1 Recortyssyn 21 - Yn Vible Casherick 1775 1819

CAB. XXI

¹ As hass Satan seose noi cloan Israel, as chleaynee eh David dy ghoaill yn earroo oc,

² As dooyrt David rish Joab, as rish fir-reill y phobble, Immee-jee, as gow-jee coontey cloan Israel veih Beer-sheba eer gys Dan; as cur-jee lhieu yn coontey oc hym’s, dy vod fys ’ve aym er.

³ As dreggyr Joab, Dy jean y Chiarn bishaghey yn pobble keead keayrt wheesh as t’ad: agh my hiarn as ree, nagh vel ad ooilley sharvaantyn my hiarn? cre’n-fa eisht ta my hiarn shirrey’n red shoh? cre’n-fa vees eh oyr dy hayrn loght er Israel?

⁴ Ny-yeih, ghow goan y ree raad noi Joab: shen-y-fa jimmee Joab roish, as hie eh trooid ooilley Israel, as haink eh gys Jerusalem.

⁵ As hug Joab stiagh slane coontey’n phobble da David. As ooilley adsyn jeh Israel v’ad, milley as keead thousane dy gheiney va son tayrn y cliwe: as va Judah kiare cheead three-feed as jeih thousaneyn, va son tayrn y cliwe.

⁶ Agh Levi as Benjamin cha ren eh coontey ny-vud oc: son va sarey’n ree dy trome noi aigney Yoab.

⁷ As kyndagh rish yn obbyr shoh va Jee er ny vrasnaghey; shen-y-fa woaill eh Israel.

⁸ As dooyrt David rish Jee, S’mooar ta my loght, son shen ta mee er n’yannoo: agh nish guee-ym ort, gow ersooyl peccah dty harvaant, son ta mee er n’yannoo dy feer neu-hushtagh.

⁹ As loayr y Chiarn rish Gad, phadeyr Ghavid, gra,

¹⁰ Immee, as insh da David, Myr shoh ta’n Chiarn dy ghra, Ta mee cur dhyt three chebbyn, gow dty reih jeu, dooys dy chooilleeney ort.

¹¹ Myr shen haink Gad gys David, as dooyrt eh rish, Myr shoh ta’n Chiarn dy ghra; Gow dty reih,

¹² Edyr three bleeaney dy ghortey, er-nonney son three meeaghyn dy ve stroit roish dty noidyn, (choud’s nee cliwe dty noid berraghtyn ort) er-nonney dy ve son three laa fo cliwe y Chiarn, eer y chramp ayns y cheer, as ainle y Chiarn stroie trooid magh ooilley ardjyn Israel. Nish er-y-fa shen, bee ec dty choyrle, cre’n ansoor ver-ym lhiam huggeysyn, ta dy my choyrt er y chaghteraght.

¹³ As dooyrt David rish Gad, Ta mee ayns chennid vooar: lhig dou nish tuittym fo laue’n Chiarn, (son s’mooar ta e vyghinyn) agh ny lhig dou tuittym ayns laue dooinney.

¹⁴ Myr shen hug y Chiarn y chramp er Israel: as huitt jeh Israel three-feed as jeih thousaneyn.

¹⁵ As hug Jee e ainle gys Jerusalem dy stroie eh; as myr v’eh stroie, chur y Chiarn my-ner, as ghow eh chymmey jeh’n stayd treih oc, as dooyrt eh rish yn ainle va stroie, S’lioar eh, tayrn back dty laue. As hass ainle y Chiarn liorish laare-vooie Ornan yn Jebusite.

¹⁶ As hrog David e hooillyn, as honnick eh ainle y Chiarn ny hassoo eddyr niau as y thalloo, lesh cliwe loamrit ny laue sheeynt magh harrish Jerusalem: eisht huitt David as shanstyr Israel, va coamrit ayns aanrit-sack, er nyn eddin.

¹⁷ As dooyrt David rish Jee, Nagh nee mish hug sarey dy ghoaill earroo’n phobble? mish hene t’er n’yannoo’n peccah, as yn olk shoh; agh er son ny kirree shoh, cre t’adsyn er n’yannoo? lhig da dty laue, guee-ym ort, O Hiarn my Yee, ve orrym’s, as er thie m’ayrey; agh cha nee er dty phobble, dy beagh adsyn er nyn gerraghey.

¹⁸ Eisht doardee ainle y Chiarn Gad dy ghra rish David, dasyn dy gholl seose, as altar y hroggal gys y Chiarn, ayns laare-vooie Ornan yn Jebusite.

¹⁹ As hie David seose er raa Ghad, loayr eh ayns ennym y Chiarn.

²⁰ As hyndaa Ornan back, as honnick eh yn ainle, as dollee eh eh-hene as ny kiare mec echey mârish. Nish va Ornan bwoalley curnaght.

²¹ As myr va David cheet quail Ornan, yeeagh Ornan as honnick eh David, as hie eh magh veih’n laare-vooie, as chroym eh eh-hene gys David lesh e eddin gys y thalloo.

²² Eisht dooyrt David rish Ornan, Cur dou grunt y laare-vooie shoh, dy voddym altar y hroggal er, gys y Chiarn: ver oo dou eh ec y slane price, dy vod y chramp v’er ny lhiettal veih’n pobble.

²³ As dooyrt Ornan rish David, Lhiat’s eh, as lhig da my hiarn y ree jannoo shen ny ta mie ayns e hilley: cur-my-ner ta mee cur dhyt myrgeddin dew son ourallyn-losht, as ny greïnyn-bwoallee son fuygh, as curnaght son oural-arran: ta mee stowal y slane.

²⁴ As dooyrt ree David rish Ornan, Nay; agh son shickyrys kionnee-yms eh ec y slane price: son cha goym shen ny ta lhiat’s da’n Chiarn, ny oural-losht y hebbal nastee.

²⁵ Myr shen hug David da Ornan son y ghrunt, shey cheead shekel dy airh ayns trimmid.

²⁶ As hrog David ayns shen altar gys y Chiarn, as heb eh ourallyn-losht, as ourallyn-shee, as deïe eh er y Chiarn; as dreggyr eh eh veih niau, liorish aile er altar yn oural-losht.

²⁷ As hug y Chiarn yn ainle fo harey; as hug eh seose e chliwe reesht ayns y fine.

²⁸ As ec y traa cheddin, tra honnick David dy ren y Chiarn freggyrt eh ayns laare-arroo Ornan y Jebusite; eisht heb eh oural ayns shen.

²⁹ (Son va cabbane-agglish y Chiarn va Moses er n’yannoo ayns yn aasagh, as altar yn oural-losht, ec y traa shen, ayns yn ard-ynnyd ec Gibeon.

³⁰ Agh cha by-loys da David goll kiongoyrt rish dy gheddyn coyrle veih Jee: son va aggle er kyndagh rish cliwe ainle y Chiarn).