1 Recortyssyn 26 - Yn Vible Casherick 1775 1819

CAB. XXVI

¹ Mychione gard ny giattyn: jeh ny Korhiteyn va Meshelemiah mac Kore, jeh mec Asaph.

² As mec Meshelemiah v’ad Zechariah yn mac shinney, Jediael yn nah, Zebadiah yn trass, Jathniel yn chiarroo,

³ Elam yn wheiggoo, Jehohanan yn cheyoo, Elioenai yn chiaghtoo.

⁴ As mec Obed-edom v’ad, Shemaiah yn mac shinney, Jehozabad yn nah, Joah yn trass, as Sacar yn chiarroo, as Nethaneel yn wheiggoo,

⁵ Ammiel y cheyoo, Issachar yn chiaghtoo, Peulthai yn hoghtoo: son va Jee er vannaghey eh.

⁶ Da Shemaiah e vac myrgeddin va ruggit mec, va reill ayns thie nyn ayrey: son v’ad deiney niartal as dunnal.

⁷ Mec Shemaiah, Othni, as Rephael, as Obed, Elzabad, ny braaraghyn oc va deiney trean; Elihu as Semachiah.

⁸ Ad shoh ooilley, jeh mec Obed-edom: ad-hene, nyn mec, as nyn mraaraghyn, deiney fondagh, niartal son y chirveish, v’ad three-feed as jees, jeh Obed-edom.

⁹ As va ec Meshelemiah mec as braaraghyn, deiney lajer, hoght-jeig.

¹⁰ Va ec Hosah, jeh cloan Merari, mec; Simri yn ard-er, (son ga nagh row eh yn mac shinney, ny-yeih ren e ayr eh yn ard-er;)

¹¹ Hilkiah yn nah er, Tebaliah yn trass, Zechariah yn chiarroo: va ooilley mec as braaraghyn Hosah three-jeig.

¹² Nyn mast’ oc shoh va gard ny giattyn er nyn rheynn, eer mastey ny ard-gheiney, freaylley gard noi-ry-hoi, dy hirveish ayns thie’n Chiarn.

¹³ As hilg ad lottyn chammah son beg as mooar, rere thie nyn ayraghyn, son dagh giat.

¹⁴ As son y cheu har, huitt y cronney gys Shelemiah; eisht gys Zechariah e vac (dooinney creeney lowal) hilg ad lottyn, as huitt y cronney echeysyn my-hwoaie.

¹⁵ Gys Obed-edom my-yiass; as gys e vec, thie Asuppim.

¹⁶ Gys Shuppim as Hosah, haink y cronney magh er y cheu-heear, lesh y yiat Shallecheth, rish y phavement ard, gard noi gard, er dagh cheu jeh’n chiamble.

¹⁷ Er y cheu har, va shey Leviteyn, er y cheu-twoaie kiare ’sy laa, er y cheu jiass kiare ’sy laa, as gys Asuppim jees as jees.

¹⁸ Ec Parbar ec y cheu-heear, kiare ec y phavement ard, as jees ec Parbar.

¹⁹ Shoh myr va ny gardyn er nyn rheynn mastey mec Kore, as mastey mec Merari.

²⁰ As jeh ny Leviteyn, Ahijah va harrish tashtaghyn thie Yee, as harrish tashtaghyn y chooid chasherick.

²¹ Mychione mec Laadan; jeh mec Laadan yn Gershonite, ard-gheiney jeh thie Laadan y Gershonite, va Jehiel, as e vec.

²² Agh va Jehiel, Zetham, as Joel, e vraaraghyn soit harrish tashtaghyn thie’n Chiarn.

²³ Jeh ny Amramiteyn, as ny Izhariteyn, ny Hebroniteyn, as ny Uzzieliteyn:

²⁴ As er Shebuel mac Ghershom, mac Voses, va ard churrym ny tashtaghyn.

²⁵ As e vraaraghyn liorish Eliezer; Rehabiah e vac-syn, as Jeshaiah e vac-syn, as Joram e vac-syn, as Zichri e vac-syn, as Shelomith e vac-syn:

²⁶ Shelomith cheddin as e vraaraghyn, va harrish ooilley tashtaghyn y chooid chasherick, va David y ree, as ny ard ayraghyn, ny captanyn harrish thousaneyn as keeadyn, as captanyn ny sheshaghtyn-caggee er chasherickey.

²⁷ Jeh’n spooilley chossyn ad ayns caggey, ren ad ayrn y chasherickey, dy choamrey thie’n Chiarn.

²⁸ As ooilley ny va Samuel y phadeyr, as Saul mac Kish, as Abner mac Ner, as Joab mac Zeruiah er chasherickey; as quoi-erbee va er chasherickey nhee erbee, ve fo currym Shelomith, as e vraaraghyn.

²⁹ Jeh ny Izhariteyn, va Chenaniah, as e vec, son offishearyn as briwnyn ayns cooishyn elley harrish Israel.

³⁰ As jeh ny Hebroniteyn, Hashabiah as e vraaraghyn, deiney dunnal, thousane as shiaght cheead, va nyn vir-oik harrish Israel cheu shoh dy Yordan lesh y sheear, ayns ooilley cooishyn y Chiarn, as ayns shirveish y ree,

³¹ Mastey ny Hebroniteyn, eer ny Hebroniteyn hene, va Jerijah yn ard-er, rere kynneeyn e ayraghyn. Ayns y da-eedoo vleïn jeh reill Ghavid, va coontey er ny ghoaill jeu, as va ry-gheddyn nyn mast’ deiney dunnal as niartal, ec Jazer Ghilead.

³² As e vraaraghyn, deiney niartal, v’ad daa housane as shiaght cheead, ard ayraghyn, ad va ree David er n’yannoo fir-reill harrish ny Reubeniteyn, ny Gaditeyn, as lieh-tribe Vanasseh, son dy chooilley chooish va bentyn gys Jee, as cooishyn y ree.