Deuteronomy 21 - Yn Vible Casherick 1775 1819

CAB. XXI

¹ My vees dooinney er ny gheddyn ny lhie marroo ’sy vagher, ayns y cheer ta’n Chiarn dty Yee coyrt dhyt son dty eiraght, as nagh vel fys quoi varr eh:

² Eisht hig dty hanstyr as dty vriwnyn magh, as nee ad towse gys ny ard-valjyn mygeayrt-y-mysh y varroo.

³ As nee shanstyr yn ard-valley shen, ta by-niessey da’n dooinney marroo, colbagh y ghoaill nagh row rieau obbrit, ny er hayrn ’sy whing.

⁴ As ver shanstyr yn ard-valley shen lhieu sheese yn cholbagh gys glione reeastaneagh, nagh vel traaueit, ny cuirt, as ver ad y kione jeh’n cholbagh ayns shen ’sy ghlione.

⁵ As hig ny saggyrtyn mec Levi er-gerrey (son adsyn ta’n Chiarn dty Yee er reih dy hirveish da, as dy vannaghey ayns ennym y Chiarn) as liorish y vriwnys ocsyn vees dy chooilley streeu, as dy chooilley vuilley er ny reaghey.

⁶ As nee ooilley shanstyr yn ard-valley shen by-niessey da’n varroo, niee nyn laueyn erskyn y cholbagh ta’n chione goit j’ee ’sy ghlione.

⁷ As nee ad gra, Cha vel ny laueyn ain er gheayrtey yn uill shoh, chamoo ta ny sooillyn ain er vakin eh.

⁸ Bee myghinagh, O Hiarn, da dty phobble Israel, t’ou er livrey, as ny cur fuill gyn-loght gys lieh dty phobble Israel. As bee’n uill er ny leih daue.

⁹ Myr shoh ver oo ersooyl loght fuill neu-chyndagh veih ny mast’ eu, tra nee oo shen ny ta cairagh ayns shilley’n Chiarn.

¹⁰ Tra t’ou goll magh dy chaggey noi dty noidyn, as ta’n Chiarn dty Yee er livrey ad gys dty laue, as t’ou er ghoaill ad nyn gappee.

¹¹ As t’ou fakin mastey ny cappeeyn ben aalin, as dy vel graih ayd urree, dy ve dty ven:

¹² Eisht ver oo lhiat ee gys dty hie, as nee oo baarey’n chione eck, as giarey e yngnyn.

¹³ As ver ee coamrey e cappeeys j’ee as nee ee tannaghtyn ayns dty hie, as dobberan son e ayr as e moir slane mee, as maghey shen, nee oo goaill ee, as bee oo son dooinney jeeish, as bee ish son ben dhyt’s.

¹⁴ As mannagh bee taitnys ayd aynjee, nee oo lhiggey j’ee goll raad saillee, agh cha greck oo ee edyr son argid; ny jannoo marchantys j’ee, son dy vel oo er n’injillaghey ee.

¹⁵ My vees daa ven ec dooinney, as graih smoo echey er y derrey yeh na er y jeh elley, as ad ny-neesht er n’ymmyrkey cloan da, as my ta’n mac shinney lh’eeish sloo ta graih echey urree:

¹⁶ Eisht tra t’eh rheynn e chooid er e vec, cha jean eh eirey jeh mac y ven bare bynney lesh, roish mac y ven elley, ta’n eirey cair.

¹⁷ Agh nee eh goaill rish y mac eck’s sloo bynney lesh, dy ve yn eirey, liorish coyrt da ayrn dooble jeh ooilley ny t’echey: son toshiaght e niart eh: ta cairys eiraght echey.

¹⁸ My ta mac roonagh as mee-viallagh ec dooinney, nagh der geill da coyrle e ayrey, ny coyrle e vayrey, as lurg daue v’er smaghtaghey eh, nagh der eh biallys daue:

¹⁹ Nee eisht e ayr as e voir greme y ghoaill er, as ver ad lhieu eh fenish shanstyr e ard-valley, as gys giat ny quaallagh:

²⁰ As jir ad rish shanstyr e ard-valley, T’eh shoh nyn mac roonagh, as mee-viallagh, cha n’eaisht eh rish nyn goraa; t’eh ny ghlutterey as meshteyllagh.

²¹ As nee ooilley deiney e ard-valley claghey eh dy baase: myr shen ver oo yn olk ersooyl veih ny mast’ eu, as nee ooilley Israel clashtyn as goaill aggle.

²² As my ta dooinney er n’yannoo peccah ta toilchin baase, as faagit magh son baase, as eh ’ve croghit er billey:

²³ Cha n’aag oo e chorp fud-ny-hoie er y villey, agh nee oo, son shickyrys, eh y oanluckey yn laa cheddin (son t’eshyn t’er ny chroghey fo mollaght veih Jee) nagh bee dty heer fo loght, ta’n Chiarn dty Yee coyrt dhyt son eiraght.