2 Recortyssyn 21 - Yn Vible Casherick 1775 1819

CAB. XXI

¹ Nish chaddil Jehoshaphat marish e ayraghyn, as v’eh oanluckit marish e ayraghyn ayns ard-valley Ghavid: as ren Jehoram e vac reill ayns e ynnyd.

² As va e vraaraghyn mec Jehoshaphat, Azariah, as Jehiel, as Zechariah, as Azariah, as Michael, as Shephatiah: v’ad shoh ooilley mec Jehoshaphat ree Yudah.

³ As hug nyn ayr daue giootyn vooar dy argid, as dy airh, as dy reddyn costal, marish ard-valjyn voallit ayns Judah: agh y reeriaght hug eh da Jehoram, son dy nee eshyn va’n er by-hinney.

⁴ Nish tra va Jehoram er jeet gys reeriaght e ayrey, dy niartaghey eh-hene, varr eh ooilley e vraaraghyn lesh y chliwe, as ymmodee myrgeddin jeh princeyn Israel.

⁵ Va Jehoram daa vleïn jeig as feed d’eash tra ghow eh toshiaght dy reill as ren eh reill hoght bleeaney ayns Jerusalem.

⁶ As deiyr eh er raaidyn reeaghyn Israel, myr ren thie Ahab: son v’eh er phoosey inneen Ahab: as ren eh shen ny va olk ayns shilley’n Chiarn.

⁷ Ny-yeih, cha nee aigney yn Chiarn ve dy stroie thie Ghavid, kyndagh rish y chonaant v’eh er n’yannoo rish David; as myr yiall eh dy choyrt soilshey dasyn, as da e vec son dy bragh.

⁸ ’Sy lhing echeysyn ren ny Edomiteyn girree-magh noi reiltys Yudah, as ren ad ree daue hene.

⁹ Eisht hie Jehoram magh lesh e phrinceyn, as ooilley e ainee marish: as hie eh seose ’syn oie, as woaill eh ny Edomiteyn v’er chruinnaghey mygeayrt eh-hene, as captanyn ny fainee.

¹⁰ Myr shoh ren ny Edomiteyn reiltys Yudah y chraa jeu gys y traa t’ayn. Ec y traa cheddin, ren Libnah girree-magh n’oï, er-y-fa dy row eh er hreigeil y Chiarn, Jee e ayraghyn.

¹¹ Myrgeddin, hrog eh altaryn er sleityn Yudah, as hug eh er cummaltee Yerusalem dy hirveish jallooyn, as ren eh ad y êginaghey huggey.

¹² As haink screeuyn huggey ayns ennym Elijah yn phadeyr, gra, Myr shoh ta Chiarn Jee Ghavid dt’ayr gra, Er-yn-oyr nagh vel oo er n’immeeaght ayns raaidyn Jehoshaphat dty ayr, chamoo ayns raaidyn Asa ree Yudah,

¹³ Agh er n’immeeaght ayns raaidyn reeaghyn Israel, as er choyrt er Judah as cummaltee Yerusalem dy hirveish jallooyn, lurg cliaghtey thie Ahab, as dy vel oo myrgeddin er ghunverys dty vraaraghyn hene mec dt’ayrey, deiney share na oo hene:

¹⁴ Cur-my-ner, lesh kerraghey trome nee’n Chiarn bwoalley dty phobble, as dty chloan, as dty vraane, as ooilley dty chooid.

¹⁵ As bee oo seaghnit lesh doghan dewil ayns dty chorp, derrey huittys dty vynnagh assyd, kyndagh rish y chingys laa lurg laa.

¹⁶ Marish shoh ren y Chiarn greinnaghey noi Jehoram spyrryd ny Philistinee, as ny Arabianee, va naboonyn da ny Ethiopianee.

¹⁷ As haink ad seose noi Judah, as vrish ad stiagh er, as hug ad lhieu ersooyl ooilley yn stoo v’er ny gheddyn ayns thie yn ree, as e vec myrgeddin as e vraane: myr shen nagh row mac edyr faagit da, er-lhimmey jeh Ahaziah e vac saa.

¹⁸ As lurg shoh ooilley woaill y Chiarn eh ’sy volg lesh doghan gyn-lheihys.

¹⁹ As haink eh mygeayrt, lurg traa, ec kione daa vleïn, dy huitt e vynneeyn ass kyndagh rish e ghoghan: myr shen hooar eh baase jeh doghanyn eajee: as cha ren e phobble aile-oanluckee er e hon, myr ren ad son e ayraghyn.

²⁰ Daa vleïn jeig as feed dy eash v’eh tra ren eh toshiaght dy reill, as ren eh reill ayns Jerusalem hoght bleeaney, as hooar eh baase gyn trimshey er e hon: ny-yeih doanluck ad eh ayns ard-valley Ghavid, agh cha nee ayns ny lhiaghtyn reeoil.