1 Recortyssyn 13 - Yn Vible Casherick 1775 1819

CAB. XIII

¹ As ghow David coyrle marish ny captanyn thousaneyn as keeadyn, as marish dy chooilley leeideilagh.

² As dooyrt David rish ooilley sheshaght Israel va kionfenish, My s’taittin lhieu eh, as dy bee eh aigney’n Chiarn nyn Yee, lhig dooin fys y choyrt magh gys nyn mraaraghyn ayns dy chooilley ard, ta faagit ayns ooilley cheer Israel, as mâroosyn myrgeddin gys ny saggyrtyn as ny Leviteyn t’ayns nyn ard-valjyn, as mygeayrt-y-moo, dy bee ad er nyn jaglym cooidjagh hooin.

³ As lhig dooin cur lhien reesht arg nyn Yee hooin: son cha ren shin shirrey huggey son coyrle ayns laghyn Saul.

⁴ As dooyrt ooilley’n pobble, dy jinnagh ad myr shen: son va’n chooish mie ayns sooillyn ooilley’n pobble.

⁵ Myr shen haggil David ooilley Israel cooidjagh veih Shihor jeh Egypt, eer gys slystyn Hemath, dy chur lhieu arg Yee veih Kirjath-jearim.

⁶ As hie David seose, as ooilley Israel, gys Baalah, ta shen Kirjath-jearim, ayns Judah, dy chur lhieu seose veih shen arg Yee yn Chiarn, ta cummal eddyr ny cherubim, raad t’ad geamagh er e ennym.

⁷ As chur ad lhieu arg Yee ayns cart noa, ass thie Abinadab; as Uzza as Ahio ren geiyrt y chart.

⁸ As chloie David as ooilley Israel kiongoyrt rish Jee lesh ard choraa, as lesh kiaulleeaght, as lesh claasaghyn, as lesh psaltereeyn, as lesh timbrelyn, as lesh cymballyn, as lesh trumpetyn.

⁹ As tra haink ad gys laare-vooie Chidon, heeyn Uzza magh e laue, dy ymmyrkey fo yn arg: son ren ny dew snapperal.

¹⁰ As va corree’n Chiarn er ny vrasnaghey noi Uzza, as woaill eh eh, er-yn-oyr dy dug eh e laue er yn arg: as ayns shen hooar eh baase kiongoyrt rish Jee:

¹¹ As va David seaghnit, er-yn-oyr dy row’n Chiarn er n’yannoo brishey er Uzza; shen-y-fa ta’n ynnyd shen enmyssit Perez-uzza gys y laa jiu.

¹² As va David ayns aggle roish Jee er y laa shen, gra, Kys s’loys dou arg Yee ’ghoaill thie hym?

¹³ Myr shen cha dug David lesh yn arg thie huggey hene gys ard-valley Ghavid, agh chur eh lesh eh dy lhiattee stiagh gys thie Obed-edom yn Gittite.

¹⁴ As va arg Yee faagit ayns thie Obed-edom three meeaghyn. As vannee’n Chiarn Obed-edom, as ooilley ny v’echey.