2 Reeaghyn 4 - Yn Vible Casherick 1775 1819

CAB. IV

¹ Nish deïe ben dy row jeh mraane mec ny phadeyryn gys Elisha, gra, Ta dty harvaant my heshey marroo; as ta fys ayd’s dy row dty harvaant ayns aggle y Chiarn: as ta’n eeaseyder er jeet dy ghoaill da hene my ghaa vac dy ve e harvaantyn bondee.

² As dooyrt Elisha r’ee, Cre nee’m er dty hon? insh dou: cre t’ayd ’sy thie? as dooyrt ee, Cha vel nhee erbee ec dty harvaant ’sy thie agh saagh dy ooil.

³ Eisht dooyrt eh, Immee as eeasee dhyt siyn veih ooilley dty naboonyn mygeayrt, eer siyn follym; eeasee whilleen as oddys oo.

⁴ As tra hig oo stiagh, nee oo yn dorrys y yeigh ort hene as er dty vec, as nee oo theaymey magh ayns ooilley ny siyn shen, as ver oo dy lhiattee shen ny vees lane.

⁵ Myr shen hie ee rhymbee, as yeigh ee yn dorrys urree hene, as er e mec, hug lhieu ny siyn, as ren ee deayrtey magh.

⁶ As haink eh gy-kione, tra va ny siyn lane, dy dooyrt ee rish e mec, Cur-jee lhieu foast hym saagh elley. As dooyrt ad r’ee, Cha vel saagh arragh ayn. As scuirr yn ooil dy vishaghey.

⁷ Eisht haink ee, as dinsh ee da’n dooinney dy Yee: as dooyrt eh, Gow, as creck yn ooil, as eeck dty lhiastyn, as jean uss as dty chloan beaghey er y fooilliagh.

⁸ As haghyr eh er laa dy row, dy jagh Elisha gys Shunem, raad va ben ooasle; as ren ee cuirrey eh dy ghoaill beaghey. As myr shen ve, cha mennick as hie eh shaghey, dy hyndaa eh stiagh dy ghoaill beaghey.

⁹ As dooyrt ee rish e sheshey, cur-my-ner nish, ta mee cur tastey dy nee dooinney casherick dy Yee eh shoh, ta cha mennick goll shaghey.

¹⁰ Lhig dooin, ta mee guee ort, shamyr veg y yannoo er y voalley, as soiaghey seose ayns shen er e hon lhiabbee, as boayrd, stoyl, as kainlere; tra hig eh nyn raad, dy vod eh goaill aaght ayns shen.

¹¹ As haghyr eh er laa dy row, dy daink eh gys shen, as hie eh stiagh ’sy chiamyr, as ghow eh aaght ayn.

¹² As dooyrt eh rish Gehazi e harvaant, Eïe er y Shunammite shoh. As tra v’eh er n’eamagh urree, hass ee kiongoyrt rish.

¹³ As dooyrt eh rish, Abbyr nish r’ee, Cur-my-ner, fakin dy vel oo er ghoaill ooilley’n chiarail shoh er nyn son; cre ta dy ve jeant er dty hon? nailt’s shin dy loayrt er dty hon rish y ree, ny rish ard-chaptan y cheshaght-chaggee? As dreggyr ee, Ta mee cummal mastey my phobble hene.

¹⁴ As dooyrt eh, Cre ta eisht dy ve jeant er e son? As dreggyr Gehazi, Cur-my-ner, cha vel lhiannoo eck, as ta’n sheshey eck shenn.

¹⁵ As dooyrt eh, Eïe urree; as tra v’eh er n’eamagh urree, hass ee ec y dorrys.

¹⁶ As dooyrt eh, Veih’n imbagh shoh ayns y traa cooie, nee uss mac y ymmyrkey. As dooyrt ee, Guee-ym ort, my hiarn, uss ghooinney dy Yee, ny jean craidey mysh dty harvaant.

¹⁷ As ren y ven giennaghtyn, as dymmyrk ee mac ec yn imbagh shen, cordail rish y traa va Elisha er n’insh jee jeh.

¹⁸ As tra va’n lhiannoo er n’aase, haghyr eh er laa, dy jagh eh magh gys e ayr, ec ny beayneeyn.

¹⁹ As dooyrt eh rish e ayr, My chione, my chione! As dooyrt eh rish scollag, Cur lhiat eh gys e voir.

²⁰ As erreish da v’er ghoaill eh, as er chur lesh eh gys e voir, hoie eh er e glioonyn derrey’n vun-laa, as eisht phaart eh.

²¹ As hie ee seose, as hug ee eh nyn lhie er lhiabbee’n dooinney dy Yee, as yeigh ee yn dorrys er, as hie ec magh.

²² As deïe ee gys e sheshey, as dooyrt ee, Cur hym, ta mee guee ort, fer jeh ny deiney aegey, as unnane jeh ny assylyn, dy voddym roie gys y dooinney dy Yee, as cheet reesht.

²³ As dooyrt eh, Cre’n-oyr t’ayd er gholl huggey jiu? cha nee eayst-noa t’ayn, ny doonaght. As dooyrt ee, Bee ooilley dy mie.

²⁴ As yeelt ee assyl, as dooyrt ee rish e sharvaant, Eiyr, as cur er dty hoshiaght; ny lhaggee dty imman er my hon’s, mannagh jir-ym rhyt.

²⁵ Myr shen hie ee, as haink ee gys y dooinney dy Yee gys cronk Carmel. As shen myr ve, tra honnick yn dooinney dy Yee ee foddey jeh, dy dooyrt eh rish Gehazi e harvaant, Cur-my-ner, she yn Shunammite:

²⁶ Roie nish, ta mee guee ort, ny quail; as abbyr r’ee, Vel eh dy mie mayrt? vel dty heshey dy mie? vel dty lhiannoo dy mie? As dreggyr ee, Myr shen.

²⁷ As tra v’ee er jeet gys y dooinney dy Yee er y chronk, huitt ee sheese ec e chassyn: agh haink Gehazi er-gerrey dy choyrt voish ee. As dooyrt y dooinney dy Yee, Faag ee: ta’n annym eck seaghnit cheu-sthie j’ee; as ta’n Chiarn er cheiltyn shoh voym’s, as cha vel eh er n’insh dou.

²⁸ Eisht dooyrt ee, Ren mish mac y yeearree jeh my hiarn? nagh dooyrt mee, Ny jean m’y volley?

²⁹ Eisht dooyrt eh rish Gehazi, Kiangle seose dty veeghyn, as gow my lorg ayns dty laue, as immee royd: my veeitys oo dooinney erbee, ny loayr rish; as my nee dooinney erbee, ny loayr rish; as my nee dooinney erbee loayrt rhyt’s, ny fuirree dy choyrt ansoor da: as lhie my lorg er eddin y lhiannoo.

³⁰ As dooyrt moir y lhiannoo, Myr ta’n Chiarn bio, as myr ta dt’annym’s bio, cha vaag-yms oo As hrog eh er, as deiyr eh urree.

³¹ As hie Gehazi er e hoshiaght rhymboo, as lhie eh yn lorg er eddin y lhiannoo; agh cha row coraa, ny clashtyn: shen-y-fa hyndaa eh dy gholl ny whail, as dinsh eh da, gra, Cha vel y lhiannoo er ghoostey.

³² As tra va Elisha er jeet stiagh ’sy thie, cur-my-ner, va’n lhiannoo marroo, as ny lhie er e lhiabbee.

³³ Hie eh stiagh, er-y-fa shen, as yeigh eh yn dorrys orroo hene ny-neesht, as ghuee eh gys y Chiarn.

³⁴ As hie eh seose, as lhie eh er y lhiannoo, as hug eh e veeal er beeal y lhiannoo, as e hooillyn er ny sooillyn echey, as heeyn eh eh-hene er y lhiannoo; as haink chiass ayns feill y lhiannoo.

³⁵ Eisht hyndaa eh, as huill eh noon as noal ayns y thie; as hie eh seose, as heeyn eh eh-hene er: as ren y lhiannoo streghernee shiaght keayrtyn, as doshil y lhiannoo e hooillyn.

³⁶ As deïe eh er Gehazi, as dooyrt eh, Eïe er y Shunammite shoh. Myr shen deïe eh urree. As tra v’ee er jeet stiagh huggey, dooyrt eh, Trog seose dty vac.

³⁷ Eisht hie ee stiagh, as huitt ee ec e chassyn, as chroym ee ee-hene gys y thalloo, as ghow ee seose e mac, as hie ee magh.

³⁸ As haink Elisha reesht gys Gilgal, as va genney ’sy cheer, as va mec ny phadeyryn nyn soie kiongoyrt rish: as dooyrt eh rish e harvaant, Soie’n pot mooar er yn aile, as jean poddash y aarlaghey son mec ny phadeyryn.

³⁹ As hie fer magh ’sy vagher dy hymsaghey lossreeyn, as hooar eh [myr heill eh] billey-feeyney feïe, as heigh eh jeh slane skyrtlagh dy ghourdyn feïe, as haink eh, as yiare eh ad dy myn ’sy phot phoddash: son cha row fys oc cre v’ad.

⁴⁰ Myr shen gheayrt ad magh son ny deiney dy ee: as haink eh gy-kione, myr v’ad gee jeh’n phoddash, dy deïe ad magh, as dooyrt ad, O uss ghooinney dy Yee, ta baase ’sy phot: as cha voddagh ad gee jeh.

⁴¹ Agh dooyrt eh, Eisht cur-jee lhieu meinn, as ceau-jee eh ayns y phot: as dooyrt eh, Deayrt magh da’n pobble, dy vod ad gee. As cha row skielley ’sy phot.

⁴² As haink dooinney veih Baal-shalisha, as hug eh lesh arran gys y dooinney dy Yee jeh ny chied-vessyn, feed bwilleen oarn, as jeeassyn creen dy arroo ayns poagey. As dooyrt eh, Cur da’n phobble, dy vod ad gee.

⁴³ As dooyrt e hirveishagh, Cre ta shoh dy hoiaghey roish keead dooinney? Dreggyr eshyn reesht, Cur da’n pobble, dy vod ad gee: son myr shoh ta’n Chiarn dy ghra, Nee ad gee, as faagys ad fooilliagh jeh.

⁴⁴ Myr shen hoie eh rhymboo eh, as ren ad gee, as va fooilliagh oc jeh, cordail rish raa’n Chiarn.