1 Recortyssyn 23 - Yn Vible Casherick 1775 1819

CAB. XXIII

¹ Myr shen tra va David shenn, as ymmodee laghyn er gholl harrish, ren eh Solomon e vac ny ree harrish Israel.

² As haggil eh cooidjagh ooilley princeyn Israel, marish ny saggyrtyn as ny Leviteyn.

³ Nish va coontey ny Leviteyn er ny ghoaill veih jeih bleeaney as feed as er-e-skyn: as va’n earroo oc, dooinney as dooinney, hoght thousaneyn jeig as feed.

⁴ Jeu va kiare thousaneyn as feed nyn oaseiryn dy choyrt obbyr thie Yee er e hoshiaght, as va shey thousaneyn son offishearyn, as briwnyn:

⁵ Mâroo shoh va kiare thousaneyn son gard er ny giattyn: as va kiare thousaneyn dy choyrt moylley da’n Chiarn lesh ny greinyn-kiaullee ren mish y yannoo, dooyrt David, dy choyrt moylley lhieu.

⁶ As rheynn David ad ayns sheshaghtyn mastey mec Levi, ta shen, Gershom, Kohath, as Merari.

⁷ Jeh ny Gershoniteyn va Laadan, as Shimei,

⁸ Mec Laadan; yn ard-er, Jehiel, as Zetham, as Joel, three.

⁹ Mec Shimei; Shelomith, as Haziel, as Haran, three. Ad shoh va ard-gheiney ayraghyn Laadan.

¹⁰ As mec Shimei; Jahath, Zina, as Jeush, as Beriah. Va ny kiare shoh mec Shimei.

¹¹ As Jahath va’n chied er, as Zizah yn nah er: agh cha row mooarane mec ec Jeush as Beriah; shen-y-fa v’ad ’syn un choontey ayns thie nyn ayrey.

¹² Mec Kohath; Amram, Izhar, Hebron, as Uzziel, kiare.

¹³ Mec Amram; Aaron as Moses: as va Aaron soit er-lheh, dy hirveish ayns yn ynnyd smoo casherick, eh-hene as e vec dy kinjagh, dy hebbal incense kiongoyrt rish y Chiarn, dy yannoo shirveish da, as dy vannaghey ayns e ennym son dy bragh.

¹⁴ Nish son Moses yn dooinney dy Yee, va ny mec echeysyn er nyn goontey ayns tribe Levi.

¹⁵ Mec Voses va, Gershom as Eliezer.

¹⁶ Jeh mec Ghershom, Shebuel va’n ard-er.

¹⁷ As mec Eliezer va, Rehabiah yn ard-er: as cha row veg arragh dy vec ec Eliezer: agh va ymmodee ec Rehabiah.

¹⁸ Jeh mec Izhar, Shelomith yn ard-er.

¹⁹ Jeh mec Hebron, Jeriah yn chied er, Amariah yn nah er, Jahaziel yn trass er, as Jekameam yn chiarroo er.

²⁰ Jeh mec Uzziel, Micah yn chied er, as Jesiah yn nah er.

²¹ Mec Merari, Mahli as Mushi: mec Mahli, Eleazar as Kish:

²² As hooar Eleazar baase, as cha row mec echey agh inneenyn: as ren ny deiney mooinjerey oc, mec Kish, ad y phoosey.

²³ Mec Mushi, Mahli, as Eder, as Jeremoth, three.

²⁴ Ad shoh va mec Levi rere thie nyn ayraghyn, eer ny ard-ayraghyn, myr va ny enmyn oc er ny ghoaill ’syn [nah] choontey mysh obbyr shirveish thie’n Chiarn, veih feed bleïn dy eash as seose er.

²⁵ Son dooyrt David, Ta’n Chiarn Jee Israel er choyrt fea da e phobble, dy vod ad cummal ayns Jerusalem dy kinjagh;

²⁶ As rish ny Leviteyn myrgeddin: cha bee eh orroo arragh dy ymmyrkey’n cabbane-agglish, ny veg jeh ny siyn son y chirveish echey.

²⁷ Son liorish oardys s’jerree Ghavid, va ny Leviteyn coontit veih feed bleïn dy eash as er-e-skyn:

²⁸ Er-yn-oyr dy row’n oik ocsyn dy hirveish fo mec Aaron, ayns obbyr thie’n Chiarn, ayns ny cooyrtyn, as ayns ny shamyryn, as ayns glenney ooilley ny reddyn casherick, as ayns obbyr shirveish thie Yee:

²⁹ Chammah son yn arran casherick, as son y flooyr meein son oural-arran, keeakyn oorey, as berreenyn panney, as cre-erbee ta aarlit ayn, as son dy chooilley horch dy howse as thummyd.

³⁰ As dy hassoo gagh moghrey dy choyrt booise as moylley da’n Chiarn, as gagh fastyr myrgeddin;

³¹ As dy ve ec chebbal ooilley ny ourallyn-losht gys y Chiarn er ny dooneeyn, er ny eaystyn-noa, as er ny laghyn feailley pointit, lurg nyn earroo, cordail rish yn order v’er ny harey daue dy kinjagh fenish y Chiarn:

³² As dy reayll currym y chabbane-agglish, eer currym yn ynnyd casherick, as currym mec Aaron nyn mraaraghyn, ayns shirveish thie’n Chiarn.