1 Recortyssyn 16 - Yn Vible Casherick 1775 1819

CAB. XVI

¹ Myr shen hug ad lhieu arg Yee, as hoie ad eh ayns mean y chabbane va David er hroggal er e hon: as heb ad ourallyn-losht, as ourallyn-shee kiongoyrt rish Jee.

² As tra va David erreish chebbal ny ourallyn-losht, as ny ourallyn-shee, dy vannee eh yn pobble ayns ennym y Chiarn.

³ As rheynn eh er dagh unnane ayns Israel, chammah dooinney as ben, bwilleen arran, as peesh mie dy eill, as cappan feeyney.

⁴ As phoint eh sheshaght jeh ny Leviteyn dy hirveish kiongoyrt rish arg y Chiarn, as dy ockley magh, as dy choyrt booise, as moylley, da’n Chiarn Jee Israel:

⁵ Asaph y chied er, as by-niessey dasyn Zechariah, Jeiel, as Shemiramoth, as Jehiel, as Mattithiah, as Eliab, as Benaiah, as Obed-edom: as Jeiel lesh psaltereeyn, as lesh claasaghyn; agh ren Asaph kiaull lesh cymballyn.

⁶ Benaiah myrgeddin as Jahaziel ny saggyrtyn lesh trumpetyn dy kinjagh kiongoyrt rish arg conaant Yee.

⁷ Eisht, er y laa shen ren David toshiaght er y chirveish lesh y psalm shoh, ren eh livrey gys laue Asaph as e vraaraghyn, dy choyrt booise da’n Chiarn.

⁸ Cur-jee booise da’n Chiarn, eïe-jee er e ennym, jean-jee e obbraghyn y hoilshaghey mastey’n pobble.

⁹ Gow-jee arraneyn, gow-jee arraneyn-moyllee huggey, loayr-jee jeh ooilley e obbraghyn yindyssagh.

¹⁰ Gow-jee boggey ayns e ennym casherick; lhig da’n cree ocsyn ve gennal ta shirrey lurg y Chiarn.

¹¹ Shir-jee’n Chiarn as e niart, shir-jee e eddin dy kinjagh.

¹² Cooinee-jee er ny obbraghyn yindyssagh t’eh er n’yannoo, e virrilyn, as briwnyssyn e veeal;

¹³ O shiuish sluight Israel e harvaant, shiuish chloan Yacob e vooinjer reiht.

¹⁴ Eshyn y Chiarn nyn Yee, ta e vriwnyssyn ayns ooilley’n seihll.

¹⁵ Cooinee-jee dy kinjagh er e chonaant: yn goo t’eh er harey da thousaneyn dy heelogheyn;

¹⁶ Eer y conaant shen ren eh rish Abraham, as y breearrey hug eh da Isaac:

¹⁷ Shen doardee eh da Jacob son leigh, as da Israel son conaant dy bragh farraghtyn,

¹⁸ Gra, Dhyt’s ver-ym’s cheer Chanaan, cronney nyn eiraght.

¹⁹ Tra nagh row shiu agh beggan, eer beggan beg, as joarreeyn ayn;

²⁰ As tra v’ad scughey veih ashoon gys ashoon, as veih reeriaght gys reeriaght;

²¹ Cha lhig eh da dooinney erbee aggair ’yannoo daue: agh hug eh oghsan da eer reeaghyn er y ghraih oc,

²² Gra, Ny benn-jee rish my er-ooilit: as ny jean-jee veg yn aggair da my adeyryn.

²³ Gow-jee arrane gys y Chiarn, ooilley’n seihll: soilshee-jee magh e haualtys veih laa gy laa.

²⁴ Insh-jee magh e ghloyr mastey ny ashoonee; e obbraghyn yindyssagh mastey dy chooilley ashoon.

²⁵ Son s’mooar ta’n Chiarn, as dy mooar dy ve er ny voylley: ta aggle dy ve goit roish erskyn dy chooilley Yee.

²⁶ Son cha vel ooilley jeeghyn y pobble agh jallooyn; agh y Chiarn t’er chroo ny niaughyn.

²⁷ Ta gloyr as ooashley ayns e enish; ta niart as gennallys ayns ynnyd e chasherickys.

²⁸ Cur-jee da’n Chiarn, shiuish chynneeyn y pobble, cur-jee da’n Chiarn gloyr as niart:

²⁹ Cur-jee da’n Chiarn y ghloyr cooie da e ennym, cur-jee lhieu ourallyn, as tar-jee kiongoyrt rish: cur-jee ooashley da’n Chiarn ayns aalid e chasherickys.

³⁰ Gow-jee aggle kiongoyrt rish, ooilley’n seihll: bee’n seihll myrgeddin cha shickyr, nagh bee eh er ny scughey.

³¹ Lhig da ny niaughyn ve gennal, as lhig da’n thalloo boggey ghoaill: as lhig da ve raït mastey ny ashoonyn, Ta’n Chiarn reill.

³² Lhig da’n faarkey feiyral, lesh slane laanid: lhig da ny magheryn boggey ’ghoaill, as ooilley ny t’ayndoo.

³³ Eisht nee ooilley biljyn ny keylley troggal seose arrane fenish y Chiarn, son dy vel eh cheet dy vriwnys y theihll.

³⁴ O cur-jee booise da’n Chiarn; son s’mie t’eh: son ta e vyghin farraghtyn son dy bragh.

³⁵ As abbyr-jee, Saue shin, O Yee nyn saualtys, as chaggil shin cooidjagh, as livrey shin veih ny ashoonee, dy vod mayd booise ’choyrt da dty ennym casherick, as boggyssagh ayns dty voylley.

³⁶ Bannit dy row’n Chiarn Jee Israel son dy bragh. As dooyrt ooilley’n pobble, Amen, as hug ad moylley da’n Chiarn.

³⁷ As shoh myr daag eh ayns shen kiongoyrt rish arg conaant y Chiarn, Asaph as e vraaraghyn, dy yannoo shirveish kiongoyrt rish yn arg dy kinjagh, lurg nyn gurrym gagh-laa:

³⁸ As Obed-edom, marish nyn mraaraghyn three-feed as hoght; Obed-edom elley mac Jeduthun, as Hosah, dy ve porteryn:

³⁹ As Zadok y saggyrt, as e vraaraghyn ny saggyrtyn, kiongoyrt rish cabbane-agglish y Chiarn, ayns yn ard-ynnyd v’ec Gibeon,

⁴⁰ Dy hebbal ourallyn-losht gys y Chiarn er altar yn oural-losht kinjagh, moghrey as fastyr, as dy yannoo cordail rish ooilley ny ta scruit ayns leigh’n Chiarn, doardee eh da Israel:

⁴¹ As mâroosyn Heman as Jeduthun, as ny deiney reiht elley, va enmyssit, dy choyrt booise da’n Chiarn, son dy vel e vyghin farraghtyn son dy bragh;

⁴² As mâroosyn Heman as Jeduthun lesh trumpetyn as cymballyn son ard-vingys, as lesh greinyn-kiaullee elley dy choyrt moylley da Jee. As va mec Jeduthun ny porteryn.

⁴³ As hie ooilley’n pobble roue dagh dooinney gys e hie hene: as hyndaa David dy heeaney e hie hene.