Colossianee 3 - Yn Vible Casherick 1775 1819

CAB. III

¹ My ta shiuish eisht er n’irree marish Creest, shir-jee ny reddyn shen ta er-nyn-skyn, raad ta Creest ny hoie er laue yesh Yee.

² Soie-jee nyn aignaghyn er reddyn flaunyssagh, as cha nee er reddyn thallooinagh:

³ Son ta shiu marroo, as ta’n vea eu follit marish Creest ayns Jee.

⁴ Tra vees Creest, ta’n vea ain, er ny hoilshaghey, eisht nee shiuish neesht cheet kionfenish mârishyn ayns gloyr.

⁵ Smaghtee-jee er-y-fa shen ny oltyn thallooinagh eu; maarderys, neu-ghlennid, yeearree neu-chooie, drogh vian, as saynt seihltagh, ta dy chur ammys da jallooyn:

⁶ Kyndagh rish ny reddyn shoh ta jymmoose Yee cheet er y chloan dy vee-viallys.

⁷ Ayndoo hug shiu myrgeddin raad diu hene ayns y traa t’er n’gholl shaghey, tra ren shiu baghey ny-vud oc.

⁸ Agh nish cur-jee shiuish myrgeddin veue ooilley ny reddyn shoh; corree, jymmoose, goanlys, goan mollaghtagh, glare neu-ghlen ass nyn meeal.

⁹ Ny jean-jee breg ry-cheilley, fakin dy vel shiu er chur j’iu yn chenn ghooinney marish e obbraghyn;

¹⁰ As dy vel shiu er chur erriu yn dooinney noa, ta er ny yannoo ass-y-noa ayns tushtey, lurg y co-chaslys echeysyn ren eshyn y chroo.

¹¹ Mârishyn cha vel edyr Greek ny Hew, giarey-chymmylt ny an-ghiarey-chymmylt, Barbarian, Scythian, sharvaant ny seyr: agh ta Creest ooilley, as ayns ooilley.

¹² Cur-jee erriu er-y-fa shen (myr cloan reiht Yee, casherick as graihagh) meeaghyn dy vyghin, kenjallys, injillid-aigney, meenid, surranse-foddey;

¹³ Gymmyrkey yn derrey yeh lesh y jeh elley, as leih da ’cheilley, my ta dooinney erbee as streeu echey rish fer elley; dy jarroo myr ta Creest er leih diuish, myr shen myrgeddin jean-jee shiuish leih dauesyn.

¹⁴ As erskyn ooilley ny reddyn shoh, cur-jee erriu graih, ta’n eer kiangley dy oays firrinagh.

¹⁵ As lhig da shee Yee reill ayns ny creeaghyn eu, huggey myrgeddin ta shiu er nyn eam ayns un chorp; as bee-jee booisal.

¹⁶ Lhig da goo Chreest tannaghtyn ayndiu dy palchey ayns dy chooilley chreenaght; gynsaghey as coyrlaghey yn derrey yeh yn jeh elley ayns psalmyn, as arraneyn-moyllee as spyrrydoil, goaill arrane lesh grayse ayns nyn greeaghyn gys y Chiarn.

¹⁷ As cre-erbee ta shiu gra ny jannoo, jean-jee ooilley ayns ennym y Chiarn Yeesey, coyrt booise da Jee dy jarroo yn Ayr ny hrooidsyn.

¹⁸ Shiuish vraane-poost, jean-jee shiu hene y injillaghey gys ny deiney-poost eu hene, myr te cooie ayns y Chiarn.

¹⁹ Gheiney-poost, cur-jee graih da ny mraane eu, as ny bee-jee sharroo nyn ’oï oc.

²⁰ Chloan, cur-jee biallys da nyn ayr as nyn moir ayns dy chooilley nhee: son ta shoh booisal da’n Chiarn.

²¹ Ayraghyn, ny jean-jee nyn gloan y vrasnaghey, er-aggle dy gaill ad nyn gree.

²² Harvaantyn, bee-jee biallagh ayns dy chooilley nhee da nyn mainshteryn seihltagh; cha nee lesh shirveish-sooilley, myr dy wooiys deiney, agh ayns firrinys cree, goaill aggle roish Jee:

²³ As cre-erbee ta shiu dy yannoo, jean-jee eh dy creeoil, myr da’n Chiarn, as cha nee da deiney;

²⁴ Toiggal dy nee veih’n Chiarn yiow shiu yn leagh dy eiraght: son ta shiu shirveish yn Chiarn Creest.

²⁵ Agh eshyn ta jannoo aggair, bee eh cooilleenit son yn aggair t’eh er n’yannoo: as cha vel Jee jannoo soiagh jeh persoonyn.