1 Recortyssyn 5 - Yn Vible Casherick 1775 1819

CAB. V

¹ Nish mec Reuben, mac shinney Israel, (son eshyn by-hinney va, agh son wheesh as dy ren eh aggair da lhiabbee e ayrey, va cairys e eiraght er ny choyrt da mec Yoseph, mac Israel: as cha vel coontey ny sheelogheyn oc dy ve er ny ghoaill cordail rish nyn ruggey.

² As ghow Judah raad jeh e vraaraghyn, as jehsyn haink yn ard-er-reill; agh va cairys yn eiraght lesh Joseph:)

³ Mec Reuben, mac shinney Israel va, Hanoch, as Pallu, Hezron, as Carmi.

⁴ Mec Joel; Shemaiah e vac, Gog e vac, Shimei e vac,

⁵ Micah e vac, Reaia e vac, Baal e vac,

⁶ Beerah e vac, hug Tiglath-pileser ree Assyria lesh ersooyl ayns cappeeys: eshyn va prince ny Reubeniteyn.

⁷ As jeh e vraaraghyn rere nyn gynneeyn, (tra va coontey ny sheelogheyn oc er ny ghoaill) ny ard-gheiney va, Jeiel, as Zechariah,

⁸ As Bela mac Azaz, mac Shema, mac Joel, va cummal ayns Aroer, eer gys Nebo, as Baal-meon.

⁹ As lesh y shiar, va e chummal gys oirr yn aasagh, veih awin Euphrates: son dy row’n maase oc er ny vishaghey ayns cheer Ghilead.

¹⁰ As rish lhing Saul, ren ad caggey rish ny Hagariteyn, huitt liorish nyn laueyn: as ren ad cummal ayns ny cabbaneyn oc trooid ooilley’n cheer shiar jeh Gilead.

¹¹ As ren cloan Ghad cummal harrish nyn ’oï, ayns cheer Vashan, gys Salcah:

¹² Joel yn ard-er, as Shaphan by-niessey da, as Jaanai, as Shaphat ayns Bashan.

¹³ As ny braaraghyn oc jeh thie nyn ayrey va, Michael, as Meshullam, as Sheba, as Jorai, as Jachan, as Zia, as Heber, shiaght.

¹⁴ Ad shoh cloan Abihail, mac Huri, mac Jaroah, mac Ghilead, mac Michael, mac Jeshishai, mac Jahdo, mac Buz,

¹⁵ Ahi mac Abdiel, mac Guni, yn ard-er jeh thie e ayrey.

¹⁶ As ren ad baghey ayns Gilead ec Bashan, as ayns e ard-valjyn, as ayns ooilley ny baljyn-beggey mygeayrt Sharon, derrey ny cagliaghyn echey.

¹⁷ V’ad shoh ooilley er nyn earroo, rere nyn gynneeyn, ayns laghyn Yotham ree Yudah, as ayns laghyn Yeroboam ree Israel.

¹⁸ Mec Reuben, as ny Gaditeyn, as lieh-tribe Vanasseh, deiney dunnal, deiney aghtal dy loaghtey scape as cliwe, as dy lhiggey lesh y vhow, as schleioil ayns caggey, va kiare thousaneyn as da-eed shiaght cheead as three-feed, hie magh gys y chaggey.

¹⁹ As ren ad caggey rish ny Hagariteyn, rish Jetur, as Nephish, as Nodab.

²⁰ As hooar ad y varriaght orroo, as va ny Hagariteyn er nyn livrey gys y laue oc, as ooilley ny va mâroo: son deïe ad gys Jee ayns y chaggey, as hug eh clashtyn daue, er-yn-oyr dy dug ad nyn marrant er.

²¹ As ghow ad ersooyl nyn maase; jeh ny camelyn oc jeih thousaneyn as da-eed, as jeh ny kirree daa cheead as jeih as da-eed dy housaneyn, as jeh assylyn daa housane, as dy gheiney keead thousane.

²² Son va ymmodee jeu er ny stroie, son va’n caggey veih Jee. As ren ad baghey ayns ny ynnydyn oc, derrey’n chappeeys.

²³ As ren cloan lieh-tribe Vanasseh cummal ayns y cheer: ren ad skeayley veih Bashan gys Baal-hermon, as Senir, as gys cronk Hermon.

²⁴ As v’ad shoh king thie nyn ayraghyn, eer Epher, as Ishi, as Eliel, as Azriel, as Jeremiah, as Hodaviah, as Jahdiel, deiney niartal caggee, deiney ooasle, as king thie nyn ayraghyn.

²⁵ As ren ad peccah noi Jee nyn ayraghyn, as hie ad er-shaghryn geiyrt er jeeghyn pobble y cheer, ren Jee y stroie kiongoyrt roo.

²⁶ As ren Jee Israel greinnaghey seose spyrryd Phul ree Assyria, as spyrryd Tiglath-pileser ree Assyria: as chur eh lesh ad ersooyl, (eer ny Reubeniteyn, as ny Gaditeyn, as y lieh-tribe Vanasseh) as hoie eh ad ayns Halah, as Habor, as Hara, as choud’s awin Gozan, gys y laa t’ayn jiu.