2 Recortyssyn 9 - Yn Vible Casherick 1775 1819

CAB. IX

¹ As tra cheayll ben-reïn Sheba jeh goo Solomon, haink ee dy phrowal Solomon lesh questionyn dorraghey ec Jerusalem, marish sheshaght feer vooar, as camelyn laadit lesh spiceyn, mooarane airh, as claghyn costal: as tra haink ee gys Solomon, ren ee resooney rish mychione ooilley ny v’eck ayns e cree.

² As hug Solomon bun er ooilley ny questionyn eck: as cha row nhee erbee keillit veih Solomon nagh hoilshee eh jee.

³ As tra va ben-reïn Sheba er vakin creenaght Solomon, as y thie v’eh er hroggal,

⁴ As kys va e voayrd jeant magh, as stayd e ir-oik, as shirveish e gheiney ooasle, as nyn goamraghyn, e vutleryn myrgeddin, as nyn goamraghyn, as ny greeshyn orroo hie eh seose gys thie’n Chiarn; hie e tappey vo-ee.

⁵ As dooyrt ee rish y ree, Spheer va’n goo cheayll mee ayns my heer hene, mychione dty obbraghyn, as dty chreenaght:

⁶ Ny-yeih, cha chred mee ny goan oc, derrey haink mee hene, as dy vel my hooillyn er vakin eh: as cur-my-ner, cha row’n derrey lieh jeh mooads dty chreenaght inshit dou: son t’ou foddey erskyn y goo cheayll mee jeed.

⁷ S’maynrey dty gheiney, as s’maynrey ad shoh dty harvaantyn, ta shassoo dy kinjagh kiongoyrt rhyt, as clashtyn dty chreenaght.

⁸ Bannit dy row’n Chiarn dty Yee, t’er ghoaill taitnys aynyd dy hoiaghey oo er e stoyl-reeoil, dy ve ree son y Chiarn dty Yee: er-yn-oyr dy row dty Yee graihagh er Israel, dy niartaghey lhieu son dy bragh, shen-y-fa t’eh er n’yannoo uss dty ree harrystoo, dy choyrt briwnys as cairys.

⁹ As hug ee da’n ree shey-feed talent dy airh, as palchey vooar dy spiceyn, as claghyn costal: cha row roïe lheid ny spiceyn ry-akin, as ad shoh hug ben-reïn Sheba da ree Solomon.

¹⁰ As hug marrinee Huram myrgeddin, as marrinee Solomon lhieu veih Ophir airh, as biljyn-algum, as claghyn costal.

¹¹ As ren y ree greeshyn jeh ny biljyn-algum son thie’n Chiarn, as son plaase y ree, as claasaghyn as greinyn bingys son ny fir-chiaullee: as cha row veg nyn lheid er ny akin roïe, ayns cheer Yudah.

¹² As hug ree Solomon da ben-reïn Sheba ooilley’n yeearree eck, cre-erbee baillee shirrey, as foddey smoo ny v’ee hene er yiootal er y ree. Myr shen hyndaa ee, as hie ee ro-ee gys y cheer eck hene, ish as e sharvaantyn.

¹³ Nish va trimmid yn airh haink gys Solomon ayns un vleïn, shey cheead three-feed as shey talentyn.

¹⁴ Marish y custom v’eh troggal jeh ny dellaryn as ny marchanyn. As va ooilley reeaghyn Arabia, as kiannoortyn y cheer geeck keesh da Solomon ayns airh as argid.

¹⁵ As ren ree Solomon daa cheead target dy airh hammarit: hie shey cheead shekel dy airh dy yannoo un target.

¹⁶ As three cheead scape ren eh dy airh hammarit; hie three cheead shekel dy airh gys un scape. As hasht y ree ad ayns thie keylley Lebanon.

¹⁷ Marish shoh, ren eh stoyl-reeoil mooar dy ivory, as choodee eh harrish eh lesh glen airh.

¹⁸ As va shey greeshyn gys y stoyl-reeoil lesh stoyl-coshey dy airh, va jeant shickyr gys y stoyl-reeoil, as geayltyn er dagh cheu jeh’n ynnyd-soie, as daa lion nyn shassoo liorish ny geayltyn.

¹⁹ As hass daa lion jeig ayns shen er y derrey heu, as er y cheu elley, er ny shey greeshyn. Cha row e lheid jeant ayns reeriaght erbee.

²⁰ As va ooilley siyn-iu Solomon dy airh, as va ooilley siyn thie keylley Lebanon jeh glen airh; cha row veg jeu dy argid; cha row scansh erbee jeant jeh rish lhing Solomon.

²¹ Son hie lhongyn y ree gys Tarshish marish shoalteyryn Huram; keayrt ayns three bleeaney haink lhongyn Tarshish cur lhieu airh as argid, ivory, as apeyn, as peacockyn.

²² As va ree Solomon erskyn ooilley reeaghyn ny hooirey, ayns berchys as creenaght.

²³ As va ooilley reeaghyn feaï-ny-cruinney mygeayrt aggindagh dy akin Solomon, dy chlashtyn e chreenaght, va Jee er choyrt ayns e chree.

²⁴ As hug ad lhieu dagh dooinney e yioot, siyn argid, as siyn airh, as coamraghyn, eilley-caggee, as spiceyn, cabbil, as muleyn, keesh cour ny bleeaney.

²⁵ As va ec Solomon kiare thousane manjoor son cabbil as thieyn fainee, as daa housane jeig dy varkee; ad shoh rheynn eh er ny ard-valjyn fainee, dy ve marish y ree ec Jerusalem.

²⁶ As ren eh reill harrish dy chooilley ree, veih’n awin eer gys cheer ny Philistinee, as gys slyst Egypt.

²⁷ As ren y ree er argid dy ve ayns Jerusalem cha palchey as claghyn, as ny biljyn-cedar dy ve myr ny biljyn-sycamore, ta ’sy choan cha palchey.

²⁸ As hug ad lhieu gys Solomon cabbil ass Egypt, as veih dy chooilley heer.

²⁹ Nish yn chooid elley dy obbraghyn Solomon, toshiaght as jerrey, nagh vel ad scruit ayns lioar Nathan y phadeyr, as ayns phadeyrys Ahijah yn Shilonite, as ayns ashlishyn Iddo yn fakyder, noi Jeroboam mac Nebat?

³⁰ As ren Solomon reill ayns Jerusalem harrish ooilley Israel da-eed bleïn.

³¹ As ren Solomon cadley marish e ayraghyn, as v’eh oanluckit ayns ard-valley Ghavid e ayr. As ren Rehoboam e vac reill ayns e ynnyd.