2 Recortyssyn 10 - Yn Vible Casherick 1775 1819

CAB. X

¹ As hie Rehoboam gys Shechem: son gys Shechem va ooilley Israel er jeet dy yannoo eh ny ree.

² As haink eh gy-kione tra va Jeroboam mac Nebat er chlashtyn shoh (son v’eh ayns Egypt, raad v’eh er-chea veih fenish Solomon yn ree) dy hyndaa Jeroboam ass Egypt.

³ As hug ad fys as deïe ad er: myr shen haink Jeroboam, as ooilley Israel, as loayr ad rish Rehoboam, gra,

⁴ Ren dty ayraghyn yn whing ain trome orrin, nish er-y-fa shen jean uss red ennagh y lhaggaghey jeh bondiaght dewil dt’ayrey, as e whing hrome hug eh orrin, as nee mayd uss y hirveish.

⁵ As dooyrt eh roo, Tar-jee hym reesht kione three laa. As hie’n pobble rhymboo.

⁶ As ghow ree Rehoboam coyrle jeh ny shenn gheiney va fir-choyrlee Solomon e ayr, rish y lhing echey, gra, Cre’n choyrle ver shiu dou, dy voddym ansoor y choyrt da’n pobble shoh?

⁷ As loayr ad rish, gra, My vees oo dooie da’n pobble shoh, as ad y wooiys, as glare vie y chur daue, bee ad dty harvaantyn son dy bragh.

⁸ Agh cha ghow eshyn coyrle ny shenn gheiney, as ghow eh coyrle jeh ny deiney aegey, v’er ve troggit mârish, va shirveish kiongoyrt rish.

⁹ As dooyrt eh roo, Cre’n choyrle ver shiu dou, dy voddym ansoor y choyrt da’n pobble shoh, t’er loayrt rhym, gra, Lhaggee yn whing hug dty ayr orrin?

¹⁰ As loayr ny deiney aegey e choasanyn rish, gra, Myr shoh ver oo ansoor da’n pobble ren loayrt rhyt, gra, Ren dty ayr yn whing ain trome, agh jean uss eh red ennagh s’eddrym dooin; myr shoh jir uss roo, Bee’n vair-veg aym’s ny s’chee na slheeasid m’ayrey.

¹¹ Son ayns wheesh as dy dug m’ayr quing trome erriu, neem’s eh ny s’trimmey: ren m’ayr shiu y chustey lesh kippyn, agh neem’s shiu y chustey lesh scorpionee.

¹² Myr shen haink Jeroboam as ooilley yn pobble gys Rehoboam er y trass laa, myr va’n ree er n’oardaghey, gra, Tar-jee reesht hym kione y trass laa.

¹³ As dansoor yn ree ad dy baggyrtagh: as hreig ree Rehoboam coyrle ny shenn gheiney,

¹⁴ As dansoor eh ad lurg coyrle ny deiney aegey, gra, Ren m’ayr yn whing eu trome, agh neem’s eh ny s’trimmey: ren m’ayr shiu y chustey lesh kippyn, agh neem’s shiu y chustey lesh scorpionee.

¹⁵ Myr shen cha dug y ree geill da’n pobble: son va’n chooish veih Jee, dy voddagh y Chiarn e ghoo y chooilleeney, loayr eh liorish Ahijah yn Shilonite rish Jeroboam mac Nebat.

¹⁶ As tra honnick ooilley Israel nagh dug y ree geill daue, dansoor yn pobble y ree, gra, Cre’n ayrn t’ain ayns David? As cha vel eiraght erbee ain ayns mac Jesse: ersooyl-jee dy chooilley ghooinney gys nyn gabbaneyn, O Israel: as nish, Ghavid, jeeagh da dty hie hene. Myr shen hie ooilley Israel gys nyn gabbaneyn.

¹⁷ Agh er son cloan Israel va cummal ayns ard-valjyn Yudah, ren Rehoboam reill harrystoo.

¹⁸ Eisht hug ree Rehoboam huc Hadoram, va currym y cheesh er; as ren cloan Israel y chlaghey eh, dy dooar eh baase. Agh ren ree Rehoboam siyr dy hayrtyn seose ’sy ainagh, dy chosney roish gys Jerusalem.

¹⁹ As dirree Israel magh noi thie Ghavid gys y traa t’ayn jiu.