2 Recortyssyn 13 - Yn Vible Casherick 1775 1819

CAB. XIII

¹ Nish ayns y hoghtoo vleïn jeig jeh ree Jeroboam, ghow Abijah toshiaght dy reill harrish Judah.

² Ren eh reill three bleeaney ayns Jerusalem: (va ennym e voir myrgeddin Michaiah inneen Uriel jeh Gibeah) as va caggey eddyr Abijah as Jeroboam.

³ As hoie Abijah e heshaght ayns order-caggee lesh armee dy gheiney dunnal, eer da-eed thousane dy reih deiney: hayrn Jeroboam seose myrgeddin e heshaght-chaggee n’oï, lesh kiare-feed thousane, reih deiney, va niartal ayns caggey.

⁴ As hass Abijah er cronk Zemaraim ayns thalloo Ephraim, as dooyrt eh, Clasht rhym’s, uss Yeroboam, as ooilley Israel.

⁵ Nagh lhisagh toiggal ’ve eu dy dug y Chiarn, Jee Israel, yn reeriaght harrish Israel da David son dy bragh, dy jarroo dasyn as da e vec liorish conaant saillit?

⁶ Ny-yeih, ta Jeroboam mac Nebat, sharvaant Solomon mac Ghavid er ghoaill er dy irree-magh noi e hiarn.

⁷ As t’eh er haglym huggey deiney eddrym cloan Velial, ta er niartaghey ad-hene noi Rehoboam mac Solomon, tra va Rehoboam aeg, as lhag-chreeagh, as nagh voddagh eh shassoo nyn ’oï.

⁸ As nish, ta shiu kiarail dy hassoo magh noi reeriaght y Chiarn, ta cairys mec Ghavid; as ta shiu sheshaght vooar, as ta mêriu lheiyee airh ren Jeroboam diu son jeeghyn.

⁹ Nagh vel shiu er hilgey magh saggyrtyn y Chiarn mec Aaron, as ny Leviteyn, as er n’yannoo diu hene saggyrtyn lurg cliaghtey ny ashoonyn jeh cheeraghyn elley? myr shen quoi-erbee ta chebbal eh-hene dy ve ny haggyrt lesh dow aeg as shiaght reaghyn, foddee eh ve ny haggyrt dauesyn nagh nee jeeghyn ad.

¹⁰ Agh er ny son ainyn, she’n Chiarn y Jee ain, as cha vel shin er hreigeil eh; as ta ny saggyrtyn shirveishee’n Chiarn, mec Aaron, as ta ny Leviteyn cooilleeney nyn oik.

¹¹ As t’ad chebbal gys y Chiarn, dagh moghrey as fastyr, ourallyn-losht, as oural-millish: yn arran casherick myrgeddin t’ad soiaghey magh ayns order er y voayrd casherick, as y kainlere dy airh lesh e lampyn, dy lossey dy chooilley fastyr: son ta shinyn freayll currym y Chiarn nyn Yee; agh ta shiuish er hreigeil eh.

¹² As cur-my-ner, ta Jee hene mârin son nyn leeideilagh, as e haggyrtyn lesh trumpetyn feiyral, dy hroggal larm nyn ’oï eu: O chloan Israel, ny jean-jee caggey noi’n Chiarn Jee nyn ayraghyn, son cha jig eh lhieu.

¹³ Agh hug Jeroboam er deiney dy lhie follit, dy heet mygeayrt er y chooyl oc: myr shen dy row Judah eddyr y daa heshaght, chammah rhymboo as nyn yeï.

¹⁴ As tra yeeagh Judah nyn yeï, cur-my-ner, va’n caggey rhymboo as er nyn gooyl: as deïe ad gys y Chiarn, as ren ny saggyrtyn ny trumpetyn y helm.

¹⁵ Eisht hug deiney Yudah yllagh ard assdoo: as myr va deiney Yudah gyllaghey, haink eh gy-kione, dy ren Jee Jeroboam y woalley as ooilley Israel, roish Abijah as Judah.

¹⁶ As roie cloan Israel er-chea roish Judah: as ren Jee y livrey ad gys nyn laue.

¹⁷ As ren Abijah as e phobble ad y stroie lesh cragh vooar: myr shen dy huitt sheese marroo jeh Israel jeih thousaneyn as da-eed, reih deiney.

¹⁸ Myr shoh va cloan Israel er nyn goyrt fo-chosh ec y traa shen, as hooar cloan Yudah laue yn eaghtyr, er-y-fa dy dug ad nyn marrant er y Chiarn Jee nyn ayraghyn.

¹⁹ As hie Abijah er-eiyrt’s Jeroboam, as ghow eh voish ard-valjyn, Beth-el as e baljyn, as Jeshanah as e baljyn, as Ephraim as e baljyn.

²⁰ Chamoo ren Jeroboam coural arragh ayns niart rish lhing Abijah: as woaill y Chiarn eh, as hooar eh baase.

²¹ Agh daase Abijah niartal, as phoose eh kiare mraane jeig, as hooar eh daa vac as feed, as shey inneenyn jeig.

²² As y chooid elley jeh obbraghyn Abijah, as e raaidyn, as e raaghyn, t’ad scruit ayns lioar y phadeyr Iddo.