Amos 4 - Yn Vible Casherick 1775 1819

CAB. IV

¹ Eaisht-Jee rish yn ockle shoh, shiuish ollagh Vashan, t’ayns slieau Samaria, ta jannoo tranlaase er ny boghtyn, ta broo ny ymmyrchee, ta gra rish nyn mainshtyryn, Cur-jee lhieu, as lhig dooin giu.

² Ta’n Chiarn Jee er vreearrey liorish e chasherickys, Cur-my-ner, hig ny laghyn erriu, dy jean eh goaill shiu ersooyl lesh dooanyn, as yn sluight eu lesh croaganeyn-eeastee.

³ As hed shiu magh er ny doarlishyn, dy chooilley vooa jeeragh ro-ee, as bee shiu eiyrit gys y woaillee, ta’n Chiarn dy ghra.

⁴ Tar-jee gys Beth-el, as cur-jee rish peccah, ec Gilgal niartee-jee nyn beccah; as cur-jee lhieu nyn ourallyn dy chooilley voghrey, as ny jagheenyn eu lurg three bleeantyn.

⁵ As cheb-jee oural dy hoyrt-booise lesh arran casherick, as jean-jee fockley as soiaghey magh ny ourallyn-arryltagh; son shoh by-haittin lhieu, O shiuish chloan Israel, ta’n Chiarn Jee dy ghra.

⁶ As ta mee myrgeddin er choyrt diu glennid feeacklyn, ayns ooilley nyn ard-valjyn, as genney arran ayns ooilley nyn gummallyn: ny-yeih, cha vel shiu er hyndaa hym’s, ta’n Chiarn dy ghra.

⁷ As myrgeddin ta mee er lhiettal yn fliaghey veue, tra ta foast three meeaghyn gys yn ouyr, as hug mee fliaghey er un ard-valley, as cha dug mee fliaghey er ard-valley elley: huitt fliaghey er un vagher, as ren y magher fioghey nagh daink fliaghey er.

⁸ Myr shen ren ghaa ny three dy ard-valjyn rouail gys un ard-valley, dy gheddyn ushtey; agh cha row ad jeant magh: ny-yeih cha vel shiu er hyndaa hym’s, ta’n Chiarn dy ghra.

⁹ Ta mee er woalley shiu lesh fowan as millchea; tra ren nyn gharaghyn, as nyn gharaghyn-feeyney, as nyn miljyn-figgagh, as nyn miljyn-olive bishaghey, ren yn veishteig-loauee ad y stroie: ny-yeih, cha vel shiu er hyndaa hym’s, ta’n Chiarn dy ghra.

¹⁰ Ta mee er choyrt ny mast’ eu yn chramp, myr hug mee eh er Egypt: ny deiney aegey eu ta mee er varroo lesh y chliwe, as er ghoaill ersooyl ny cabbil eu, as ta mee er choyrt er smoghan ny campyn dy heet seose gys ny stroanyn eu: ny-yeih cha vel shiu er hyndaa hym’s, ta’n Chiarn dy ghra.

¹¹ Ta mee er hilgey paart j’iu bun-ry-skyn, myr ren Jee rish Sodom as Gomorrah, as va shiu myr stoo saueit ass yn aile: ny-yeih, cha vel shiu er hyndaa hym’s, ta’n Chiarn dy ghra.

¹² Shen-y-fa, shoh myr neem’s rhyt, O Israel: as er-yn-oyr, dy jean-ym shoh rhyt, fow aarloo dy gholl quail dty Yee, O Israel.

¹³ Son cur-my-ner, eshyn ta cummey ny sleityn, as croo yn gheay, as soilshaghey da dooinney, cre ta e smooinaght, ta jannoo yn moghrey dorraghys, as shooyl er ard-ynnydyn y thallooin, yn Chiarn, Jee ny flaunyssee, yn ennym echey.