2 Recortyssyn 2 - Yn Vible Casherick 1775 1819

CAB. II

¹ As va Solomon kiarit dy hroggal thie gys ennym y Chiarn, as thie son e reeriaght hene.

² As ren Solomon pointeil three-feed as jeih thousane dooinney dy ymmyrkey erraghyn, as kiare-feed thousane dy yiarey sheese fuygh ’sy clieau, as three thousane as shey cheead dy ve harrish yn obbyr.

³ As hug Solomon fys gyn Huram ree Tyre, gra, Myr ghell oo rish David m’ayr, as dy dug oo huggeysyn cedaryn dy hroggal thie da dy chummal ayn, eer myr shen lhig dooinyn dellal.

⁴ Cur-my-ner, ta mee troggal thie gys ennym y Chiarn my Yee, dy chasherickey eh huggeysyn, as dy lostey kiongoyrt rish oural-millish, as son yn arran casherick dy ve soit magh dy kinjagh, as son ny chebballyn-losht moghrey as fastyr, er ny dooneeyn, as er ny eaystyn-noa, as er feaillaghyn casherick y Chiarn nyn Yee. Ta shoh ny oardagh kinjagh da Israel.

⁵ As s’mooar y thie ta mee kiarail dy hroggal: son s’mooar ta’n Jee ain erskyn dy chooilley Yee.

⁶ Agh quoi ec ta’n fort dy hroggal thie dasyn, fakin nagh vel niau, as niau ny niaughyn son eshyn y ghoaill? quoi mish eisht, dy ve feeu thie y hroggal da, agh ynrycan dy hebbal oural-losht kiongoyrt rish?

⁷ Cur hym nish, er-y-fa shen, dooinney schleioil ayns obbraghyn airh, as ayns argid, as ayns prash, as ayns yiarn, as ayns purple, as crimson, as gorrym, as ta ynsit dy ghrainney marish ny deiney schleioil t’aym ayns Judah as ayns Jerusalem, adsyn ren David m’ayr y ailley.

⁸ Cur hym myrgeddin biljyn-cedar, biljyn-juys, as biljyn-algum ass Lebanon: (son ta mee toiggal dy vel ny sharvaantyn ayd’s aghtal dy yiarey fuygh ayns Lebanon) as cur-my-ner, bee my harvaantyn marish dty harvaantyn’s,

⁹ Dy jarroo dy gheddyn aarloo dou palchey fuygh: son y thie ta mee kiarail dy hroggal, bee eh yindyssagh mooar.

¹⁰ As cur-my-ner, ver-ym da dty harvaantyn ta lhieggey fuygh feed thousane towse dy churnagh ghlen, as feed thousane towse dy oarn, as feed thousane saagh feeyney, as feed thousane saagh d’ooil.

¹¹ Eisht hug Huram ree Tyre ansoor ayns screeuyn, hug eh gys Solomon, Er-yn-oyr, dy row graih ec y Chiarn er e phobble, t’eh er n’yannoo uss dty ree harrystoo.

¹² Dooyrt Huram ny-sodjey, Bannit dy row’n Chiarn Jee Israel, t’er chroo niau as thalloo, t’er choyrt da David y ree mac creeney, coamrit lesh keeayll, as tushtey, dy hroggal thie da’n Chiarn, as thie son e reeriaght hene.

¹³ As nish ta mee er choyrt dooinney schleioil as tushtagh, va lesh Huram m’ayr.

¹⁴ Mac ben jeh inneenyn Dan, as e ayr dooinney jeh Tyre, schleioil dy obbraghey ayns airh, as ayns argid, ayns prash, ayns yiarn, ayns claghyn, as ayns fuygh; ayns purple, ayns gorrym, as ayns aanrit keyl, as ayns crimson: myrgeddin, ayns dy chooilley horch dy obbyr ghrainnit, as toiggalagh dy chooilleeney obbyr erbee hig fo e laue dy yannoo, marish ny deiney schleioil ayd, as marish deiney schleioil my hiarn David dty ayrey.

¹⁵ Nish, er-y-fa shen, yn churnagh, as yn oarn, yn ooil, as y feeyn, ta my hiarn er imraa jeu, lhig da ’choyrt ad gys e harvaantyn:

¹⁶ As nee mayd giarey fuygh ayns Lebanon, wheesh as vees feme ayd er, as ver mayd lhien eh hood ayns raftyn er y cheayn gys Joppa, as ver oo lhiat eh seose gys Jerusalem.

¹⁷ As ghow Solomon earroo ooilley ny joarreeyn va ayns cheer Israel cordail rish y coontey va David e ayr er ghoaill jeu; as v’ad ’sy clane shiaght-feed as three thousane jeig as shey cheead.

¹⁸ As doardee eh three-feed as jeih thousaneyn jeu dy ve fo ny erraghyn, as kiare-feed thousane ry-hoi giarey fuygh ’sy clieau, as three thousane as shey cheead oaseir dy reayll y sleih gys obbyr.