2 Recortyssyn 22 - Yn Vible Casherick 1775 1819

CAB. XXII

¹ As ren cummaltee Yerusalem Ahaziah e vac saa y yannoo dy ve yn ree ayns e ynnyd; son va’n cheshaght dy gheiney haink marish ny Arabianee gys y champ, er stroie ooilley yn vooinjer shinney. Myr shoh haink Ahaziah mac Jehoram, ree Yudah, dy reill.

² Daa vleïn as feed dy eash va Ahaziah tra ren eh toshiaght dy reill, as ren eh reill un vleïn ayns Jerusalem: va ennym e voir myrgeddin Athaliah inneen Omri.

³ Ren eshyn myrgeddin gimmeeaght ayns raaidyn thie Ahab: son er drogh choyrle e voir ren eh dy olk.

⁴ Er-y-fa shoh ren eh olk ayns shilley’n Chiarn, myr ren thie Ahab: son lurg baase e ayrey, adsyn va ny fir-choyrlee echey, gys e hoyrt-mow.

⁵ Ghow eh myrgeddin y choyrle oc, as hie eh marish Jehoram mac Ahab ree Israel, dy chaggey noi Hazael ree Syria ec Ramoth-gilead: as woaill ny Syrianee Joram.

⁶ As hyndaa eh reesht dy ve er ny lheihys ayns Jezreel, jeh ny lhottyn hooar eh ec Ramah, tra ren eh caggey rish Hazael ree Syria. As hie Ahaziah mac Jehoram ree Yudah sheese dy yeeaghyn Jehoram mac Ahab va ching ayns Jezreel.

⁷ As va toyrt-mow Ahaziah veih Jee son goll marish Joram: son hie eh magh marish Jehoram noi Jehu mac Nimshi, eh va’n Chiarn er ooilaghey dy yiarey jeh thie Ahab.

⁸ As haink eh gy-kione, tra va Jehu cooilleeney briwnys er thie Ahab as dy dooar eh magh princeyn Yudah, as mec braaraghyn Ahaziah, va ayns shirveish Ahaziah, dy varr eh ad.

⁹ As hooar eh magh Ahaziah: as haare ad eh, (son v’eh follit ayns Samaria) as hug ad lhieu eh gys Jehu: as tra v’ad er varroo eh, doanluck ad eh, er-y-fa (dooyrt ad) t’eh mac Jehoshaphat, ren geiyrt er y Chiarn lesh ooilley e chree. Myr shoh cha row fort erbee ec thie Ahaziah dy reayll daue hene yn reeriaght.

¹⁰ Agh tra honnick Athaliah moir Ahaziah, dy row yn mac eck marroo, hrog ee urree, as stroie ee ooilley sluight reeoil thie Yudah.

¹¹ Agh ghow Jehoshabeath inneen y ree Joash mac Ahaziah, as gheid ee eh ersooyl veih mastey mec y ree v’er nyn stroie, as dollee ee eh-hene as e voandyr ayns shamyr-lhiabbagh. Myr shoh ren Jehoshabeath inneen ree Jehoram, ben Jehoiada yn saggyrt (son v’ee shuyr Ahaziah) keiltyn eh veih Athaliah, myr shen nagh dug ee gy-baase eh.

¹² As v’eh oc follit ayns thie Yee son shey bleeaney, as ren Athaliah reill harrish y cheer.