2 Recortyssyn 4 - Yn Vible Casherick 1775 1819

CAB. IV

¹ Ren eh myrgeddin, altar prashey, feed cubit er lhiurid, as feed cubit er lheead, as jeih er yrjid.

² Ren eh myrgeddin keayn lheït jeh jeih cubityn, veih oirr gy oirr, runt ayns combaase, as queig cubityn er yrjid, as va’n slane combaase echey jeih cubityn as feed.

³ As fo va caslys dew, va ooilley mygeayrt-y-mysh: ayns combaase va’n keayn jeih cubityn veih ooir gy oirr: hie daa roa dy ghew er lheïe, tra hie eh er lheïe.

⁴ Ve soit er daa ghow jeig, three jeeaghyn lesh y twoaie, as three lesh y sheear, as three lesh y jiass, as three lesh y shiar: as va’n keayn soit er y dreeym oc, as va ooilley’n lieh jerree oc sthie fo e vean.

⁵ As va’n cheeid echey lheead-bass, as yn oirr goll-rish obbyr oirr cappan, myr lileeyn foshlit; as ve goaill as cummal three thousane bath.

⁶ Ren eh myrgeddin jeih tubbyryn, as hug eh queig er y laue yesh, as queig er y laue chiare, ry-hoi niee ayndoo: lheid ny reddyn as v’ad dy hebbal son yn oural-losht, v’ad niee ayndoo; agh va’n keayn gour ny saggyrtyn dy niee ayn.

⁷ As ren eh jeih kainlereyn airhey lurg nyn gummey, as hoie eh ad ’sy chiamble, queig er y laue yesh, as queig er y laue chiare.

⁸ Ren eh myrgeddin jeih buird, as hoie eh ad ’sy chiamble, queig er y cheu yesh, as queig er y cheu chiare: as ren eh keead bason dy airh.

⁹ Ren eh, myrgeddin, cooyrt ny saggyrtyn, as y chooyrt vooar, as dorryssyn ny cooyrtey, as choodee eh ny coollaghyn oc harrish lesh prash.

¹⁰ As hoie eh yn keayn er cheu yesh y chione har, lesh y jiass.

¹¹ As ren Huram ny coirraghyn, as ny sleaystyn aile, as ny basonyn, as hug Huram kione er yn obbyr v’echey dy yannoo da ree Solomon, son thie Yee.

¹² Ta shen, yn daa phillar, as ny booghyn, as ny atteeyn v’er kione y daa phillar, as yn daa chassey dy choodaghey’n daa cheeill ny atteeyn v’er kione ny pillaryn:

¹³ As kiare cheead pomegranate er y daa obbyr cast; daa roa dy phomegranateyn er dagh cassey, dy choodaghey daa voogh ny atteeyn v’er ny pillaryn.

¹⁴ Ren eh, myrgeddin, stuill; as hoie eh tubbyryn er ny stuill,

¹⁵ Un cheayn, as y daa ghow jeig fo:

¹⁶ Ny coirraghyn myrgeddin as ny sleaystyn aile, as ny aalyn, as ooilley ny greinyn oc, ren Huram e ayr y yannoo da ree Solomon son thie yn Chiarn dy phrash sollys.

¹⁷ Ayns thalloo-rea Yordan ren y ree ad y lheïe, ’sy thalloo craie eddyr Succoth as Zeredathah.

¹⁸ Shoh myr ren Solomon palchey vooar jeh ooilley ny siyn shoh: son va towse y phrash erskyn coontey.

¹⁹ As ren Solomon ooilley ny siyn va son thie Yee, yn altar airh myrgeddin, as ny buird orroo va’n arran casherick soit;

²⁰ Ny kainlereyn neesht jeh glen airh lesh nyn lampyn dy lossey, lurg yn oardagh, roish yn ynnyd casherick:

²¹ As ny blaaghyn, as ny lampyn, as ny cloughyn airhey, ad shoh ooilley jeh’n airh s’glenney.

²² As ny smalyderyn, as ny basonyn, as ny spainyn, as ny censeryn, dy airh ghlen: as jeushanyn dorrys yn ynnyd smoo casherick er cheu-sthie, as dorryssyn thie yn chiamble, v’ad jeant dy airh.