1 Recortyssyn 18 - Yn Vible Casherick 1775 1819

CAB. XVIII

¹ Nish lurg shoh, haink eh gy-kione dy woaill David ny Philistinee, as hug eh ad fo-chosh, as ghow eh Gath as e baljyn ass laue ny Philistinee:

² As woaill eh Moab; as haink ny Moabiteyn dy ve fo reill Ghavid, as v’ad fo keesh.

³ As woaill David Hadarezer ree Zobah, ec Hamath, myr hie eh dy yannoo mie e reeriaght liorish awin Euphrates.

⁴ As ghow David veihsyn thousane fainagh, as shiaght thousane markee, as feed thousane coshee, as yiare David feh-yskid ooilley ny cabbil fainee, er-lhimmey jeh keead, dreill eh da hene.

⁵ As tra haink Syrianee Ghamascus dy chooney lesh Hadarezer, ree Zobah, varr David jeh ny Syrianee daa housane as feed dy gheiney.

⁶ Eisht hug David garrisonyn ayns Syria Damascus; as haink ny Syrianee dy ve fo reill Ghavid, as v’ad fo keesh. Shoh myr ren y Chiarn David y choadey raad erbee dy jagh eh.

⁷ As ghow David ny scapeyn airh, v’er sharvaantyn Hadarezer, as hug eh lesh ad gys Jerusalem.

⁸ Myrgeddin veih Tibhath, as veih Chun, ard-valjyn Hadarezer, ghow David palchey erskyn towse dy phrash, lesh ren Solomon yn faarkey prashey, as ny pillaryn, as ny siyn prashey.

⁹ Nish tra va Tou, ree Hamath, er chlashtyn dy row David er woalley ooilley sheshaght-caggee Hadarezer, ree Zobah,

¹⁰ Hug eh Hadoram e vac gys ree David lesh bea as slaynt huggey, as dy ghoaill boggey mârish, son dy row eh er chaggey noi Hadarezer, as er woalley eh, (son va Hadarezer er chaggey rish Tou) as er ghoaill veih dy chooilley horch dy hiyn airh, as argid, as prash.

¹¹ Ad shen myrgeddin ren David y chasherickey da’n Chiarn, marish yn argid as yn airh, hug eh lesh veih ooilley ny ashoonyn shoh; veih Edom, as veih Moab, as veih cloan Ammon, as veih ny Philistinee, as veih Amalek.

¹² As ren Abishai mac Zeruiah stroie jeh ny Edomiteyn ayns coan y tollan hoght thousane jeig.

¹³ As hug eh garrisonyn ayns Edom; as haink ooilley ny Edomiteyn dy ve fo reill Ghavid. Myr shoh ren y Chiarn David y choadey raad erbee dy jagh eh.

¹⁴ Myr shoh ren David reill harrish ooilley Israel, rheynn briwnys as cairys kiart, er ooilley e phobble.

¹⁵ As Joab, mac Zeruiah, va harrish y cheshaght-chaggee; as Jehoshaphat, mac Ahilud, cleragh ny lioaryn.

¹⁶ As Zadok, mac Ahitub, as Ahimelech mac Abiathar, va ny saggyrtyn; as Shavsha yn scrudeyr.

¹⁷ As Benaiah, mac Jehoiada va harrish ny Cherethiteyn, as ny Pelethiteyn; as mec Ghavid va ny ard-gheiney mygeayrt y ree.