Ashlish 20 - Yn Vible Casherick 1775 1819

CAB. XX

¹ As honnick mee ainle cheet neose veih niau, lesh ogher yn diunid gyn-grunt, as geuley mooar ayns e laue.

² As haare eh greme er y dragon yn chenn ard-nieu shen, ta’n jouyl as Satan, as ren eh eh y chiangley son thousane bleïn,

³ As hilg eh eh ayns y diunid gyn-grunt, as yeigh eh seose eh, as hug eh seal er, nagh jinnagh eh molley ny ashoonyn arragh, derrey veagh y thousane bleïn ec kione: as ny lurg shen, shegin da ve feayshlit son traa giare.

⁴ As honnick mee stuill-reeoil, as hoie ad orroo, as va briwnys er ny choyrt daue: as honnick mee ny anmeenyn ocsyn va’n kione goit jeu son gymmyrkey feanish da Yeesey, as er coontey goo Yee, as nagh row er choyrt ooashley da’n veisht ny da e yalloo, chamoo va er ghoaill e chowrey er glaare nyn eddinyn, ny er nyn laueyn; as v’ad bio as reill marish Creest thousane bleïn.

⁵ Agh cha ren y chooid elley jeh ny merriu bioghey reesht derrey va’n thousane bleïn ec kione. Shoh yn chied irree-seose-reesht.

⁶ Maynrey as casherick t’eshyn ta ayrn echey ayns y chied irree-seose-reesht: orroo shoh cha vel pooar ec y nah vaase, agh bee ad saggyrtyn Yee, as Chreest, as nee ad reill marish son thousane bleïn.

⁷ As tra ta ny thousane bleïn ec kione, bee Satan er ny eaysley ass e phryssoon.

⁸ As hed eh magh dy volley ny ashoonyn t’ayns ny kiare ayrnyn jeh’n theihll, Gog as Magog, dy haglym ad dy cheilley gys caggey: nyn earroo ta myr genniagh ny marrey.

⁹ As hie ad seose er lheead ny hooirey, as chruinnee ad camp ny nooghyn er dy chooilley heu, as yn ard-valley casherick: as haink aile neose ass niau veih Jee, as stroie eh ad.

¹⁰ As va’n jouyl ren ad y volley, er ny hilgey ayns y logh dy aile as brimstone, raad ta’n veisht as y phadeyr foalsey, as bee ad er nyn dorchaghey oie as laa son dy bragh as dy bragh.

¹¹ As honnick mee stoyl-reeoil mooar gial, as eshyn va ny hoie er, veih e enish ren niau as thalloo chea ersooyl, as cha row ynnyd ry-gheddyn er nyn son.

¹² As honnick mee ny merriu, beg as mooar, nyn shassoo fenish Yee; as va ny lioaryn foshlit: as va lioar elley foshlit, ta lioar y vea: as va ny merriu er nyn mriwnys liorish ny reddyn shen va scruit ayns ny lioaryn, cordail rish nyn obbraghyn.

¹³ As livrey yn aarkey seose ny merriu v’aynjee, as ren y baase as yn oaie adsyn y livrey seose v’ayndoo: as va dy chooilley ghooinney er ny vriwnys cordail rish e obbraghyn.

¹⁴ As va’n baase as yn oaie er nyn dilgey ayns y logh dy aile: Shoh’n nah vaase.

¹⁵ As quoi-erbee nagh row ry-gheddyn scruit ayns lioar y vea, v’ad er nyn dilgey ayns y logh dy aile.