1 Samuel 15 - Yn Vible Casherick 1775 1819

CAB. XV

¹ Dooyrt Samuel myrgeddin rish Saul, Hug y Chiarn mish dy dty ooilaghey dy ve dty ree harrish e phobble Israel: nish er-y-fa shen eaisht rish coraa goan y Chiarn.

² Myr shoh ta’n Chiarn dy heshaght-flaunyss gra, Cha vel mee er yarrood ny ren Amalek rish Israel, kys lhie eh dy follit er e hon er y raad, myr v’eh cheet seose veih Egypt.

³ Immee nish, as bwoaill Amalek, as stroie dy bollagh ooilley ny t’oc, as ny jean ad y sparail; agh marr chammah dooinney as ben, lhiannoo as oikan, dow as keyrrey, camel as assyl.

⁴ As ren Saul chaglym y pobble cooidjagh, as ghow eh yn earroo oc ayns Telaim, daa cheead thousane coshee, as jeih thousaneyn dy gheiney Yudah.

⁵ As haink Saul gys ard-valley Amalek, as lhie eh fo-chlea ’sy choan.

⁶ As dooyrt Saul rish ny Keniteyn, ersooyl-jee, cosne-jee reue, as immee-jee sheese veih mastey ny Amalekiteyn, er-aggle dy jean-yms shiu y stroie mâroo: son ren shiuish kenjallys y hoilshaghey da ooilley cloan Israel tra haink ad seose ass Egypt. Myr shoh hie ny Keniteyn rhymboo, veih mastey ny Amalekiteyn.

⁷ As woaill Saul ny Amalekiteyn veih Havilah derrey Shur, ta rish ardjyn Egypt.

⁸ As ghow eh Agag ree ny Amalekiteyn bio as stroie eh dy bollagh ooilley yn pobble lesh foyr y chliwe.

⁹ Agh ren Saul as y pobble sparail Agag, as y chooid share jeh ny kirree, jeh ny dew, jeh ny muirht, as ny heayin, as ooilley’n reih spooilley, ad shoh cha bailloo dy slane stroie: agh ooilley’n chooid smessey, as jeh beggan feeu shen ren ad dy bollagh y stroie.

¹⁰ Eisht haink goo’n Chiarn gys Samuel, gra,

¹¹ Ta mee chaghlaa my aigney noi Saul dy vel mee er hoiaghey seose eh dy ve ny ree: son t’eh er choyrt cooyl rhym, as cha vel eh er chooilleeney my harey. As va shoh trimshey mooar da Samuel; as deïe eh gys y Chiarn fud-ny-hoie.

¹² As tra dirree Samuel dy moghey dy veeiteil Saul, ve inshit da Samuel, gra, Haink Saul gys Carmel, as cur-my-ner, t’eh er hroggal altar, as er n’gholl er e hoshiaght mygeayrt, as sheese gys Gilgal.

¹³ As haink Samuel gys Saul; as dooyrt Saul rish, Dy bannee’n Chiarn oo: ta mee er chooilleeney oardagh y Chiarn.

¹⁴ As dooyrt Samuel, Cre ta’n eam shoh eisht jeh ny kirree, as jeh ny dew, ta mee dy chlashtyn?

¹⁵ As dooyrt Saul, T’ad er ghoaill ad shoh veih ny Amalekiteyn: son haue yn pobble y reih jeh ny kirree, as jeh ny dew, son oural gys y Chiarn dty Yee, as y chooid elley ta shin er stroie dy bollagh.

¹⁶ Eisht dooyrt Samuel rish Saul, Fuirree, as insh-ym dhyt, cre ta’n Chiarn er ghra rhym’s noght. As dooyrt eh rish, Gow lesh.

¹⁷ As dooyrt Samuel, Tra v’ou imlee ayns dty hooillyn hene, nagh r’ou jeant yn ard-chaptan er tribeyn Israel, as ren y Chiarn uss y ooilaghey dy ve dty ree harrish Israel?

¹⁸ As hug y Chiarn oo er jurnah, as dooyrt eh, Immee, as stroie rass as cass ny peccee shen ny Amalekiteyn, as jean caggey nyn ’oï derrey vees ad dy bollagh astyrit.

¹⁹ Cre’n-fa eisht, nagh dug oo biallys da coraa yn Chiarn, agh roie oo er y spooilley, as ren oo olk ayns shilley’n Chiarn?

²⁰ As dooyrt Saul rish Samuel, Ta mee dy jarroo er choyrt biallys da coraa yn Chiarn, as er n’gholl er y chaghteraght hug y Chiarn mee, as ta mee er choyrt lhiam Agag ree Amalek, as dy bollagh er stroie ny Amalekiteyn.

²¹ Agh ghow’n pobble jeh’n spooilley, kirree as dew, yn reih jeh ny reddyn lhisagh dy bollagh ve stroit, son oural gys y Chiarn dty Yee ayns Gilgal.

²² As dooyrt Samuel, Vel wheesh dy haitnys ec y Chiarn ayns ourallyn-losht as chebballyn, as t’echey ayns biallys da coraa’n Chiarn? Cur-my-ner, ta biallys ny share na oural, as dy choyrt ammys, na riurid reaghyn.

²³ Son ta mee-viallys myr y peccah dy obbeeys, as roonid myr yn ard-pheccah dy yalloonys. Er-yn-oyr dy vel uss er choyrt cooyl rish goo’n Chiarn, t’eshyn myrgeddin er choyrt cooyl rhyt’s, nagh bee dty reeriaght beayn.

²⁴ As dooyrt Saul rish Samuel, Ta mee er n’yannoo peccah: son ta mee er n’gholl noi sarey’n Chiarn, as ny goan ayd’s; er-yn-oyr dy row mee ayns aggle roish y pobble, as dy dug mee geill da nyn goraa.

²⁵ Nish er-y-fa shen, ta mee guee ort, leih dou my pheccah, as chyndaa reesht mârym, dy voddym ooashley ’choyrt da’n Chiarn.

²⁶ As dooyrt Samuel rish Saul, Cha jyndaa-ym mayrt: son t’ou er hoiaghey beg jeh goo’n Chiarn, as ta’n Chiarn er hilgey uss jeh veih ve ny ree harrish Israel.

²⁷ As myr hyndaa Samuel mygeayrt dy gholl roish, ghow Saul greme er rumbyl e chloagey, as ren eh raipey.

²⁸ As dooyrt Samuel rish, Ta’n Chiarn er raipey reeriaght Israel voïd’s yn laa shoh, as er choyrt eh da dty naboo, ta ny share na uss.

²⁹ Myrgeddin cha jean eshyn ta coyrt barriaght da Israel caghlaa, ny goaill arrys: son cha nee dooinney eh, dy goghe eh arrys.

³⁰ Eisht dooyrt eh, Ta mee er n’yannoo peccah: ny-yeih, cur onnor dou nish, ta mee guee ort, fenish shanstyr my phobble, as kiongoyrt rish Israel, as chyndaa reesht mârym, dy voddym ooashley ’choyrt da’n Chiarn dty Yee.

³¹ Myr shen hyndaa Samuel reesht marish Saul, as hug Saul ooashley da’n Chiarn.

³² Eisht dooyrt Samuel, Cur-jee lhieu hym gys shoh Agag ree ny Amalekiteyn: as haink Agag huggey dy staydoil. As dooyrt Agag, Shickyr ta guinn y vaaish er n’gholl shagh-ym.

³³ As dooyrt Samuel, Myr ta dty chliwe er n’yannoo mraane gyn cloan, shen myr vees dty voir fegooish cloan mastey mraane. As yiare Samuel Agag ayns peeshyn kiongoyrt rish y Chiarn ayns Gilgal.

³⁴ Eisht hie Samuel gys Ramah; as hie Saul seose gys e hie gys Gibeah Saul.

³⁵ As cha daink Samuel arragh dy yeeaghyn Saul gys laa e vaaish: ny-yeih ren Samuel dobberan son Saul: as va’n Chiarn neu-wooiagh dy row Saul ny ree harrish Israel.