1 Recortyssyn 4 - Yn Vible Casherick 1775 1819

CAB. IV

¹ Mec Yudah; Pharez, Hezron, as Carmi, as Hur, as Shobal,

² As hooar Reaiah, mac Shobal, Jahath, as hooar Jahath Ahumai, as Lahad. Ad shoh kynneeyn ny Zorathiteyn.

³ As v’ad shoh jeh sluight ayr Etam; Jezreel, as Ishma, as Idbash: as va ennym nyn shuyr Hazelelponi.

⁴ As Penuel ayr Ghedor, as Ezer ayr Hushah, Ad shoh mec Hur, mac shinney Ephratah, ayr Beth-lehem.

⁵ As v’ec Ashur, ayr Tekoa, daa ven, Helah, as Naarah.

⁶ As dymmyrk Naarah da, Ahuzam, as Hepher, as Temeni, as Haahashtari. V’ad shoh mec Naarah.

⁷ As va mec Helah, Zereth, as Jezoar, as Ethnan.

⁸ As hooar Coz Anub, as Zobebah, as kynneeyn Aharhel, mac Harum.

⁹ As va Jabez ny s’ooasle na e vraaraghyn: as denmys e voir eh Jabez, gra, Er-yn-oyr dy dymmyrk mee eh lesh trimshey.

¹⁰ As deïe Jabez gys Jee Israel, gra, Oh dy jinnagh oo mish y vannaghey dy jarroo, as my ardjyn y heeyney magh, as dy bee dty laue mârym dy my reayll veih tranlaase, nagh bee’m seaghnit liorish. As hug Jee e yeearree da.

¹¹ As hooar Chelub, braar Shuah, Mehir, va ayr Eshton.

¹² As hooar Eshton Beth-rapha, as Paseah, as Tehinnah ayr Ir-nahash. T’ad shoh deiney Rechah.

¹³ As mec Kenaz, Othniel, as Seraiah: as mac Othniel, Hathath.

¹⁴ As hooar Meonothai Ophrah: as hooar Seraiah Joab, ayr chummaltee coan Charashim, son fir-cheirdee v’ad.

¹⁵ As mec Chaleb, mac Jephunneh, Iru, Elah, as Naam: as mac Elah, Kenaz.

¹⁶ As mec Jehalaleel, Ziph, as Ziphah, Tiria, as Asareel.

¹⁷ As mec Ezra va, Jether, as Mered, as Epher, as Jalon: as dymmyrk ee Miriam, as Shammai, as Ishbah, ayr Eshtemoa.

¹⁸ As dymmyrk y ven echey Jehudijah Jered ayr Ghedor, as Heber ayr Socho, as Jekuthiel ayr Zanoah. As ad shoh mec Bithiah, inneen da Pharaoh, ren Mered y ghoaill.

¹⁹ As mec y ven echey Hodiah shuyr Naham, ayr Keilah yn Garmite, as Eshtemoa yn Maachathite.

²⁰ As mec Shimon v’ad, Ammon, as Rinnah, Ben-hanan, as Tilon. As mec Ishi v’ad, Zoheth, as Ben-zoheth.

²¹ Mec Shelah, mac Yudah, v’ad, Er ayr Lecah as Laadah ayr Mareshah, as y sluight ocsyn va fee aanrit keyl, jeh thie Ashbea,

²² As Jokim, as deiney Chozeba, as Joash, as Saraph, va reill ayns Moab, as Jashubi-lehem. As va shoh foddey er-dy-henney.

²³ V’ad shoh fir-chraie, as adsyn va cummal mastey ny garaghyn-feeyney, as magheryn: shen y raad va nyn gummal mysh obbyr y ree.

²⁴ Mec Simeon va, Nemuel, as Jamin, Jarib, Zerah, as Shaul:

²⁵ Shallum mac Shaul, Mibsam mac Shallum, Mishma mac Mibsam.

²⁶ As mec Mishma; Hamuel e vac, Zacchur e vac, Shimei e vac.

²⁷ As va shey mec jeig ec Shimei, as shey inneenyn; agh cha row cooid vooar dy chloan ec e vraaraghyn, chamoo ren ooilley’n sluight oc bishaghey, myr cloan Yudah.

²⁸ As ren ad cummal ec Beer-sheba, as Moladah, as Hazar-shual,

²⁹ As ec Bilhah, as ec Ezen, as ec Tolad,

³⁰ As ec Bethuel, as ec Hormah, as ec Ziklag,

³¹ As ec Beth-marcaboth, as ec Hazar-susim, as ec Beth-birei, as ec Shaaraim: ad shoh va ny ard-valjyn oc rish lhing Ghavid.

³² As va ny baljyn oc, Etam, as Ain, Rimmon, as Tochen, as Ashan, queig baljyn.

³³ As ooilley ny baljyn-beggey va mysh ny ard-valjyn cheddin, derrey Baal. Shoh nyn gummallyn, as shoh nyn sheelogheyn.

³⁴ As Meshobab, as Jamlech, as Joshah, mac Amaziah,

³⁵ As Joel, as Jehu mac Josibiah, mac Seraiah, mac Asiel,

³⁶ As Elioenai, as Jaakobah, as Jeshohaiah, as Asaiah, as Adiel, as Jesimiel, as Benaiah,

³⁷ As Ziza mac Shiphi, mac Allon, mac Jedaiah, mac Shimri, mac Shemaiah.

³⁸ V’ad shoh, ta nish enmyssit, princeyn mastey nyn sheelogheyn: as ren thie ny ayraghyn oc bishaghey dy mooar.

³⁹ As hie ad gys cagliagh Ghedor, eer gys cheu-har y choan, dy hirrey pastyr son nyn shioltaneyn.

⁴⁰ As hooar ad pastyr menoyr as mie, as va’n cheer lhean, as sauchey, as sheeoil: son va cloan Ham er vaghey ayns shen ry-foddey dy hraa.

⁴¹ As haink ad shoh roïe enmyssit, rish lhing Hezekiah, ree Yudah, as ghow ad ny cabbaneyn oc, as ny cummallyn v’ayns shen, as stroie ad dy bollagh ad gys y laa jiu, as ren ad baghey ayns nyn ynnydyn: er-yn-oyr dy row pastyr ayns shen son nyn shioltaneyn.

⁴² As hie sheshaght jeh mec Simeon, eer queig cheead dooinney gys cronk Seir fo leeideilagh nyn gaptanyn Pelatiah, as Neariah, as Rephaiah, as Uzziel mac Ishi.

⁴³ As stroie ad yn chooid elley jeh ny Amalekiteyn v’er scapail, as ren ad cummal ayns shen gys y laa t’ayn jiu.