1 Recortyssyn 9 - Yn Vible Casherick 1775 1819

CAB. IX

¹ Shoh myr va earroo ooilley Israel rere nyn gynneeyn er ny ghoaill, as cur-my-ner v’ad scruit ayns lioar reeaghyn Israel as Yudah, v’er nyn goyrt lhieu ersooyl nyn gappee gys Babylon son nyn mee-viallys.

² Nish, ny chied chummaltee haink back gys nyn eiraght, ayns ny baljyn oc v’ad, ny Israeliteyn, ny saggyrtyn, ny Leviteyn, as ny Nethinim.

³ As ayns Jerusalem va cummal jeh cloan Yudah, as jeh cloan Venjamin, as jeh cloan Ephraim, as Manasseh;

⁴ Uthai, mac Ammihud, mac Omri, mac Imri, mac Bani, jeh cloan Pharez mac Yudah.

⁵ As jeh ny Shiloniteyn, Asaiah yn er shinney, as e vec.

⁶ As jeh mec Zerah, Jeuel as nyn mraaraghyn; shey cheead as kiare-feed as jeih.

⁷ As jeh mec Venjamin, Sallu, mac Meshullam, mac Hodaviah, mac Hasenuah,

⁸ As Ibneiah, mac Jeroham, as Elah, mac Uzzi, mac Michri, as Meshullam, mac Shephatiah, mac Reuel, mac Ibnijah;

⁹ As nyn mraaraghyn, rere nyn gynneeyn, nuy cheead as shey-jeig as da-eed. V’ad shoh ooilley ard-gheiney mastey nyn gynneeyn, ayns thie nyn ayraghyn.

¹⁰ As jeh ny saggyrtyn; Jedaiah, as Jehoiarib, as Jachin,

¹¹ As Azariah, mac Hilkiah, mac Meshullam, mac Zadok, mac Meraioth, mac Ahitub, fer-oik ayns thie Yee,

¹² As Adaiah, mac Jeroham, mac Pashur, mac Malchijah, as Maasiai, mac Adiel, mac Jahzerah, mac Meshullam, mac Meshillemith, mac Immer;

¹³ As nyn mraaraghyn, king thie nyn ayraghyn, thousane as shiaght cheead as three-feed; deiney feer fondagh son obbyr y chirveish ayns thie Yee.

¹⁴ As jeh ny Leviteyn; Shemaiah, mac Hashub, mac Azrikam, mac Hashabiah, jeh mec Merari,

¹⁵ As Bakbakkar, Heresh, as Galal, as Mattaniah, mac Micah, mac Zichri, mac Asaph,

¹⁶ As Obadiah, mac Shemaiah, mac Galal, mac Jeduthun, as Berechiah, mac Asa, mac Elkanah, va cummal ayns baljyn ny Netophathiteyn.

¹⁷ As er y ghard va Shallum, as Akkub, as Talmon, as Ahiman, as nyn mraaraghyn: Shallum y captan oc.

¹⁸ (Ta freayll gard derrey shoh ec giat y ree, lesh y shiar) v’ad shoh arreyderyn ayns sheshaghtyn cloan Levi.

¹⁹ As Shallum, mac Kore, mac Ebiasaph, mac Korah, as e vraaraghyn, (jeh thie e ayrey) va ny Korahiteyn harrish obbyr y chirveish, freayll giattyn y chabbane-agglish: as nyn ayraghyn va leeideilee sheshaght-caggee yn Chiarn, va currym y phorch orroo.

²⁰ As Phinehas mac Eleazar va’n ard er-reill harrystoo ’sy chenn earish, as va’n Chiarn mârish.

²¹ As Zechariah mac Meshelemiah va arreyder dorrys y chabbane-agglish.

²² Ad shoh ooilley va reiht dy ve son gard ny giattyn, v’ad daa cheead as ghaa-yeig. Va’n coontey oc shoh rere nyn gynneeyn er ny ghoaill ayns nyn baljyn: myr va David as Samuel y phadeyr er oardaghey dagh fer gys e oik hene.

²³ As orroosyn as er nyn gloan va currym giattyn thie’n Chiarn, ta shen, yn cabbane-agglish, ayns nyn goorseyn.

²⁴ Er ny kiare ardjyn va gard, gys y shiar, sheear, twoaie as jiass.

²⁵ As nyn mraaraghyn, ayns nyn maljyn, va dy heet nyn yeï lurg kione shiaghtin, veih traa dy traa.

²⁶ Son va ny kiare Leviteyn shoh ny ard arreyderyn ayns nyn oik, as orroosyn va currym ny shamyryn, as tashtaghyn thie Yee.

²⁷ As va nyn gummal kinjagh mygeayrt thie Yee, er-yn-oyr dy nee orroosyn va’n churrym dy osley dy chooilley voghrey.

²⁸ As er paart jeu va currym siyn y chirveish, dy choyrt lhieu ad stiagh as magh lurg nyn goontey.

²⁹ Va paart jeu myrgeddin pointit, dy ghoaill kiarail jeh ny siyn, as ooilley jeshaghtyn yn ynnyd casherick, as y flooyr meein, as y feeyn, as yn ooil, as y frankincense, as ny spiceyn.

³⁰ As paart jeh mec ny saggyrtyn ren ooil jeh ny spiceyn.

³¹ As ec Mattithiah, fer jeh ny Leviteyn (mac shinney Shallum yn Korahite) va currym ny reddyn shen va aarlit ayns pannyn.

³² As ec paart elley jeh nyn mraaraghyn mec ny Kohathiteyn, va currym yn arran casherick dy aarlaghey gour dagh doonaght.

³³ As v’ad shoh ny ard-chiaulleyderyn, leeideilee ny Leviteyn, cummal ayns ny shamyryn, seyr veih dy chooilley churrym elley; son v’ad goit seose ayns yn obbyr shen, oie as laa.

³⁴ V’ad shoh ard ayraghyn ny Leviteyn trooid ny kynneeyn oc: as va nyn gummal kinjagh ayns Jerusalem.

³⁵ As ayns Gibeon, ren Jehiel ayr Ghibeon cummal: ennym e ven va Maachah:

³⁶ As e vac shinney Abdon, eisht Zur, as Kish, as Baal, as Ner, as Nadab,

³⁷ As Gedor, as Ahio, as Zechariah, as Mikloth.

³⁸ As hooar Mikloth Shimeam: as ren adsyn myrgeddin cummal marish nyn mraaraghyn, ec Jerusalem, er-gerrey da nyn mraaraghyn.

³⁹ As hooar Ner Kish, as hooar Kish Saul, as hooar Saul Jonathan, as Malchi-shua, as Abinadab, as Esh-baal.

⁴⁰ As mac Jonathan va Meribbaal: as hooar Meribbaal Micah;

⁴¹ As mec Micah v’ad, Pithon, as Melech, as Tahrea, as Ahaz.

⁴² As hooar Ahaz Jarah, as hooar Jarah Alemeth, as Azmaveth, as Zimri; as hooar Zimri Moza,

⁴³ As hooar Moza Binea, as Rephaiah e vac-syn, Eleasah e vac-syn, Azel e vac-syn.

⁴⁴ As ec Azel va shey mec, ny enmyn oc ta Azrikam, Bocheru, as Ishmael, as Sheariah, as Obadiah, as Hanan. Ad shoh va mec Azel.