1 Recortyssyn 27 - Yn Vible Casherick 1775 1819

CAB. XXVII

¹ Nish cloan Israel lurg nyn earroo, ta shen, ny ard ayraghyn, as captanyn thousaneyn, as keeadyn, as ny fir-oik oc va shirveish y ree ayns nyn goorseyn, hie magh as stiagh shirveish, mee as mee, car ny bleeaney, jeh dagh coorse va kiare thousaneyn as feed.

² Harrish y chied choorse son y chied vee, va Jashobeam mac Zabdiel: as y choorse echeysyn va kiare thousaneyn as feed.

³ Jeh cloan Perez, yn ard-er jeh ooilley ny captanyn y cheshaght son y chied vee.

⁴ As harrish coorse y nah vee, va Dodai yn Ahohite, as jeh’n choorse echeysyn va Mikloth myrgeddin yn ard-chaptan: ayns y choorse echeysyn neesht va kiare thousaneyn as feed.

⁵ Yn trass chaptan jeh’n cheshaght son y trass vee, va Benaiah, mac Jehoiada, ard leeideilagh: ayns y choorse echeysyn va kiare thousaneyn as feed.

⁶ Shoh’n Benaiah cheddin va ny ard-er, as erskyn ny jeih as feed, as ayns y choorse echeysyn va Ammizabad e vac.

⁷ Yn chiarroo chaptan son y chiarroo vee, va Asahel braar Yoab, as Zebadiah e vac by-niessey da: as ayns y choorse echeysyn va kiare thousaneyn as feed.

⁸ Yn wheiggoo chaptan son y wheiggoo vee, va Shamhuth yn Izrahite: as ayns e choorse va kiare thousaneyn as feed.

⁹ Yn cheyoo chaptan son y cheyoo vee, Ira mac Ikkesh, yn Tekoite: as ayns e choorse va kiare thousaneyn as feed.

¹⁰ Yn chiaghtoo chaptan son y chiaghtoo vee va, Helez yn Pelonite, jeh cloan Ephraim: as ayns y choorse echeysyn va kiare thousaneyn as feed.

¹¹ Yn hoghtoo chaptan son yn hoghtoo vee va, Sibbecai yn Hushathite, jeh ny Zarhiteyn; as ayns e choorse va kiare thousaneyn as feed.

¹² Yn nuyoo chaptan son yn nuyoo vee, va Abiezer yn Anetothite jeh ny Benjamiteyn; as ayns e choorse va kiare thousaneyn as feed.

¹³ Yn jeihoo chaptan son y jeihoo vee, va Maharai yn Netophathite, jeh ny Zarhiteyn: ayns e choorse va kiare thousaneyn as feed.

¹⁴ Yn un chaptan yeig son yn un vee yeig va Benaiah yn Pirathonite, jeh cloan Ephraim: as ayns e choorse va kiare thousaneyn as feed.

¹⁵ Yn nah chaptan yeig son y nah vee yeig, va Heldai yn Netophathite, jeh Othniel: as ayns e choorse va kiare thousaneyn as feed.

¹⁶ Myrgeddin harrish tribeyn Israel: fir-reill ny Reubeniteyn, va Eliezer mac Zichri: jeh ny Simeoniteyn, Shephatiah mac Maachah:

¹⁷ Jeh ny Leviteyn, Hashabiah mac Kemuel; jeh ny Aaroniteyn, Zadok:

¹⁸ Jeh Judah, Elihu fer jeh braaraghyn Ghavid: jeh Issachar, Omri mac Michael:

¹⁹ Jeh Zebulun, Ishmaiah mac Obadiah: jeh Naphtali, Jerimoth mac Azriel:

²⁰ Jeh cloan Ephraim, Hosea mac Azaziah: jeh lieh-tribe Vanasseh, Joel mac Pedaiah:

²¹ Jeh lieh-tribe Vanasseh ayns Gilead, Iddo mac Zechariah: jeh Benjamin, Jaasiel mac Abner:

²² Jeh Dan, Azareel mac Jeroham. Ad shoh va princeyn harrish tribeyn Israel.

²³ Agh cha ghow David yn earroo oc veih feed bleïn dy eash as fo: er-yn-oyr dy row’n Chiarn er ghra, dy jinnagh eh Israel y vishaghey myr rollageyn yn aer.

²⁴ Ren Joab mac Zeruiah toshiaght dy ghoaill yn earroo oc, agh cha jagh eh trooid lesh, er-yn-oyr kyndagh rish shoh dy huitt jymmoose er Israel; chamoo va’n earroo er ny choyrt ayns coontey recortyssyn ree Ghavid.

²⁵ As harrish tashtaghyn y ree va Azmaveth mac Adiel; as harrish ny thieyn-stoyr ayns ny magheryn, ayns ny ard-valjyn, as ny baljyn-cheerey, as ayns ny cashtallyn, va Jehonathan mac Uzziah.

²⁶ As harroosyn va mysh obbyr magheragh, as messyn y thallooin, va Ezri, mac Chelub.

²⁷ As harrish ny garaghyn-feeyney va Shimei yn Ramathite; as harrish ny cellar-yn-feeyney ayns ny garaghyn, va Zabdi yn Shiphmite.

²⁸ As harrish ny biljyn-olive, as ny biljyn-figgagh v’ayns y thalloo injil, va Baal-hanan yn Gederite: as harrish ny cellaryn-ooil va Joash.

²⁹ As harrish y maase va goaill ayns Sharon va Shitrai yn Sharonite: as harrish y maase va goaill ayns ny coanyn, va Shaphat mac Adlai.

³⁰ Harrish ny camelyn neesht, va Obil yn Ishmaelite: as harrish ny assylyn, va Jehdeiah yn Meronothite.

³¹ As harrish ny shioltaneyn, va Jaziz yn Hagerite. V’ad shoh ooilley nyn stiurtyn harrish cooid ree Ghavid.

³² Va Jonathan, naim Ghavid neesht, ny er-coyrlee, dooinney creeney, as scrudeyr; as Jehiel mac Hachmoni, va fer-ynsee mec y ree.

³³ As Ahitophel va fer-coyrlee yn ree, as Hushai yn Archite va sheshey da’n ree.

³⁴ As lurg Ahitophel, va Jehoiada mac Benaiah, as Abiathar: as yn ard-chaptan er ooilley armee’n ree va Joab.