1 Recortyssyn 22 - Yn Vible Casherick 1775 1819

CAB. XXII

¹ Eisht dooyrt David, Ayns y voayl shoh vees thie’n Chiarn Jee, as ayns shoh vees altar yn oural-losht da Israel.

² As doardee David dy haglym cooidjagh ny joarreeyn v’ayns cheer Israel; as hug eh masoonee dy yiarey claghyn obbrit dy hroggal thie Yee.

³ As chiare David ro-laue palchey yiarn dy yannoo treinaghyn son coollaghyn ny giattyn, as son ny jeushanyn; as palchey prash erskyn towse:

⁴ As niart biljyn-cedar: son hug ny Zidonianee, as ny Tyrianee lhieu lane fuygh-cedar gys David.

⁵ As dooyrt David, Ta my vac Solomon aeg as meiygh, as y thie ta dy ve troggit da’n Chiarn, te dy ve yindyssagh ard as aalin, gloyroil as jeh goo mooar trooid dy chooilley heer: nish er-y-fa shen neem’s kiarail er e hon. Myr shen hooar David aarloo palchey jeh dy chooilley nhee ymmyrchagh roish e vaase.

⁶ Eisht deïe eh son Solomon e vac, as hug eh currym er dy hroggal thie da’n Chiarn Jee Israel.

⁷ As dooyrt David rish Solomon, My vac, ve ayns m’aigney’s dy hroggal thie gys ennym y Chiarn my Yee:

⁸ Agh haink goo’n Chiarn hym, gra, T’ou uss er ve dty ghooinney folley, as dy kinjagh ayns caggaghyn mooarey: cha nee uss nee thie y hroggal gys m’ennym’s, er-yn-oyr dy vel oo er gheayrtey lane fuill er y thalloo ayns my hilley.

⁹ Cur-my-ner, bee mac er ny ruggey dhyt’s, vees dooinney dy hee; as ver-yms fea da veih ooilley e noidyn er dy chooilley heu: son bee’n ennym echey Solomon, as ver-yms shee as fea da Israel rish y lhing echey.

¹⁰ Nee eshyn thie y hroggal gys m’ennym’s, as bee eh son mac dooys, as beem’s ayr dasyn, as neem’s stoyl-reeoil e reeriaght y hickyraghey harrish Israel son dy bragh.

¹¹ Nish my vac, yn Chiarn dy row mayrt; as gow er dty hoshiaght lesh aïgh mie, as trog thie yn Chiarn dty Yee, myr t’eh er ghra, my-dty-chione.

¹² Erskyn ooilley dy der y Chiarn dhyt’s creenaght as tushtey, dy ghoaill ort y currym dy reill Israel, as dy reayll leigh’n Chiarn dty Yee;

¹³ Eisht nee oo bishaghey, my vees oo imneagh, dy chooilleeney ny slattyssyn as ny briwnyssyn shen, hug y Chiarn ayns currym da Moses mychione Israel: bee creeoil as dunnal; ny gow aggle, ny caill dty chree.

¹⁴ Nish cur-my-ner, ta mish dy deinagh er chiarail son thie’n Chiarn keead talent dy airh, as thousane talent dy argid; as prash, as yiarn erskyn towse; (te erskyn towse) ta mee myrgeddin er gheddyn ro-laue fuygh as claghyn; as foddee uss coyrt huggey.

¹⁵ Marish shen, ta ayd mooarane obbreeyn, masoonee, as seyir, as dy chooilley horch dy gheiney schleioil, son dy chooilley cheint dy obbyr.

¹⁶ Dy airh, argid, prash, as yiarn, erskyn earroo. Trog ort, er-y-fa shen, as gow er dty hoshiaght, as y Chiarn dy row mayrt.

¹⁷ Hug David currym myrgeddin er ooilley princeyn Israel dy chooney lesh Solomon e vac, gra,

¹⁸ Nagh vel y Chiarn nyn Yee mêriu? as nagh vel eh er choyrt fea diu er dy chooilley heu? son t’eh er livrey cummaltee’n cheer gys my laue; as ta’n cheer er ny injillaghey kiongoyrt rish y Chiarn, as kiongoyrt rish e phobble.

¹⁹ Nish soie-jee nyn gree as nyn annym dy hirrey yn Chiarn nyn Yee; seose-jee eisht, as trog-jee cabbane-agglish y Chiarn Jee, dy choyrt lhieu arg conaant y Chiarn, as siyn casherick Yee, stiagh gys y thie ta dy ve troggit gys ennym y Chiarn.