1 Recortyssyn 14 - Yn Vible Casherick 1775 1819

CAB. XIV

¹ Nish hug Hiram ree Tyre chaghteryn gys David, as fuygh-cedar, marish masoonee, as seyir, dy hroggal thie da.

² As hoig David dy row’n Chiarn er hickyraghey eh ny ree harrish Israel: son va’n reeriaght echey dy mooar er ny niartaghey er graih e phobble Israel.

³ As ghow David huggey t’ooilley mraane ec Jerusalem: as hooar eh t’ooilley mec as inneenyn.

⁴ Nish shoh enmyn y chloan v’echey ayns Jerusalem; Shammua, as Shobab, Nathan, as Solomon,

⁵ As Ibhar, as Elishua, as Elpalet,

⁶ As Nogah, as Nepheg, as Japhia,

⁷ As Elishama, as Beeliada, as Eliphalet.

⁸ As tra cheayll ny Philistinee dy row David ooilit ny ree harrish ooilley Israel, hie ooilley ny Philistinee seose dy chaggey rish David. As cheayll David jeh, as hie eh magh nyn ’oï.

⁹ As haink ny Philistinee, as skeayl ad ad-hene ayns coan Rephaim.

¹⁰ As hir David coyrle veih Jee, gra, Jig eh lhiam goll seose noi ny Philistinee? as jean oo ad y livrey gys my laue? As dooyrt y Chiarn rish, Immee seose, son livrey-ym ad gys dty laue.

¹¹ Myr shen haink ad seose gys Baal-perazim, as woaill David ad ayns shen. Eisht dooyrt David, Ta Jee er vrishey stiagh er my noidyn lesh my laue, myr thooillaghyn ushtey: shen-y-fa denmys ad yn ynnyd shen Baal-perazim.

¹² As myr daag ad nyn yeeghyn ayns shen er sarey Ghavid, v’ad losht ’syn aile.

¹³ As hayrn ny Philistinee reesht ad-hene magh dy lhean ayns y choan.

¹⁴ As hir David reesht coyrle veih Jee; as dooyrt Jee rish, Ny gow geiyrt orroo, chyndaa dy lhiattee voue, as tar stiagh er y chooyl oc, trooid ny biljyn-mulberry.

¹⁵ As hig eh gy-kione, tra chlinnys oo sheean ayns mullagh ny biljyn-mulberry myr feiyr sleih er march, eisht gow magh dy chaggey: son ta Jee er n’gholl magh royd, dy woalley sheshaght ny Philistinee.

¹⁶ As ren David myr va Jee er harey; as woaill ad sheshaght ny Philistinee veih Gibeon gys Gazer.

¹⁷ As hie goo jeh David magh gys dy chooilley heer; as chur y Chiarn er dy chooilley ashoon dy ve ayns aggle roishyn.