1 Recortyssyn 12 - Yn Vible Casherick 1775 1819

CAB. XII

¹ Nish ad shoh adsyn haink gys David ec Ziklag, choud’s v’eh foast freayll eh-hene dy follit, kyndagh rish Saul mac Kish: as v’ad mastey ny deiney niartal, fir-choonee [Ghavid] ’sy chaggey.

² V’ad armit lesh bowghyn, as co-jesh lesh dagh laue, ayns ceau claghyn ass sling, as lhiggey sideyn ass bow, eer jeh kynney Saul jeh Benjamin.

³ Yn ard-er va Ahiezer, eisht Joash, mec Shemaah yn Gibeathite; as Jeziel, as Pelet, mec Azmaveth: as Berachah, as Jehu yn Antothite.

⁴ As Ishmaiah yn Gibeonite, dooinney niartal mastey ny jeih as feed, as erskyn ny jeih as feed; as Jeremiah, as Jahaziel, as Johanan, as Josabad yn Gederathite,

⁵ Eluzai, as Jerimoth, as Bealiah, as Shemariah, as Shephatiah yn Haruphite,

⁶ Elkanah, as Jesiah, as Azareel, as Joezer, as Jashobeam, ny Korhiteyn,

⁷ As Joelah, as Zebadiah, mec Jehoram jeh Gedor.

⁸ As jeh ny Gaditeyn haink stiagh gys David gys y charrick ’syn aasagh, deiney niartal, as reih deiney caggee, aghtal dy loaghtey shleiy as scape; ny eddinyn oc va goll-rish eddinyn lionyn, as gastey myr feeaih er ny sleityn:

⁹ Ezer y chied er, Obadiah yn nah er, Eliab y trass er,

¹⁰ Mishmannah yn chiarroo, Jeremiah yn wheiggoo,

¹¹ Attai yn cheyoo, Eliel yn chiaghtoo.

¹² Johanan yn hoghtoo, Elzabad yn nuyoo,

¹³ Jeremiah yn jeihoo, Machbanai yn un er jeig.

¹⁴ V’ad shoh jeh mec Ghad, captanyn ’sy cheshaght-chaggee, yn fer s’melley jeu va harrish keead, as y fer s’treanee harrish thousane.

¹⁵ Shoh adsyn hie harrish Jordan ayns y chied vee, tra va’n thooilley er lhieeney harrish ooilley e brooinyn; as deiyr ad ersooyl ooilley cummaltee ny coanyn, chammah shiar as sheear.

¹⁶ As haink sheshaght dy chloan Venjamin, as Yudah, gys y charrick raad va David.

¹⁷ As hie David magh nyn guail, as dreggyr eh, as dooyrt eh roo, My ta shiu er jeet hym dy sheeoil dy chooney lhiam, bee my chree sniemmit hiu: agh my ta shiu er jeet dy my vrah gys my noidyn, fakin nagh vel aggair ayns my laueyn, dy jean Jee nyn ayraghyn jeeaghyn er, as briwnys.

¹⁸ Eisht haink y spyrryd er Amasa, va’n ard-er jeh ny captanyn, as dooyrt eh; Lhiat’s ta shin, Ghavid, as er y cheu ayd’s, uss vac Yesse; shee, shee dy row hood, as shee gys dty ir-choonee; son ta dty Yee cooney lhiat. Eisht ren David goaill roo, as ren eh ad captanyn ’sy cheshaght.

¹⁹ As haink paart jeh Manasseh harrish gys David (tra hie eh marish ny Philistinee noi Saul gys y chaggey: agh cha ren ad cooney lhieu: son er aa-choyrle, hug chiarnyn ny Philistinee ersooyl eh, gra, Tuittee eh gys e vainshtyr Saul, gys gaue y vioys ainyn).

²⁰ Myr v’eh chyndaa gys Ziklag, huitt huggey jeh Manasseh, Adnah, as Jozabad, as Jediael, as Michael, as Jozabad, as Elihu, as Zilthai, captanyn thousaneyn Vanasseh.

²¹ As chooin ad lesh David noi sheshaght ny roosteyryn: son v’ad ooilley deiney niartal caggee, as captanyn ’sy cheshaght.

²² Son ec y traa shen haink ad laa lurg laa gys David dy chooney lesh, derrey ve sheshaght vooar caggee, ymmodee erskyn earroo.

²³ As shoh coontey ny sheshaghtyn va slane armit son y chaggey, as haink gys David gys Hebron, dy chaghlaa reeriaght Saul huggeysyn, cordail rish goo’n Chiarn.

²⁴ Cloan Yudah gymmyrkey scape as shleiy va shey thousaneyn as hoght cheead, slane armit son y chaggey.

²⁵ Jeh cloan Simeon, deiney niartal caggee dunnal, shiaght thousaneyn as un cheead.

²⁶ Jeh cloan Levi, kiare thousaneyn as shey cheead.

²⁷ As Jehoiada va leeideilagh ny Aaroniteyn, as mârish va three thousaneyn as shiaght cheead.

²⁸ As Zadok, dooinney aeg, niartal as dunnal, as jeh thie e ayrey daa chaptan as feed.

²⁹ As jeh cloan Venjamin dy chynney Saul, three thousaneyn: son gys y traa shoh, va’n ayrn smoo jeu er lhiantyn gys reill thie Saul.

³⁰ As jeh cloan Ephraim, feed thousane as hoght cheead, deiney niartal as dunnal, ooasle ayns thie nyn ayraghyn.

³¹ As jeh lieh-tribe Vanasseh hoght thousaneyn jeig hug stiagh nyn enmyn, dy heet as dy yannoo David ny ree.

³² As jeh cloan Issachar, va deiney tushtagh mysh ny imbaghyn, dy choyrt roish Israel cre v’oc dy yannoo: yn earroo oc va daa cheead; as va ooilley ny braaraghyn oc fo nyn reill.

³³ Jeh Zebulun, lheid as hie magh gys y chaggey, schleioil ’sy vagher, lesh dy chooilley ghreïe-caggee, jeih thousaneyn as da-eed, aghtal ayns nyn rankyn: cha row ad jeh cree dooble.

³⁴ As jeh Naphtali thousane captan, as mâroosyn, lesh scape as shleiy, shiaght-jeig as feed.

³⁵ As jeh ny Daniteyn, schleioil ayns caggey, hoght thousaneyn as feed as shey cheead.

³⁶ As jeh Asher, lheid as hie magh gys caggey, schleioil ’sy vagher, da-eed thousane.

³⁷ As er cheu elley dy Yordan jeh ny Reubeniteyn, as ny Gaditeyn, as jeh lieh-tribe Vanasseh, lesh dy chooilley horch dy ghreïnyn-caggee, shey-feed thousane.

³⁸ Ooilley ny deiney caggee shoh, va aghtal ’sy vagher-caggee, haink ad lesh aigney creeoil gys Hebron, dy yannoo David ny ree harrish ooilley Israel: as va ooilley’n chooid elley jeh Israel myrgeddin jeh un chree dy yannoo David ny ree.

³⁹ As shen y raad v’ad marish David three laa, gee as giu, son va nyn mraaraghyn er chiarail ro-laue dy palchey nyn gour.

⁴⁰ Adsyn myrgeddin v’er-gerrey daue, eer derrey Issachar, as Zebulun, as Naphtali, hug ad lhieu er assylyn, as er camelyn, as er muleyn, as er dew, arran, as feill, meinn, as cabbaagyn-figgagh, as dossanyn dy raisinyn, as feeyn, as ooil, as dew, as kirree er y phalchey: son va boggey ayns Israel.