Earrooyn 10 - Yn Vible Casherick 1775 1819

CAB. X

¹ As loayr y Chiarn rish Moses, gra,

² Jean dhyt daa hrumpet argid; jeh un pheesh slane nee oo ad; dy vod oo ymmyd y yannoo jeu dy haglym y pobble cooidjagh, as son jurnah ny cabbaneyn.

³ As tra nee ad sheidey lhieu, nee ooilley’n cheshaght chaglym ad hene cooidjagh hood’s, ec dorrys y chabbane-agglish.

⁴ As my heidys ad agh lesh un trumpet, eisht nee ny princeyn, ta leeideilee thousaneyn Israel, chaglym ad hene hood’s.

⁵ Tra ta shiu sheidey larm-caggee, eisht nee adsyn ta campal er y cheu-har scughey er nyn doshiaght.

⁶ Tra ta shiu sheidey larm y nah cheayrt, eisht nee adsyn ta campal er y jiass, goll er nyn yurnah; nee ad sheidey larm son ny jurnaaghyn oc.

⁷ Agh tra ta’n cheshaght dy ve er ny haglym dy cheilley; nee shiu sheidey, agh cha jean shiu sheidey larm-caggee.

⁸ As nee mec Aaron y saggyrt sheidey lesh ny trumpetyn, as bee ad diu son oardagh son dy bragh, trooid ny sheelogheyn eu.

⁹ As my hed shiu gys caggey ayns y cheer eu hene, noi’n noid ta jannoo tranlaase erriu, eisht nee shiu sheidey larm-caggee lesh ny trumpetyn; as nee’n Chiarn y Jee eu cooinaghtyn erriu, as bee shiu er nyn sauail veih nyn noidyn.

¹⁰ Myrgeddin er laa’n ghennallys eu, as er ny laghyn feailley eu, as ayns toshiaght ny meeaghyn eu, nee shiu sheidey lesh ny trumpetyn harrish ny chebballyn-losht eu; as harrish ny ourallyn-shee eu; dy vod shoh ve diu son cooinaghtyn roish y Jee eu: Mish y Chiarn y Jee eu.

¹¹ As haink eh gy-kione er y feedoo laa jeh’n nah vee, ayns y nah vleïn, dy row’n bodjal er ny ghoaill seose jeh cabbane y chonaant.

¹² As ghow cloan Israel nyn yurnah magh ass faasagh Sinai; as hass y bodjal ayns faasagh Paran.

¹³ As ghow ad toshiaght er nyn yurnah, cordail rish sarey’n Chiarn, liorish Moses.

¹⁴ ’Sy toshiaght hie cullee camp cloan Yudah, cordail rish ny sheshaghtyn-caggee oc: as harrish y cheshaght shoh va Nahshon mac Amminadab.

¹⁵ As harrish sheshaght-caggee tribe cloan Issachar, va Nethaneel mac Zuar.

¹⁶ As harrish sheshaght tribe cloan Zebulun, va Eliab mac Helon.

¹⁷ As va’ n cabbane-agglish er ny ghoaill seose; as hie mec Ghershon, as mec Merari, er nyn doshiaght, gymmyrkey yn chabbane-agglish.

¹⁸ As ren cullee champ Reuben scughey er y hoshiaght, cordail rish ny sheshaghtyn oc, as harrish yn cheshaght shoh va Elizur mac Shedeur.

¹⁹ As harrish sheshaght-caggee tribe cloan Simeon, va Shelumiel mac Zurishaddai.

²⁰ As harrish sheshaght tribe cloan Ghad, va Eliasaph mac Deuel.

²¹ As hie ny Kohathiteyn er nyn doshiaght, cur lhieu yn arg casherick; as ren y vooinjer elley soiaghey seose yn chabbane-agglish ry-hoi harragh ad.

²² As hie cullee camp cloan Ephraim er y hoshiaght, cordail rish ny sheshaghtyn oc; as harrish y cheshaght shoh va Elishama mac Ammihud.

²³ As harrish sheshaght tribe cloan Vanasseh, va Gamaliel mac Pedahzur.

²⁴ As harrish sheshaght tribe cloan Venjamin, va Abidan mac Gideoni.

²⁵ As hie cullee camp cloan Dan er y hoshiaght, va er cooyl ooilley ny campyn, trooid ny sheshaghtyn oc: as harrish y cheshaght shoh va Ahiezer mac Amishaddai.

²⁶ As harrish sheshaght tribe cloan Asher, va Pagiel mac Ocran.

²⁷ As harrish camp tribe cloan Naphtali, va Ahira mac Enan.

²⁸ Shoh myr va jurnaaghyn cloan Israel, cordail rish ny sheshaghtyn-caggee oc, tra hie ad er nyn doshiaght.

²⁹ As dooyrt Moses rish Hobab, mac Raguel yn Midianite, ayr-’sy-leigh Voses, Ta shinyn er nyn yurnah gys yn ynnyd, mychione dooyrt y Chiarn, Ver-yms diuish eh: tar uss mârin, as bee mayd mie rhyt: son ta’n Chiarn er loayrt dy mie mychione Israel.

³⁰ As dooyrt eh rish, Cha voddym goll mêriu; agh hem roym gys my heer, as my chynney hene.

³¹ As dooyrt eh rish, Ny faag shin, ta mee guee ort; son dy vel toiggal ayd’s kys ta shin dy champal ’syn aasagh, as dy vod uss ve dooinyn ayns ynnyd sooillyn.

³² As bee eh myr shen, my she dt’aigney dy gholl mârin, dy jarroo shen myr vees eh, yn chenjallys nee’n Chiarn y hoilshaghey dooinyn, y lheid cheddin nee mayd er dty hon’s.

³³ As hie ad rhymboo veih slieau’n Chiarn jurnah three laa: as hie arg chonaant y Chiarn er y raad roue, ’sy jurnah oc dy hree laa, dy gheddyn magh daue ynnyd dy hannaghtyn ayn.

³⁴ As va bodjal y Chiarn harrystoo ’sy laa, tra hie ad magh ass y champ.

³⁵ As haink eh gy-kione tra scugh yn arg er y hoshiaght, dy dooyrt Moses, Irree seose, Hiarn, as lhig da dty noidyn ve er nyn skeayley; as lhig dauesyn ta dwoaie oc ort, chea kiongoyrt rhyt.

³⁶ As tra ve soit, dooyrt eh, Chyndaa, O Hiarn, gys ny ymmodee thousaneyn dy housaneyn Israel.