2 Recortyssyn 6 - Yn Vible Casherick 1775 1819

CAB. VI

¹ Eisht dooyrt Solomon, Ta’n Chiarn er ghra, dy jinnagh eh cummal ’sy dorraghys dowin.

² Agh ta mish er hroggal thie er dty hon, as ynnyd son dty chummal kinjagh.

³ As hyndaa y ree e eddin, as vannee eh yn slane chaglym-cooidjagh Israel: (as hass ooilley pobble Israel seose).

⁴ As dooyrt eh, Bannit dy row’n Chiarn Jee Israel, ta lesh e laueyn er chooilleeney shen ny loayr eh lesh e veeal rish m’ayr David, gra,

⁵ Er-dyn laa hug mee lhiam magh my phobble ass cheer Egypt, cha reih mee ard-valley erbee mastey ooilley tribeyn Israel, dy hroggal thie ayn, son m’ennym dy ve ayns shen; chamoo reih mee dooinney erbee dy ve my er-reill harrish my phobble Israel:

⁶ Agh ta mee er reih Jerusalem, dy vod m’ennym ve ayns shen, as er reih David dy ve harrish my phobble Israel.

⁷ Nish ve ayns cree Ghavid m’ayr dy hroggal thie son ennym y Chiarn Jee Israel.

⁸ As dooyrt y Chiarn rish m’ayr David. Son wheesh as dy row eh ayns dty chree dy hroggal thie son m’ennym’s, ren oo dy mie dy row shen ayns dty chree:

⁹ Ny-yeih, cha nee uss hroggys y thie, agh dty vac hig jeed, eshyn nee’n thie y hroggal son m’ennym.

¹⁰ Ta’n Chiarn er-y-fa shen er chooilleeney e ghoo ren eh loayrt: son ta mish er n’irree seose ayns ynnyd Ghavid m’ayr, as soie er stoyl-reeoil Israel, myr yiall y Chiarn, as er hroggal y thie son ennym y Chiarn Jee Israel.

¹¹ As shen y raad ta mee er hoiaghey’n arg; ayn ta’n conaant ren y Chiarn rish cloan Israel.

¹² As hass eh kiongoyrt rish altar y Chiarn kionfenish slane chaglym-cooidjagh Israel, as skeayl eh magh e laueyn.

¹³ (Son va Solomon er n’yannoo pulpit prashey, queig cubityn er lhiurid, as queig cubityn er lheead, as three cubityn er yrjid, as v’eh er hoiaghey eh ayns mean y chooyrt: as er shen hass eh, as ghlioon eh sheese er e ghlioonyn kiongoyrt rish ooilley chaglym-cooidjagh Israel, as skeayl eh magh e laueyn gys niau)

¹⁴ As dooyrt eh, O Hiarn Yee Israel, cha vel Jee erbee goll rhyt’s ayns niau, ny er y thalloo; ta freayll conaant, as soilshaghey myghin da dty harvaantyn, ta gimmeeaght kiongoyrt rhyt lesh ooilley nyn gree:

¹⁵ Oo t’er vreayll da dty harvaant David m’ayr, shen ny yiall oo da; as loayr oo lesh dty veeal, as er chooilleeney eh lesh dty laue, myr te yn laa jiu.

¹⁶ Nish er-y-fa shen, O Hiarn Yee Israel, freill da dty harvaant David m’ayr shen ny yiall oo da, gra, Cha bee oo laccal dooinney ayns my hilley’s dy hoie er stoyl-reeoil Israel; my she shen, dy jean dty chloan tastey ’ghoaill jeh nyn raad dy hooyl ayns my leigh, myr t’ou uss er hooyl kiongoyrt rhym’s.

¹⁷ Nish er-y-fa shen, O Hiarn Yee Israel, lhig da dty ghoo ve jeant mie, t’ou er loayrt rish dty harvaant David.

¹⁸ (Agh jean Jee dy jarroo cummal marish deiney er y thalloo? cur-my-ner, cha vod niau, as niau ny niaughyn uss y ghoaill; cre-woad sloo yn thie shoh ta mish er hroggal?)

¹⁹ Jean soiaghey, er-y-fa shen, jeh padjer as aghin dty harvaant, O Hiarn my Yee, dy eaishtagh rish yn eam as y phadjer ta dty harvaant jannoo kiongoyrt rhyt.

²⁰ Dy vod dty hooillyn ve foshlit er y thie shoh laa as oie, eer er yn ynnyd my-e-chione t’ou er ghra, dy jinnagh oo dt’ennym y choyrt ayns shen; dy eaishtagh rish y phadjer, ta dty harvaant goaill ’syn ynnyd shoh.

²¹ Eaisht er-y-fa shen rish accanyn dty harvaant, as dty phobble Israel; nee ad y yannoo ’syn ynnyd shoh: cur clashtyn veih dty ynnyd-vaghee, eer veih niau; as tra t’ou clashtyn jean leih daue.

²² My ta dooinney jannoo aggair da e naboo, as currym currit er dy ghoaill e loo, as y loo dy heet kiongoyrt rish dt’altar ’sy thie shoh.

²³ Eisht jean uss clashtyn veih niau, as cooilleen, as jean dty harvaantyn y vriwnys liorish deyrey yn vee-chrauee, dy chooilleeney e hoilchin er e chione hene, as liorish seyrey’n er cairagh, dy choyrt da cordail rish e chairys.

²⁴ As my vees dty phobble Israel fo barriaght nyn noidyn, er-yn-oyr dy vel ad er n’yannoo peccah dt’oï; as dy jyndaa ad reesht, as dy gow ad rish dt’ennym’s, as padjer as aghin y yannoo kiongoyrt rhyt’s ’sy thie shoh:

²⁵ Eisht jean uss clashtyn veih ny niaughyn, as leih peccah dty phobble Israel, as cur lhiat ad reesht gys y cheer hug oo daue, as da nyn ayraghyn.

²⁶ Tra ta’n aer dooint seose, as nagh vel veg y fliaghey, er-yn-oyr dy vel ad er n’yannoo peccah dt’oï; my t’ad guee lesh yn ynnyd shoh, as dy gow ad rish dt’ennym, as chyndaa veih nyn beccah tra t’ou seaghney ad:

²⁷ Eisht jean uss clashtyn veih niau, as leih peccah dty harvaantyn, as dty phobble Israel, as ynsee daue yn raad mie, ayn lhisagh ad gimmeeaght; as cur fliaghey er dty heer, t’ou er chur da dty phobble son eiraght.

²⁸ My vees gortey ’sy cheer, my vees y chramp ayn, my vees blest ayn, ny druight pyshoonagh, locustyn, ny praddagyn; my nee nyn noidyn ad y hionney stiagh ayns ard-valjyn nyn jeer, cre-erbee’n doghan, ny cre-erbee’n chingys vees ayn:

²⁹ Eisht cre-erbee’n phadjer, ny cre-erbee’n accan vees jeant liorish dooinney erbee, ny liorish ooilley dty phobble Israel, tra ta dy chooilley ghooinney toiggal e loght, as e hrimshey hene, as skeayley magh e laueyn ’sy thie shoh:

³⁰ Eisht jean uss clashtyn veih niau dt’ynnyd-vaghee, as jean leih, as cur cooilleeney da dy chooilley ghooinney cordail rish ooilley e raaidyn, ayd’s ta fys cre t’ayns e chree (son ayd’s dty-lomarcan ta fys cre t’ayns creeaghyn cloan gheiney.)

³¹ Dy vod ad aggle y ghoaill royd, dy immeeaght ayns dty raaidyn choud as s’bio ad ’sy cheer hug oo da nyn ayraghyn.

³² Myrgeddin, mychione y joarree, nagh vel jeh dty phobble Israel, agh t’er jeet veih cheer foddey er graih dt’ennym mooar, as dty laue niartal, as dty roih sheeynt magh; my hig ad as padjer y yannoo ’sy thie shoh:

³³ Eisht jean uss clashtyn veih ny niaughyn, eer veih dt’ynnyd-vaghee, as jean cordail rish ooilley ny ta’n joarree jannoo aghin hood er y hon; dy vod ooilley sheelnaue enney y choyrt er dt’ennym, as aggle ’ghoaill royd, myr ta dty phobble Israel, as dy vod fys ’ve oc dy vel y thie shoh ta mish er hroggal, enmyssit lurg dt’ennym:

³⁴ My hed dty phobble magh dy chaggey noi nyn noidyn, raad erbee dy der oo magh ad, as ad dy ghoaill padjer hood’s lesh yn ard-valley shoh t’ou er reih, as y thie ta mish er hroggal son dt’ennym:

³⁵ Eisht cur uss clashtyn veih ny niaughyn da nyn badjer as nyn accan, as gow yn chooish oc ayns laue.

³⁶ My nee ad peccah dt’oï, (son cha vel dooinney erbee nagh vel jannoo peccah) as uss dy ve jymmoosagh roo, as ad y livrey harrish gys nyn noidyn, as dy der ad lhieu ad ersooyl nyn bryssoonee gys cheer foddey ny gerrit.

³⁷ Ny-yeih, my smooinys ad orroo hene ’sy cheer raad t’ad er nyn goyrt lhieu ayns bondiaght, as my hyndaa-ys ad, as padjer y yannoo hood’s ayns cheer nyn gappeeys, gra, Ta shin er n’yannoo peccah, ta shin er n’yannoo dy aggairagh, as er ghellal dy mee-chrauee;

³⁸ My hyndaa-ys ad reesht hood’s lesh ooilley nyn gree, as lesh ooilley nyn annym, ayns cheer nyn gappeeys, huggey t’ad er nyn goyrt lhieu, as dy gow ad padjer lesh nyn eddin gys y cheer shoh hug oo da nyn ayraghyn, as gys yn ard-valley t’ou er reih, as gys y thie ta mish er hroggal son dt’ennym:

³⁹ Eisht cur uss clashtyn veih ny niaughyn, eer veih dty ynnyd-vaghee, da nyn badjeryn as nyn accanyn, as gow yn chooish oc ayns laue, as leih da dty phobble t’er n’yannoo peccah dt’oï,

⁴⁰ Nish, my Yee (ta mee guee ort) lhig da dty hooillyn ve foshlit, as cur clashtyn foayroil da’n phadjer t’er ny yannoo ’syn ynnyd shoh.

⁴¹ Nish er-y-fa shen, trog ort, O Hiarn Yee, gys thie dty chummal hene, uss as arg dty niart: lhig da dty haggyrtyn, O Hiarn Yee, ve coamrit lesh saualtys, as lhig da dty nooghyn boggey ’ghoaill ayns mieys.

⁴² O Hiarn Yee, ny chyndaa ersooyl eddin dt’er-ooilit: cooinee er myghinyn Ghavid dty harvaant.