Briwnyn 17 - Yn Vible Casherick 1775 1819

CAB. XVII

¹ As va dooinney dy row jeh slieau Ephraim, yn ennym echey va Micah.

² As dooyrt eh rish e voir, Yn un cheead jeig shekel dy argid, v’er ny gheid voïd, mychione ghwee oo mollaght, as loayr oo jeh ayns my chlashtyn, cur-my-ner, ta’n argid aym’s; mish ghow eh. As dooyrt e voir, Bannit dy row uss veih’n Chiarn, my vac.

³ As tra v’eh er livrey yn un cheead jeig shekel dy argid da e voir, dooyrt e voir, Va mee er chasherickey yn slane argid shen gys y Chiarn, veih my laue, gour my vac, dy yannoo jalloo grainnit, as jalloo lheït: nish er-y-fa shen, ta mee dy choyrt dhyt eh reesht.

⁴ Agh cha goghe eh yn argid veih e voir, as ghow e voir daa cheead shekel jeh’n argid, as hug ee ad da’n obbree, ren jalloo grainnit jeh, as jalloo lheït: as v’ad ayns thie Micah.

⁵ As va ec Micah cabbal ayns e hie, as ren eh ephod, as teraphim, as ren eh fer jeh e vec y chasherickey, dy ve ny haggyrt da.

⁶ Ayns ny laghyn shoh cha row ree ayns Israel, agh ren dy chooilley ghooinney myr baillish hene.

⁷ As va dooinney aeg dy row veih Beth-lehem-judah, jeh sluight Yudah, va ny Levite, as v’eh er e yoarreeaght ayns shen.

⁸ As hie yn dooinney magh veih ard-valley Beth-lehem-judah dy chummal raad share oddagh eh: as haink eh gys cronk Ephraim, gys thie Micah, myr v’eh er e yurnah.

⁹ As dooyrt Micah rish, Cre veih haink oo? As dooyrt eh, Ta mish my Levite veih Beth-lehem-judah, as ta mee goll er my yoarreeaght raad share yioym.

¹⁰ As dooyrt Micah rish, Jean cummal mârym’s, as bee dou son ayr as saggyrt, as ver-yms dhyt jeih shekelyn argid ’sy vleïn, as daa chaghlaa garmad, as dty veaghey. Myr shen hie yn Levite stiagh.

¹¹ As va’n Levite booiagh cummal marish y dooinney, as va’n dooinney aeg mârish myr fer jeh e vec hene.

¹² As ren Micah yn Levite y chasherickey, as va’n dooinney aeg ny haggyrt ayns thie Micah.

¹³ Eisht dooyrt Micah, Nish ta fys aym dy jean y Chiarn m’y vannaghey, fakin dy vel Levite aym dy ve my haggyrt.