle erriu, dy loayrt noi my harvaant Moses?

⁹ As va corree’n Chiarn brasnit nyn ’oï, as jimmee eh roish.

¹⁰ As ren y bodjal troggal jeh’n chabbane-agglish, as cur-my-ner, haink Miriam dy ve louraanagh, gial myr sniaghtey: as yeeagh Aaron er Miriam, as cur-my-ner v’ee louraanagh.

¹¹ As dooyrt Aaron rish Moses, Aless, my hiarn! ta mee guee ort, my cur y peccah shoh nyn lieh, ta shin dy ommijagh er ve kyndagh jeh, as liorish ta shin er n’yannoo peccah.

¹² Ny lhig ee ve myr y varroo; ta’n eill echey lieh-mow, tra t’eh cheet ass breïn e vayrey.

¹³ As ghow Moses padjer gys y Chiarn, gra, Jean ee y lheihys nish, O Yee, ta mee guee ort.

¹⁴ As dooyrt y Chiarn rish Moses, Dy beagh yn ayr eck er cheau shelley ’syn eddin eck, nagh beagh nearey er ve urree son shiaght laa? lhig ee ve er ny scarrey veih’n cheshaght son shiaght laa, as lurg shen lhig ee ve goit stiagh reesht.

¹⁵ As va Miriam currit magh ass y champ son shiaght laa: as cha jagh yn pobble er nyn doshiaght, derrey va Miriam er ny ghoaill stiagh reesht.

¹⁶ As lurg shen ren y pobble scughey veih Hazeroth, as ren ad campal ayns faasagh Paran.