2 Recortyssyn 11 - Yn Vible Casherick 1775 1819

CAB. XI

¹ As tra va Rehoboam er jeet gys Jerusalem, haggil eh jeh thie Yudah as Venjamin nuy-feed thousane reih deiney caggee, dy chaggey noi Israel, dy hyndaa yn reeriaght reesht gys Rehoboam.

² Agh haink goo’n Chiarn gys Shemaiah yn dooinney dy Yee, gra,

³ Loayr rish Rehoboam mac Solomon ree Yudah, as rish ooilley Israel ayns Judah as Benjamin, gra,

⁴ Myr shoh ta’n Chiarn dy ghra, Cha jed shiu seose, chamoo nee shiu caggey noi nyn mraaraghyn: chyndaa-jee dy chooilley ghooinney gys e hie, son ta’n red shoh jeant liorym’s: as v’ad biallagh da goan y Chiarn, as hyndaa ad reesht veih goll noi Jeroboam.

⁵ As ren Rehoboam cummal ayns Jerusalem, as hrog eh ard-valjyn son fendeil ayns Judah.

⁶ Hrog eh Beth-lehem, as Etam, as Tekoa,

⁷ As Beth-zur, as Shoco, as Adullam,

⁸ As Gath, as Mareshah, as Ziph,

⁹ As Adoraim, as Lachish, as Azekah,

¹⁰ As Zorah, as Aijalon, as Hebron; ta ayns Judah, as ayns Benjamin, ard-valjyn voallit.

¹¹ As ren eh ny ynnydyn lajer y yannoo ny s’troshey, as hug eh captanyn ayndoo, as stoyr beaghey, as ooil, as feeyn.

¹² As ayns dagh ard-valley hug eh eïllaghyn-caggee, as shleiyghyn, as ren eh ad erskyn-towse lajer, son va Judah as Benjamin fo e reill.

¹³ As va ny saggyrtyn as ny Leviteyn ooilley er nyn jaglym cooidjagh huggey veih ooilley ardjyn Israel.

¹⁴ (Son daag ny Leviteyn nyn gleebyn, as nyn gummallyn, as haink ad gys Judah as Jerusalem: son va Jeroboam as e vec er yiooldey ad veih oik y taggyrt y chooilleeney gys y Chiarn.

¹⁵ As doardee eh da hene saggyrtyn son ny ard-ynnydyn, as son ny jouyil, as son ny jallooyn v’eh er n’yannoo).

¹⁶ As mâroosyn haink gys Jerusalem ass ooilley tribeyn Israel, lheid as va nyn greeaghyn soit dy hirrey gys y Chiarn Jee Israel, dy hebbal oural gys Chiarn Jee nyn ayraghyn.

¹⁷ Myr shoh ren ad reeriaght Yudah y niartaghey, as chum ad seose Rehoboam mac Solomon three bleeaney: son choud shen jimmee ad ayns raad Ghavid as Solomon.

¹⁸ As ghow Rehoboam huggey Mahalath inneen Jerimoth mac Ghavid son ben, as Abihail inneen Eliab, mac Jesse:

¹⁹ Ren gymmyrkey cloan da; Jeush, as Shamariah, as Zaham.

²⁰ As ny lurg ecksh, ghow eh Maachah inneen Absalom, ren gymmyrkey da Abijah, as Attai, as Ziza, as Shelomith.

²¹ As bynney lesh Rehoboam Maachah inneen Absalom, erskyn ooilley e vraane as e cho-lhiabbee: (son ghow eh hoght mraane jeig, as three-feed co-lhiabbagh, as v’echey hoght mec as feed, as three-feed inneen).

²² As ren Rehoboam Abijah mac Maachah yn ard-er-reill mastey e vraaraghyn: son v’eh kiarail dy yannoo eh ny ree.

²³ As ghell eh dy creeney ayns soiaghey yn chooid elley jeh e chloan harrish ny ard-valjyn fencit trooid ooilley cheeraghyn Yudah as Venjamin: as hug eh daue beaghey ooasle: as ghow eh da hene ymmodee mraane.